1 Ka Rahiil p̱arki e mo ka yim diki dho’thka Yakuub uc̱i mo tani ayim taki dhap̱an ap̱o/ ’bwaham mo dhali ayim owa Yakuub gwo mo ki: C̱iyaa/ uc̱i mo ma walla aha/ mina wu mo ’te/ ba/. 2 Anyor ma Yakuub a’di ’thakunu ap̱owa Rahiil ki ’bi’th mo dhali a’di ki o gwo mo ki: Aha/ dina e embul ma Arumgimis mo a’di jin ’tashki bwama dho’th pini ’twa/ mo mmoḵal mamana dho’th mowa? 3 Yan’ko’da yim ki o gwo mo ki: Bilhah jin ta nyarany c̱iŋkinam pem di’d imahan mo. /E mini ya ayim mo ka yim midi ta gi uc̱i e ’kup̱a’dup̱un pem mo dhali aha/ mina ta gi uc̱i ka yim si’da/ moyi. 4 Wakan ayim c̱iki a’di aBilhah jin ta nyara/ c̱iŋkinam piti mo mmota ash mo dhali aYakuub a’di yaki’da yim mo. 5 Dhala Bilhah a’di bwaaki’d mo dhali dho’thka Yakuub ya/ mo. 6 Dhali yan’ko’d Rahiil ki o gwo mo ki: Arumgimis dwallki aha/ gwo mo dhali a’di si’da/ ciḵki aha/ ’twa/ mo dhali c̱iki aha/ ya/m mo. Gom gwo gi wakan mo tani ayim ki yuḵ a’di gway mo ka Daan mo. 7 Nyara/ c̱iŋkina/ ma Rahiil a’di bwaaki’d doḵ/e mo dhali dho’thka Yakuub ya/ jin ’kon ma p̱o/ isu/ mo. 8 Dhali yan’ko’d Rahiil oki gwo mo ki: Ki mon’thir jin c̱a’bki dem dem mo tani a’di i’thirkika/ ’bwah pem mo dhali p̱i gwo jip̱i/ mo. Gom gwo gi wakan mo tani ayim ki yuḵ a’di gway mo ka Nap̱taali mo.

9 Ka Le/ah p̱arki mo e mo ki a’di daḵki’da dho’th mo tani ayim ki bu’th c̱iŋkina/ nyaram piti jin ta’da Silp̱ah mo mmoc̱iki a’di ka Yakuub mo mmota ash mo be. 10 Yan’ko’d c̱iŋkina/ nyara/ ma Le/ah a’di dho’thki’da Yakuub ya/ mo be. 11 Dhala Le/ah ki o gwo mo ki: Mo i e ki ’bor mo, wakan ayim ki yuḵ a’di gway mo ka Jaad mo. 12 C̱iŋkina/ nyara/ ma Le/ah a’di jin ta’da Silp̱ah mo dho’thki’da Yakuub ya/ jin ’kon ma p̱o/i su/ mo. 13 Dhala Le/ah ki o gwo mo ki: Aha/ be i’bora bwa mo, haali/ aris up̱i ’baar mo mini yuḵ aha/ gway ki ji gi ’bora bwa mo, wakan ayim yuḵki a’di gway mo ka Ashiir mo.

