1 Dhala Yakuub ciḵki gwo jin ’kokina iya/ ma Laabaan mmo/o mo ki: AYakuub a’di bu’thki’da ris to ’baar mo kun ta kuma babam bana mo, dhali ’peni kuma babam bana mo tani a’di igamkina a’di mii adu is mmota pa ki pa kagahara mo be. 2 Dhala Yakuub si’da/ mishki mo mo ka Laabaan diki hil a’di i e ki ’bore/ ki hila ’the mo me’d jin ṯwa/a/ mo. 3 Dhali yan’ko’d Tap̱a ki owa Yakuub gwo mo ki: Doḵi /e eya ’cesh gi ibabam pini ka nyaŋ’ko’d mo dhali e ’kwani ma bas pini mo dhali aha/ mina di e /e mo. 4 Gom gwo gi wakan mo tani aYakuub hashki gwo eya Rahiil dhala Le/ah e mombwaasho jin ’kona ma’diny ḵa’bal piti mo. 5 Dhali a’di ki o uni gwo mo ki: Aha/ misha ka babam bum diki hil aha/ i e ki ’bore/ ki hila ’the mo me’d jin ṯwa/a/ mo. Hili Arumgimis ma babam pem a’di nyaḵki di ki aha/ mo. 6 Um mishkin ki aha/ miikina ababam bum aṯu’c ki mom’bi’th pemi ’baar mo. 7 Dhali hili ababam bum a’di di’d mmohe’k aha/ e mo dhali aḵ tom pem e mo jin gamka/ ki ji gi miiga/ to mo me’di ’kume’d mo. Hili Arumgimis diki dhal a’di bway mo mmo’kosh aha/ mo. 8 A’di oki gwo mo ki: Waḵki/ min dhudhunya/ mini dho’th mo tani uni a’di imini ta kum pini mo kun mina /e igam ki ji gi miina /e to mo, dhali arisa ma’diny uni ka jiŋ gana/ uni idho’thkina dhudhunya/ mi mo. Dhali yan’ko’d doḵ/e a’di ki o gwo mo ki: Waḵki/ mi kun ’beresa is ki ’beres mini ’ko mo tani uni a’di imini ta kum pini kun mina /e igam mo ki ji gi miina /e to mo, dhali arisa ma’diny uni ka jiŋ gana/ uni idho’thkina ’beres is mi mo. 9 Gom gwo gi wakan mo tani a’di ibu’thkin ma Arumgimis to/e ma babam bum mo dhali c̱i uni ki aha/ mo. 10 Dhali yil kun bwan ma ma’diny ḵa’bal dhali mi mo tani aha/ ’de’kkina em pem ’kup̱ki mo momis mo dhali mish to ki jan mo ka ris gwasi mi ji kun p̱ekina jap̱p̱a/ ap̱o/ ma’diny ḵa’bal mo tani uni tana dhudhunya/ mo dhali uni ’beresa is ki ’beres mo dhali uni itana diŋdiŋ mo. 11 Dhali yan’ko’d aman’doyu gwo gi Tap̱a o aha/ gwo ki jan mo ki: Yakuub, dhali aha/ ki thoḵ a’di gwo mo ki: Aha/ dina imahan mo. 12 Dhali a’di ki o aha/ gwo mo ki: ’Deki em pini ’kup̱ki mo momis mo dhali p̱ari mo e mo, aris mi kun p̱ena jap̱p̱a/ ap̱o/ ama’diny ḵa’bal mo tani uni ’beresa is ki ’beres mo dhali uni tana dhudhunya/ mo dhali uni tana diŋdiŋ mo haali/ aha/ mishkina ris to kun miikin ma Laabaan ap̱o/ /e mo. 13 Aha/ tana Arumgimis ma Beeṯ/iil e mo jin wolkina /e ayini ’kuwosh jin karkina /e ka tiŋkiliŋ mo dhali /e ki thul gwo me’da p̱o/ gom aha/ mo. Cuyi mis shwane/ mo ’peni bampa/ yan mo dhali doḵi /e ka nyaŋ’ko’d e bampam pini jin dhothu /e mo. 14 Yan’ko’da Rahiil dhala Le/ah thoḵki a’di gwo mo ki: A/toŋ kamu/ di’d jin ’tuntulkunu bwa ime’d mo walla mala kamu/ dhalkunu aman e gu’b ma babam bam mowa? 15 Aman shwane/ dina a’di ki yuḵ ki bunycan paŋ ’kwanin tiya mowa? Haali/ a’di yolki aman mo dhali a’di ’baarki’da guurush jin c̱ikunu a’di gom aman mo. 16 Aris mal kun bu’thkin ma Arumgimis mo ’pena babam bam mo tani uni ta kum bam mo dhali kuki uc̱im bam mo. Hili shwane/ aris gwo gunn kun min ma Arumgimis i o /e mo tani miiyi uni mo ma.

