1 A’di bu’thki embul ka cim c̱aan mo ka Yahuuda a’di yaki’d ka luŋgu’b mo ’peni ikam piti mo dhali a’di ṯu’kki’d mo e moŋkamu/ mo dhali gam Wathi/ gi Pa Adullaam ’kup̱ mo a’di jin yuḵkunu gway ka Hiirah mo. 2 E mun mo tani aYahuuda mishki ’bwa/ gi ’Kwaniŋ Kanaan mo jin yuḵkunu gway ki Shuu/ mo. A’di mashki a’di mo dhali ya gu’b ma yim mo be. 3 Dhala yim bwaaki’d mo dhali dho’th ya/ mo dhali a’di ki yuḵ a’di gway ka Iir mo be. 4 Doḵ/e ayim bwaaki’d mo dhali dho’th ya/ mo dhali ayim ki yuḵ a’di gway ka Unan mo be. 5 Naskina/ doḵ/e ayim dho’thki ya/ mo dhali ayim ki yuḵ a’di gway ka Shiilah mo. Ayim diki’d e Paŋ Kasiib mo me’d jin dho’thkin ma yim a’di mo be. 6 Dhala Yahuuda si’da/ gamki’da ’bom goma Iir jin ta’da bwanyaram piti mo, dhala yim yuḵu ka Ṯẖamar. 7 Hili Iir jin ta’da bwanyara/ ma Yahuuda mo tani a’di ta thus ki thus e jis/e gi Tap̱a mo dhali Tap̱a ’koshki a’di jwa mo. 8 Dhali yan’ko’da Yahuuda oki’da Unan gwo mo ki: Mashi asha kam pini mo mo ma, dhali miiyi mii mo jin minu mii mii mo gom marem pini mo, dhali c̱is uc̱i goma kam pini mo. 9 Hila Unan nyiṯẖki’d ka ’ci jin mina a’di ic̱is mo tani midi diki ta jim piti mo. Wakan ki a’di yaki bway gu’b e asha kam mo tani a’di wolki’da ’co/ piti eya ’cesh mo isi ciki/ ki a’di midi diki c̱is uc̱i goma kam mo. 10 Dhali mii jin miikina a’di wakan mo tani a’di diki ’bor e jis/e gi Tap̱a mo dhali a’di si’da/ ’koshki a’di jwa mo. 11 Dhala Yahuuda oki’da Ṯẖamar gwo mo a’di jin ta’da mar pitim ’bomi gwo mo ki: Diyi ka dhalla/ e gu’b ki cim mo ntaga Shiilah jin ta ya/m pem midi ca mo. Haali/ a’di ḵo/ki is mo oki a’di midi wu mo me’d ikam mo. Wakana Ṯẖamar a’di yaki’d mo dhali c̱a’b e gu’b gi com mo be.

12 Ŋ’ko’d mo tani mo p̱u’du’d mo ki ’bwa/ ma Shuu/ jin ta asha Yahuuda a’di iwuki’d mo dhali ka Yahuuda malaskunu mo tani a’di yaki’d mo e Pan Timnah mo eya manhil ḵa’bal piti mo a’di dhala mugum piti ka Hiirah mo jin ta Wathi/ gi Pa Adullaam mo. 13 Dhali ka Ṯẖamar ṯorkunu gwo ka mar piti a’di yaki’d mo e Pan Timnah mo mmo’ciṯẖ ḵa’bal piti amur mo tani, 14 ayim ’cuḵki burrinyem ma dhallam piti ’peni is mo dhali hi’th burrinye/ jin kumu ’kup̱ mo dhali ’tam is ma yim ki burrinye/ mo dhali c̱a’b e shemen bway ma Eenaayim a’di jin diki’d ’kup̱ ki bway gi Pan Timnah mo haala yim mishki mo mo ka Shiilah a’di caki’d mo dhali a’di ayim dinuki c̱i ki a’di mmomash mo. 15 Ka Yahuuda p̱arki’da yim e mo tani a’di kulumki’da yimi bwa mo oki a’di ta’da ’bom c̱al mo haali/ ayim a’di kumki jis/em piti mo. 16 A’di yaki’da yim mo e shemen bway mo dhali o a’di gwo mo ki: Yayu/ mo dhalki aha/ yana /e gu’bi is mo, haali/ a’di diki misha yim mo ki a’di ta’da mar piti mo. Ayim ki o a’di gwo mo ki: Atinta a’di imina /e ic̱i aha/ mo ki /e mini yayu/ i aha/ mo. 17 A’di ki thoḵ a’di gwo mo ki: Aha/ mina c̱iki /e ari mi mo ’peni bwaman ma ma’diny ḵa’bal mo. Dhala yim ki o a’di gwo mo ki: Mina /e diki c̱iyaa/ jamas mii mo ntagi /e mini hashi a’di mowa? 18 A’di thoḵki gwo mo ki: Jamas mii gi wakata imiga/ c̱i /e mo? Ayim thoḵki gwo mo ki: To me’d pini dhali dheŋdhenye/ jin ’kon ma ashu ipesu/ mo dhali cwa jin di’di me’d pini mo. Wakan a’di c̱iki’da yim uni mo dhali ya ayim gu’bi is mo dhali ayim bwaaki’d ki a’di mo be. 19 Dhali yan’ko’da yim cuki mis mo dhali ya mo dhali ayim bu’thki burrinyeŋ ’kup̱ piti mo dhali hi’th burrinyem ma dhallam piti i is mo.