14 Ka tee jin ’ciṯẖkunu pos bunycan mo tani aRa/ubiin a’di yaki’d mo dhali gam mamana kamu/ e bunto mo (a’di jin yuḵu ki ’twa/ ma Arab ka lup̱p̱aah mo). Dhali a’di ki ḵalki uni kum ka Le/ah mo. Dhali yan’ko’da Rahiil o gwo mo ki: C̱iyaa/ mo ma, aha/ ’thona /e maman cwa ma lup̱p̱aah jin ḵalkina ya/m pini mo. 15 Hila yim ki thoḵa yim gwo mo ki: A/a’di ta ari mii jin gwa’dagwa’d mo mmobutha kaṯẖim pem mo ’peni aha/ mo ’taa? Dhali /e ki doḵ/e o gwo mo ki /e mini ḵal maman cwa ma lup̱p̱aah jin ḵalkina ya/m pem ’te/ si’dawa? Rahiil ki thoḵa yim gwo mo ki: Ba a’di be midi ya ishi /e mon’thiny shwane/ mo gom maman cwa ma lup̱p̱aah jin ḵalina ya/m pini mo ’te/ be. 16 Ka Yakuub p̱u’dki’d mo ’peni bunto mom’pimpili/ mo tani aLe/ah yaki’d ka pije/ mo mmogam a’di ’kup̱ mo, dhali o a’di gwo mo ki: /E mini mii yayu/ aha/ shwane/ mo haali/ aha/ yolkina /e mo ki maman cwa ma lup̱p̱aah jin ta jim ma ya/m pem mo. Wakan a’di ishki’d nyaḵka yim mon’thiny c̱aan mo. 17 Dhali Arumgimis ciḵki gwo ma Le/ah mo dhala yim bwaaki’d mo dhali dho’thka Yakuub ya/ jin ’kon ma p̱o/ imudhe’d mo be. 18 Le/ah ki o gwo mo ki: Arumgimis c̱iki aha/ tom pem jin karka/ ka bara ṯu’c mo haali/ aha/ c̱ikina c̱iŋkina/ nyaram pem ka kaṯẖim pem mo. Wakana yim ki yuḵ a’di gway ka Yassaakar mo. 19 Dhali aLe/ah a’di bwaaki’d mo doḵ/e dhala yim dho’thki’da Yakuub ya/ jin ’kon ma p̱o/i pe’de/ mo be. 20 Dhali yan’ko’da Le/ah ki o gwo mo ki: Arumgimis a’di tashaa/ ki tom ’boro’d jin ḵamu/ aḵam mo. Shwane/ akaṯẖim pem midi taḵ aha/ mo haali/ aha/ dho’thkina a’di iya/ kun ’kon ma p̱o/ ipe’de/ mo. Wakan ayim ki yuḵ a’di gway mo ka Sabuluun mo be. 21 Yan’ko’da yim dho’thki ’bwa/ mo dhali yuḵa yim gway mo ka Diinah mo. 22 Dhali yan’ko’da Arumgimis si’da/ kaki’da Rahiil e mo dhali Arumgimis ciḵki’da yim gwo mo dhali ḵa’dka yim bwa ma dho’th piti ’twa/. 23 Ayim bwaaki’d mo dhali dho’th ya/ mo dhali o gwo mo ki: Arumgimis ḵalki mowaḵ pem sho’k ka pije/ mo. 24 Dhala yim ki yuḵ a’di gway ka Yuusup̱ mo mmo/o gwo mo ki: Dhalka Arumgimis maraa/ ya/a kamu/ is mo.

25 Ka Rahiil dho’thki’da Yuusup̱ mo tani aYakuub oki’da Laabaan gwo mo ki: Karki aha/ ’pen mo ki aha/ mina ya mo e gu’b pem mo dhali e bampam pem mo. 26 C̱iyaa/ up̱ pem mo dhali uc̱im pem mo uni kun miikika/ /e aṯu’c mo dhali dhalkaa/ bway ayana mo haali/ /e mishkina ṯu’c kun miikika/ /e mo be. 27 Hila Laabaan o a’di gwo mo ki: Waḵki/ /e mini dhalaa/ bway mmo/o gwo gi wakan mo si’da/ tani aha/ da/arkina gwo mo ki to jin mishu ki jamas mii mo tani Tap̱a a’di ’borki aha/ mii gom /e mo be. 28 Yeri to gway mo, uni kun gamu ki ji gi miinu to mo dhali aha/ mina c̱iki /e uni mo be. 29 AYakuub ki o a’di gwo mo ki: /E ki is pini mishi to kun miikika/ /e aṯu’c mo dhali aris to/em pini ’ko /e ki ’kom pa mo gom mo jin hilka/ uni ki ’bore/ mo be. 30 Haali/ /e tan jasi ushi’ceenne/ kagush mo nṯwa/a/ ki aha/ dina ki p̱u’du/ mo dhali shwane/ uni markunu is ka enthus mo dhali Tap̱a ’borki /e mii eya ris mo gunn kun ṯu’kka/ mo. Hili dhali aha/ kakasja si’da/ miga/ mii thoson to gom ku gi gu’b pem mo? 31 A’di ki o gwo mo ki: Atinta a’di imiga/ c̱i /e mo? AYakuub o gwo mo ki: /E mini c̱i aha/ toŋ kamu/ yisa. Waḵki/ /e mini mii to yan gom aha/ mo aha/ mina doḵ/e c̱i ama’diny ḵa’bal pini ashon dhii/i’d mo dhali ta amandhu uni mo. 32 Dhalki aha/ yana e bwaman ma arisa ma’diny ḵa’bal pini ki tur mo shwane/ mmoḵwa/ ’peni arisa unycur dhali adhudhunyaŋ ḵa’bal dhali ḵa’bal ’thi/ ka ris mo dhali ’peni arisa dhudhunya/ min ’thi/ mo dhali arisa unycur mi mo, dhali uni gi wakan mo tani uni be ita tom pem jin gamka/ ki ji gi miinu to mo be. 33 Dhali gom gwom pem ji wakan mo jin oka/ ki o ma teṯe/ mo tani /e mini thoḵ gwo gom aha/ yilaŋkamu/ i’ko’d mo ki /e mini p̱u’du/ mo, dhali p̱ara ris tom pem jin miga/ gam ki ji gi miinu to inyaḵki /e mo. Aris uni kun tana unycur dhali gun tana dhudhunya/ mi dhali ḵa’bal ’thi/ waḵki/ gamu mo tani uni minu deŋ e oki kuki ḵwalu mo be. 34 Laabaan ki o gwo mo ki: ’Boro’d be, dhalki a’di gi wakan mo me’d jin ona /e mo be. 35 Hili ’peni acim c̱aan mo tani a’di ḵwa/ki’da aris gwaṯẖi mi bwa mo uni kun tana ’beres is mo dhala dhudhunya/ mo dhali aris kuman mi kun tana unycur mo dhali ḵan iya/ gwo mo mmoji uni mo be. 36 Dhali a’di hashki uni mmo/ii mo si’dasi’d ka cim kwara mo ’peni bwaman a’di ki is piti mo dhala Yakuub mo. Dhala Yakuub dhuki kun tiya mo uni kun tana ma’diny ḵa’bal ma Laabaan mo be.

