1 Dhali ki a’di warki’d ki mo jin pekin ma ris to gwansan mo tani Arumgimis nyo/ki’da Ibrahiim mo dhali o a’di gwo mo ki: Ibrahiim. Dhali a’di ki thoḵ a’di ’twa/ mo ki: Aha/ dina mmahan mo be. 2 Dhali a’di ki o gwo mo ki: Susi ya/m pini shwane/ a’di jin ta jim piniŋ gana/ mo, a’di jin ena /e, isi a’di jin ta’da Is/hak mo dhali iiyi mo eya ’cesh gi Pa Muriyya dhali /e mini ’ciṯẖ a’di ’kus mmomiiya roroc̱o/ e ’kuwosh mo e mo jin miga/ ṯor /e mo be. 3 Dhala Ibrahiim cuki mis mo mon’thamo/ ka’tum mo dhali a’di ki shi’d thuluny piti akakasha ap̱o/ mo dhali a’di ki sus dhuru’c washan piti isu/ dhala Is/hak jin ta ya/m piti mo. Dhali a’di ki ’ce’d c̱iŋkira/ mo goma roroc̱o/ mo dhali a’di ki cu mis mo dhali ya mo e mo jin ṯor ma Arumgimis a’di mo. 4 Dhali ka cim ’koni kwara mo tani Ibrahiim ’de’kki em piti ’kup̱ki mis mo dhali a’di ki p̱ar mo e isa dhana/ mo be. 5 Dhala Ibrahiim ki o dhuru’c ’kwanim piti gwo mo ki: ’Koyi mmahan mo nyaḵki thuluny mo. Dhali aha/ dhali a’ci mina ii i maṯṯaan ari is ’ko’d mo dhali aman mina luŋ mo dhali doḵu/ ka nyaŋ’ko’di um mo be. 6 Dhala Ibrahiim ki bu’th c̱iŋkira/ jin minu miiya roroc̱o/ mo dhali ’thiḵ a’di mo e ’kup̱a bi ma Is/hak jin ta ya/m piti mo dhali a’di ki ḵal o’di me’d piti mo dhali gandal mo. Dhali uni ki ii ’kup̱ki misi monṯal ’de/ mo be. 7 Dhala Is/hak oki’da Ibrahiim jin ta com mo dhali o gwo mo ki: Ababam pema! Dhali a’di ki thoḵ a’di gwo mo ki: Aha/ dina mmahan mo be. Hili mo mo ma. O’d jin shwa’d di’di mmahan dhali c̱iŋkira/ mo. Hili mane ḵa’bal jin mina ana i’ciṯẖ ’kus mmomiiya roroc̱o/ mo? 8 Dhala Ibrahiim ki o gwo mo ki: Arumgimis ki is piti midi thoson ana ḵa’bal jin mina ana ’ciṯẖ mmomiiya basa ’cesh mo, ya/m pem mo. Dhali uni su/ iikin ki misi monṯal ’de/ mo be.

9 Dhali uni p̱u’dkin e mo jin ṯor ma Arumgimis a’di mo. Dhala Ibrahiim ki ḵa’ba gwaṯa/ mo dhali su’k c̱iŋkira/ mo dhali deḵa Is/hak jin ta ya/m piti mo dhali ’thi a’di ap̱o/ ’kup̱a gwaṯa/ ap̱o/ c̱iŋkira/ mo be. 10 Dhali yan’ko’d Ibrahiim he’thki me’d piti mo dhali bu’th gandal mo mmomuri ’taki ’kosh ya/m piti mo be. 11 Hili aman’doyu gwo gi Tap̱a yuḵki a’di mo ’peni momis mo dhali oki a’di gwo mo ki: Ibrahiim. Ibrahiim. Dhali a’di oki gwo mo ki: Aha/ dina mmahan mo be. 12 Dhali a’di ki o a’di gwo mo ki: Dhalku/ ki kar me’d pini ap̱owa ’ci mo, walla dhalku/ ki mii toŋ kamu/ gom a’di mo. Haali/ aha/ misha mo shwane/ ki /e ḵo/kina Arumgimis mo mmomishka/ ki /e diki non ya/m pini mo a’di jin ta ya/in gana/ ’peni aha/ mo be. 13 Dhala Ibrahiim ’de’kki em piti ’kup̱ki mis mo dhali a’di ki p̱ar mo e mo dhali hili mo mo ma e bwamp̱o/ a’di mo tani arasiŋ ḵa’bal di’d jin bu’th ma ’de/ i’cem piti mo. Dhala Ibrahiim yaki’d mo dhali bu’th arasiŋ ḵa’bal mo dhali a’di ki c̱i a’di mo mmo’ciṯẖ ’kus mo mmomiiya basa ’cesh mo mmodhal ya/m piti e i is mo. 14 Dhala Ibrahiim ki yuḵ mo yan gway ka Yahwah Yir/ah mo, me’d jin okunu gwo ka tee yan mo ntagi shwane/ mo ki: E ’kuwosh gi Tap̱a mo tani a’di iminu thoson to mo be.

15 Dhala man’doyu gwo gi Tap̱a yuḵki Ibrahiim mo me’di su/ ’peni momis mo be. 16 Dhali a’di ki o gwo mo ki: Aha/ ki is pem mo tani thulkina gwo me’da p̱o/ mo a’di ita gwo jin ona Tap̱a gom to yan jin miikina /e mo dhali mmodina /e ki non ya/m pini a’di jin ta ya/m piniŋ gana/ mo. 17 Gom mom’bor mii tani aha/ mina mar ’bor /e mii mo dhali gom mo jin maruwa mar is mo tani aha/ mara emen pini is mo mmowa e ka cul gi momis mo dhali mmowa e ka si’b kun ’koni bwaman ma gap̱ mo. Dhali emen pini mini dila ris to ’pena goŋ gi ’kwani gun ta ’kup̱ pini mo, 18 dhali e emen pini mo tani aris kal gi ’kwaniny’cesh minu ’bor mii mo haali/ /e haki gwo gi ’twam pem e mo. 19 Gom gwo gi wakan mo tani Ibrahiim doḵki’d mo nyaḵki ’kwanin dhuru’c piti mo dhali uni ki cu mis mo dhali ii mo i monṯal ’de/ mo e Pam Birsaba mo. Dhala Ibrahiim c̱a’bki’d e Pam Birsaba mo be.

20 Dhali a’di warki’d ki mo jin peki’d mo ’ko’da ris to gwansan gun ṯorkunu Ibrahiim mo mmo/o ki: Hili mo mo ma, aMilkah a’di dho’thki uc̱i mo ka kan ka Nahur mo, 21 Jin ṯwa/a/ yuḵu gway ka Uus mo dhali jiŋ ’ko’d yuḵu gway ka Buus dhali jin ’kon ma p̱o/ ikwara yuḵu gway ka Gamu/iil mo a’di jin ta’da baba ma Araam mo 22 dhali Kaasad mo dhala Hasu mo dhala P̱ildaash mo dhala Yidlaap̱ mo dhala Baṯu/iil mo be. 23 Dhala Baṯu/iil dho’thki’da Rip̱ka mo. Uc̱i ipekwara gwansan idho’thkin ma Milkah goma Nahur mo jin ta’da kam ma Ibrahiim mo be. 24 Dhala ’boma ’bwaash piti jin yuḵu gway ka Ra/uumah mo ayim si’da/ dho’thki’da Thaabah mo dhala Jaaham mo dhala Taahash mo dhala Maakah mo be.

<- ṮAKWIIN 21ṮAKWIIN 23 ->