17 Wakan aYakuub cuki mis mo dhali dhu iya/ dhali i/ash e kalman mo. 18 Dhali a’di dilki’da ris to/em piti sho’k mo, aris mal piti kun gamkina a’di adu is ki mii jin miikina a’di to mo, to/em piti kun tulkina a’di is mo e Pam P̱addaan/araam mo mmo/ii mo e bampa/ gi Paŋ Kanaan eya babam piti ka Is/hak mo be. 19 Dhali ka cim c̱aan mo tani aLaabaan a’di yaki’d mo mmo’ciṯẖ ḵa’bal piti amur mo dhala Rahiil a’di ḵwalki tomp̱inycon gi gu’b gi com mo. 20 Dhala Yakuub shakalki’d mo ki e ka wu mo i’ko’da Laabaan jin ta wathi/ Araam mo mmodiki ṯor a’di gwo ki a’di murki’di gus mo be. 21 A’di guski’d mo nyaḵki aris to kun tana a’di mo dhali cu mis mo mmo’ciṯẖ Yi’deŋ Ḵumma/ Elp̱uraat mo dhali a’di c̱u’thki jis/em piti ’kup̱ki bampa/ gi paŋ ’kuwosh e Pany Jil/aad mo.

22 Dhali yan’ko’d gwo ṯorkunuwa Laabaan ’ko’da cim kwara mo ka Yakuub guski’d mo be. 23 A’di bu’thki ’kwani ma bas piti nyaḵki a’di mo dhali ur a’di isho’k ka cim pesu/ mo dhali baṯẖ a’di isho’k ki ya’th ya’th mo e bampa/ gi Pany Jil/aad mo be. 24 Hili Arumgimis p̱u’dki’da Laabaan mo a’di jin ta wathi/ Araam ki jan mo mon’thiny mo dhali o a’di gwo mo ki: ’Cunycuri is pini ki ’bore/ mo ki /e mini diki o gwon ṯal ’deŋ kamu/ ka Yakuub mo walla ki gwom ’boro’d mo walla ki gwo shiyi’d mo.

25 Dhali aLaabaan gamki’da Yakuub mo. Dhala Yakuub a’di thumki gu’b burrinyem piti e bampa/ gi paŋ ’kuwosh mo dhali aLaabaan nyaḵki ’kwani ma bas piti mo tani uni ishkina yuuka/ mo e paŋ ’kuwosh gi Pany Jil/aad mo be. 26 Dhali aLaabaan ki owa Yakuub gwo mo ki: Atinta si’da/ imiikina /e mo mmoḵwal aha/ to mo kan mo dhali bor i’bwa/m pem mo me’d ’kwani kun bu’thkunu ki shemen gandala turga/ e mo wakan gomata mo? 27 Gomata iguskina /e ka ḵwal is mo dhali ḵwal aha/ to mo dhali ilu/ diki ṯor aha/ gwo mo, wakan ki aha/ mina ’taki karki /e ’pen ki bwaŋ ’kunyu’d mo dhali ki gway jin yuḵu mo ka danluuka kun doru ki me’d mo dhali ka dheŋdhenye/ kun ’kon ma shu/i pesu/ mo? 28 Dhali atinta dina /e ki dhalaa/ bway mo mmop̱i iya/m pem dhali i’bwa/m pem ’twa/ mo dhali o uni gwo mo ki: Iiku/ ki ’bore/ ibway mo. Shwane/ /e mii miimp̱us mo. 29 A’di ta mom’bi’th pem mo mmo’kosh /e jwa mo shwanetan, hili Arumgimis ma babam pini a’di ṯorki aha/ gwo ki jan ka en’thiny mo mmo/o gwo mo ki: ’Cunycuri is pini ki ’bore/ mo ki /e mini diki o gwon ṯal ’deŋ kamu/ ka Yakuub mo walla ki gwom ’boro’d mo walla ki gwo shiyi’d mo. 30 Shwane/ /e yakin mo haali/ /e ’kosha dhan ṯem pa kagahara gom gu’b gi cim mo, hili atinta si’da/ iḵwalkina /e tomp̱inycon pem mo? 31 AYakuub thoḵki’da Laabaan gwo mo ki: Haali/ aha/ ḵo/kina is mo haali/ aha/ kulumkina gwo ibwa mo oki /e mini bu’th i’bwa/ yin ki ’bi’th ’peni aha/ mo be. 32 E a’din ’de/ yin jin mina /e gam tomp̱inycon pini nycine/ mo tani midi diki di ki e mo. E buŋ’kus ’kwani ma bas bana mo tani ṯori to e ki me’d mo uni kun ta kum pini kun bu’thka/ mo dhali ḵali uni mo. Dhala Yakuub yisa mishi gwo ’bana kamu/ mo ka Rahiil a’di iḵwalki uni mo.