20 Ka Yahuuda hashki ari mi ka mugum piti jin ta Wathi/ gi Pa Adullaam mo jin mina a’di bu’th jamas to mii ’peni me’d ma ’bom mo tani a’di diki gama yim mo be. 21 Dhali a’di doṯki ’kwani gi mo yan mo ki: Mane a’bom c̱al yan mo a’di jin c̱a’bki’d e shemen bway gi Pa Eenaayim mo? Dhali uni thoḵki a’di gwo mo ki: A’bom c̱ala kamu/ yisa di’di mahana. 22 Wakan a’di doḵki’da Yahuuda ka nyaŋ’ko’d mo dhali o a’di gwo mo ki: Aha/ dinaki gama yim mo dhali ’kwani gi mo yan o gwo si’da/ ki a’bom c̱ala kamu/ yisa di’di mahana. 23 Yahuuda thoḵki gwo mo ki: Dhalka yim dhu to gwan gom is pitiŋ gana/ mo isi ciki/ ana mina ’kwani ip̱e’th mo. /E mishini ki aha/ hashkina ari mi yan mo dhali /e diki gama yim mo.

24 ’Ko’da ppe kwara ŋ’ko’d mo Yahuuda ṯorkunu gwo mo ka Ṯẖamar jin ta’da marem pini a’di lo’bki’di miinyc̱al mo dhali shwane/ ayim a’di bwaaki’da ’ci ki miinyc̱al mo. Dhala Yahuuda oki gwo mo ki: Guya ayim ka pije/ mo dhali dhalka ayim c̱idhu ki o’d mo. 25 Dhali me’d jin ’koyunu mmoḵala ayim ka pije/ mo tani ayim hashki gwo eya mar pitiŋ gwaṯẖ mo ki: Wathi/ yan jin cilkina to gwansan mo tani a’di ta wathi/ jin bwaakika/ a’ci mo. Dhala yim oki gwo mo ki: Nyiṯẖi jamas to gwansan mo aha/ ’thona /e mo. To gwansan uni ta kuma ja mo tome’d dhala dheŋdhenye/ kun ’kon ma shu ipesu/ mo dhali cwa mo. 26 Dhali yan’ko’da Yahuuda nyiṯẖki uni mo dhali o gwo mo ki: Ayim a’di iboli aha/ e ki mii ma ḵar/e e mo haali/ aha/ dinaki c̱iya yim ki ya/m pem ka Shiilah mo. Dhali a’di diki ish nyaḵka yim doḵ/e mo be.

27 Dhali ki mo p̱u’dki’d mo jin min ma yimi dho’th mo tani ushi uc̱i ’koni su/ e bwa ma yim mo be. 28 Dhali ka yim shwan ma ’ci mo tani jan ṯal ’de/ karki me’d ka pije/ mo dhali a’bom jin karu mmowoṯẖa woṯẖ mo gom mondho’th up̱ mo tani a’di deḵki me’d piti ka thus ’per mo mmo/o gwo mo ki: Yansan a’di ip̱u’dki’di ṯwa/a/ mo be. 29 Hili ki a’di doḵki me’d piti bway bwa mo tani hili mo mo ma, akam piti p̱u’dki’d ka pije/ mo dhala yim ki o gwo mo ki: Awanyam pini jin p̱u’dkina /e ka pije/ ki is pini mo tani isa wa’da. Wakan a’di iyuḵkunu a’di gway mo ka P̱aaris mo. 30 Dhali yan’ko’d akam p̱u’dki’d mo ka thus ’peri me’d piti mo dhali gway piti yuḵkunu ka Saarah mo be.

<- ṮAKWIIN 37ṮAKWIIN 39 ->