37 Dhali yan’ko’da Yakuub ḵwa/ki’da biny cwan this jin ’ta’dama’ta’dam mo dhali ’ciṯẖ uni mo dhali thoson uni mo dhali ’ce cwa is mo mmotagi kush mo mmoṯor gulu’c cwaŋkush gwan eya tente/ mo. 38 A’di dhuki cwaŋkush gwan jin ’cena a’di is mbwambor ma ma’diny ḵa’bal mo eya al yi’de/ mo jin wolkunu uni yi’de/ ka ḵur mo e mo jin p̱u’dkin ma ma’diny ḵa’bal mo mmop̱i yi’de/ mo. Dhali me’d jin merkina uni mo mmomash mo tani uni p̱u’dkin mmop̱i yi’de/ mo be. 39 Dhali ama’diny ḵa’bal merkin mo dhali mash mo mbwambor cwa gwan jin ’cena a’di is mo dhali wakan ama’diny dho’thki ushan kun ’beresa is ki ’beres mo dhali tana unycur mo dhali kun tana dhudhunya/ mo. 40 Dhala Yakuub ḵwa/ki ḵa’bal bwa mo dhali kar jis/em piti ’kup̱ki ḵa’bal kun ’beresa is ki ’beres mo dhali dhalki ḵa’bal ’thi/ e bwamana ma’diny ḵa’bal ma Laabaan mo dhali a’di ki dhu kum piti kun ura a’di ki she/ mo dhali diki gam uni me’d ka ma’diny kuma Laabaan mo be. 41 E bwaman ḵa’bal kun ’bitha is ki ’bi’th mo mmodho’th mo tani aYakuub ki gu cwa mo dhali dhu uni eya al yi’de/ mo mbwambori jis/e ma ma’diny ḵa’bal mo ki uni mini mer mo dhali mash mo e bwaman cwa su/ gwan mo. 42 Hili e ḵa’bal kun ’ka’da is ki ’ka’d mo tani a’di diki dhu cwa gwan imun mo wakan uni gwan kun ta ḵa’bal kun ’ka’da is mo tani uni kuma Laabaan mo dhali kun ’bitha is ki ’bi’th gwan mo tani uni ta kuma Yakuub mo be. 43 Ki mii wakan mo tani wathi/ ta pa mo ijasa/? dhali a’di taki’d ka ma’diny ḵa’bal jin caaca mo dhali up̱ piti si’da/ takin gi up̱ c̱iŋkina/ ka ris mo kun mii uni to ime’d mo dhali ’kwaniŋ gwaṯẖ tana ris kun ta c̱iŋkinam piti mo kun mii a’di to ime’d mo dhali aris kalman mo dhali aris thuluny mo be.

<- ṮAKWIIN 29ṮAKWIIN 31 ->