1 Dhala Saarah diki’d ki e ki yili iss ’kwanimpa ipe’de/ i’ce’dka pesu/ ap̱o/ mo. Uni ta yil kun din ma Saarah ki e mo be. 2 Dhala Saarah a’di wuki’d mo e Paŋ Giryat/arba (a’di jin ta Habruun) e bampa/ gi Paŋ Kanaan mo dhala Ibrahiim yaki’d mo mmoko goma Saarah dhali ko ki gwony jabu’th goma yim mo be. 3 Dhala Ibrahiim cuki mis mo ibwambor a’di jin wuki’d mo dhali o ’Kwani gi Pa Hiṯẖṯẖa gwo mo ki: 4 Aha/ tana wathi/ yilkina/ dhali aha/ yana yany c̱a/ ibwaman um mo. C̱iyaa/ mo mbwam um jin miga/ kana kan mo ki aha/ mina kan jwam pem ’peni jis/em pem mo. 5 ’Kwani gi Pa Hiṯẖṯẖa thoḵkina Ibrahiim gwo mo ki: 6 Ciḵi aman gwo mo ma. Tap̱am pem /e ta wathi/ jin c̱a’bki dem dem ibwaman aman mo. Kani jwam pini e mo jin mina /e ikwany mo e mo gi jis jwam bam mo. Wathiŋ kamu/ yisa midi non /e ’peni mo gi jis jwam piti yisa, walla midi non /e ’peni mmokan jwam pini yisa. 7 Dhala Ibrahiim cuki mis mo dhali luŋ is piti mbwambori ’Kwani gi Pa Hiṯẖṯẖa uni kun ta ’kwani gi bampa/ c̱aan mo. 8 Dhali a’di ki o uni gwo mo ki: Waḵki/ um ona bwa ki aha/ mina kan jwam pem ’peni jis/em pem mo tani ciḵi aha/ gwo mo dhali ’thoyi Ip̱ruun jin ta ya/ ma Suuhar mo 9 ki a’di midi c̱i aha/ jurum wosh gi Pa Makp̱iilah mo a’di jin ta jim piti mo, a’di jin di’di shemen buntom piti mo. Ka ṯẖaman gana/ mo tani dhalki a’di c̱i a’di aha/ e bwambori um mo ki a’di midi ta mo jin miga/ bu’th mmokana/ kan mo be. 10 Dhala Ip̱ruun a’di diki’di bwaman ’Kwani gi Pa Hiṯẖṯẖa mo dhali a’di ki thoḵki Ibrahiim gwo mo ki gwo jin ciḵkina ’Kwani gi Pa Hiṯẖṯẖa mo ’pena ris ’kwani kun iiyin ka pije/ gi ’twaŋkala goŋ gi ’peŋkuman bampam piti mo. 11 Yisa, tap̱am pem ciḵ aha/ gwo mo. Aha/ c̱ikina /e bwam bunto dhali aha/ c̱ikina /e jurum wosh dhali to jin di’di bwaman a’di mo. E bwambori jis/e iya/ gi ’kwanim pem mo tani aha/ c̱ikina /e a’di mmokan jwam pini mo be. 12 Dhali yan’ko’d Ibrahiim a’di luŋki is piti ibwambori ’kwani gi bampa/ yan mo be. 13 Dhali a’di ki owa Ip̱ruun e mo jin ciḵa ’kwani gi bampa/ gwo mo ki: Hili waḵki/ /e mini ciḵ aha/ gwo mo tani aha/ mina c̱i /e ṯẖaman gi bunto mo. Buthi a’di ’peni aha/ mo ki aha/ mina kan jwam pem imun mo. 14 Ip̱ruun thoḵki’da Ibrahiim gwo mo mmo/o gwo mo ki: 15 Tap̱am pem, ciḵi gwo ’peni aha/ mo ma. Mony’cesh jin yolka/ tani a’di ta iss ’kwanimpa i/iss ’de/ jin ta’da guurush gi ’dolkon kush mo. To yan midi ta atinta ibwaman /e dhali aha/ mo? Kani jwam pini mo ma. 16 Ibrahiim gamki gwo me’d nyaḵka Ip̱ruun mo dhala Ibrahiim ki bara guurush ’dolkon kush mo goma Ip̱ruun mo a’di jin yerkina a’di gway e gwo jin ciḵkina ’Kwani gi Pa Hiṯẖṯẖa jin ta’da guurush iss ’kwanimpa i/iss ’de/ ’peni ’dolkon kush mo me’d isi mii jin barkunu a’di ibwaman ’kwani kun ta imanyol to mo.
17 Gom gwo gi wakan mo tani bunto ma Ip̱ruun e Pa Makp̱iilah a’di jin di’d ’kup̱ ka bor ki mis gi Pa Mamra mo, e bunto jin dina jurum wosh a’di jin di’di bwaman mo dhala ris cwa kun ’koni bunto mo ntagi shemen piti ’baar mo tani a’di i’kwarkunu mo 18 ga Ibrahiim mo a’di ta mom piti mo ibwambori ’Kwani gi Pa Hiṯẖṯẖa mo dhali ibwambora ris uni kun iin bway bwamana goŋ gi ’peŋkuman bampam piti mo. 19 Ŋ’ko’d mii yan mo tani Ibrahiim kanki’da Saarah jin ta ash mo e jurum wosh gi mom bunto jin ta Makp̱iilah mo jin di’d ’kup̱ki mis ki Pa Mamra mo (a’di jin ta Pa Habruun) jin ta bampa/ gi Paŋ Kanaan mo. 20 Mombunto dhali jurum wosh jin di’di bwaman mo tani uni i’kwarkunu mo ga Ibrahiim mo mmota jim piti mo gom mo jin minu kana kan ki ’Kwani gi Pa Hiṯẖṯẖa mo be.
Languages