33 Wakan aLaabaan cic̱ki gu’b burrinye/ ma Yakuub mo dhali gu’b burrinye/ ma Le/ah mo dhali gu’b burrinye/ gi up̱ c̱iŋkina/ su/ gi i’bwah mo, hili a’di diki gam uni mo. Dhali a’di yaki’d ka pije/ mo ’peni gu’b burrinye/ ma Le/ah mo dhali cic̱ jima Rahiil mo be. 34 Dhali aRahiil a’di ka jiŋ gana/ iḵwalki tomp̱inycon gi gu’b gi com mo dhali dhu uni ap̱oŋ kalman e bwam ma ras mo dhali c̱a’bi uni ’pena p̱o/ mo. Laabaan a’di kulki’da ris gu’b burrinye/ ’baar mo dhali diki gam uni mo be. 35 Dhali ayim ki o com gwo mo ki: Tap̱am pem midi mii dhalka nyor ki mii shwa mo haali/ aha/ mola cu ibwambori /e mo haali/ bway gi up̱ mo tani a’di di’da p̱o/ aha/ mo. Wakan a’di ŋap̱ki’da ŋap̱ ki bur bur mo hili a’di diki gam tomp̱inycon gi gu’b piti mo.

36 Dhali yan’ko’da Yakuub warki’d ki dhana nyor jin caaca mo dhali waḵa Laabaan mo. Yakuub oki’da Laabaan gwo mo ki: Tom pem jin thamka/ mane si’da/ ti dhali mane miinthus pem mo? jin urkina /e aha/ isho’k ki ’bar ’bar mo kan? 37 Ba /e ŋap̱ki bwan tom pem mo ki bur bur mo. Aris uni ’baar mo kun gamkina /e mo tani uni ta ku ki gu’b piniya? Dhu uni imahan mo ibwambori ’kwani ma bas pem mo dhali ’kwani ma bas pini mo ki uni mini ’cunycur to mo e bwaman ana su/ mo. 38 Yil ’koni iss ’de/ kun nyaḵka/ c̱a’b ki /e mo. Aris gwasiŋ ḵa’bal pini dhali kuman ḵa’bal uni thamka/ hil yisa dhali aha/ si’da/ dinaki ’ka jan ṯal ’deŋ kamu/ mo ’pena ma’diny ḵa’bal pini mo be. 39 Uni kun dhera toŋgwap̱i/ is ka gwapi/ mo tani uni ’koka/ ḵali /e mowa? Aha/ thiskina is ’ko’d e mo gom uni mo dhali e ’peni bwam me’d pem mo tani /e ki ’theḵ gwo mo gom uni mo waḵki/ uni ḵwalu montee mo walla mon’thiny mo. 40 Aha/ a’dan be montee jin ’ba’th ma tente/ mmoshilaa/ is mo dhali ’thama ’thup̱ga/ mo mon’thiny mo dhali e ish em pem mo tani a’di guski’d mo ’peni em pem mo be. 41 Yil ’koni issu/ jin nyaḵka di ki e e gu’b pini mo, dhali aha/ miikina /eya ṯu’c ki yili ’kume’d i’ce’dka doŋon mo gom i’bwa/m pini su/ gwan mo, dhali yili pe’de/ si’da/ goma ma’diny ḵa’bal pini mo dhali /e aḵki tom pem e me’di ’kume’d mo uni kun gamka/ ki ji gi miinu to mo. 42 Waḵki/ a’di midi ’taki diki ta Arumgimis ma babam pem mo a’di jin ta’da Arumgimis ma Ibrahiim mo dhali a’di jin ḵo/kin ma Is/hak mo waḵki/ a’diŋ gana/ yan midi ’taki diki di ka ’ban pem mo tani /e ka jiŋ gana/ mini ’taki hash aha/ mo me’d ’teŋ gana/ mo. Arumgimis mishki isa nyor pem jin wo’c aha/ she/ mo dhala ṯu’c gi me’d pem mo dhali ḵucur /e ka en’thiny mo.

43 Dhali yan’ko’da Laabaan thoḵki’da Yakuub gwo mo ki: I’bwa/m gwan mo tani uni ita i’bwa/m pem mo dhali uc̱i gwan mo tani uni ita uc̱im pem mo dhali ama’diny ḵa’bal gwan mo tani uni itana ma’diny pem mo dhali aris to kun p̱arkina /e e mo tani uni ta kum pem mo be. Hili ata a’di imiga/ mii shwane/ mo gom i’bwa/m pem gwan mo walla gom uc̱i gwansan kun dho’thkina uni mo? 44 Yayo/ shwane/ mo dhali dhalki ana gama gwo me’d mo /e dhali aha/ mo, dhali dhalki a’di ta gwo jin minu mish ṯor e bwaman /e dhali aha/ mo. 45 Wakana Yakuub bu’thki wosh mo dhali thum a’di ka tiŋkiliŋ mo be. 46 Dhala Yakuub ki ṯor ’kwani ma bas piti gwo mo mmotuli wosh is mo. Dhali uni bu’thki wosh mo dhali su’k uni ka tul ’kup̱ mo dhali uni shwaki to imaṯṯaan e mo ma tul ’kup̱ wosh mo. 47 Dhala Laabaan ki yuḵ mo c̱aan gway ka YajarSahduuṯẖa mo, hila Yakuub yuḵki a’di gway ka Jal/iid mo. 48 Dhala Laabaan ki o gwo mo ki: Wosh su’k yan mo tani a’di midi ṯor gwo e bwaman /e dhali aha/ mo ’pena tee yan shwane/ mo. Gom gwo gi wakan mo tani a’di yuḵki mo yan gway ka Jal/iid mo be. 49 Dhala tiŋkiliŋ yan yuḵkunu gway ka Misp̱ah mo haali/ a’di oki gwo mo ki: Tap̱a a’di ihilki’da hil e bwaman /e mo dhali aha/ mo ki ana mina mii p̱i mo ka rem’kup̱ ’pena kamuŋ kamu/ mo. 50 Waḵki/ /e mini tham i’bwa/m pem to mii ap̱o/ mo walla /e wari mini bu’th up̱a tiya mmop̱ana’d i’bwa/m pem isa p̱o/ mo tani, ba wathiŋ kamu/ p̱iyi’d mmonyaḵ di ki ana mo mmomii mo, hili, kayi gwo e mo, Arumgimis a’di ita’da amanṯor gwo e bwaman /e dhali aha/ mo be.

51 Dhali yan’ko’da Laabaan ki owa Yakuub gwo mo ki: P̱ari wosh su’k gwan e mo dhala tiŋkiliŋ piti mo a’di jin thumkika/ mo e bwaman /e mo dhali aha/ mo. 52 Wosh su’k yan a’di ita’da man/o gwo mo dhali atiŋkiliŋ a’di ita’da man/o gwo mo ki aha/ mina diki pe ’kuwosh su’k yan mo e /e mo, dhali /e si’da/ mini diki pe ’kuwosh su’k yan e aha/ mo gom mo jin ’koshuwa ’kosh mo be. 53 Arumgimis ma Ibrahiim dhali Arumgimis ma Nahur a’di jin ta’da Arumgimis ga babam buni mo dhalki a’di dwall gwo i bwaman ana mo. Wakana Yakuub thulki gwo me’da p̱o/ mo ki moŋḵo/ is ma babam piti ka Is/hak mo. 54 Dhala Yakuub a’di c̱iki to mo mmomiiya basa ’cesh mo e ’kuwosh jin turatur mo dhali yuḵ ’kwani ma bas piti mo dhali shwa maaŋḵuthu’d mo, dhali ki uni shwaki maaŋḵuthu’d mo tani uni ’kokin e mun mmo’baar mon’thiny yan mo e ’kuwosh jin turatur mo be.

55 Mon’thamo/ ka ’tum mo aLaabaan a’di cuki mis mo dhali p̱i idhancom ’twa/ mo dhali i’bwa/m piti mo dhali ’bor uni mii mo dhali yan’ko’d a’di ki ḵwa/ is piti bwa ’peni uni mo dhali doḵ bway pa ka nyaŋ’ko’d mo be.

<- ṮAKWIIN 30ṮAKWIIN 32 ->