1 Haali/ gom mo jin ’konu ki ’kus mo tani aḴrisṯẖos a’di dhu ana ki ’kus mo. Gom gwo gi wakan mo tani doshi ma dhali ṯeli sho’k mo. Dhali dhalku/ ’ba/ ki mii ’ce’d mo doḵ/e mmonyaḵ dhaŋḵa’b ’ba/ bu’th ki mii jin tanu c̱iŋkina/ mo.

2 Aha/ jin tana Buulus ona gwo yan e um mo. Waḵki/ um bu’thki mo ma munyjal yis jin ’ciṯẖu/ mo tani aḴrisṯẖos midi mii diki mii ta gi shi/ miim ’boro’d gom um mo. 3 Aha/ baha gwo mo doḵ/e eya ris ’kwani ’baar ka ’deṯe/ ’deṯe/ mo uni gun bu’thki mo ma munyjal yis jin ’ciṯẖu/ mo ki a’di minu deḵ mo mmodhu gwoŋḵan jin c̱inu mo ka ’bimpil mo be. 4 Um kun minu dhu ki mo ma ḵar/e gi gwoŋḵan jin c̱inu mo tani um minu ’ciṯẖ ’twa/ ’pena Ḵrisṯẖos mo be. Um ṯa’kkin mo ’peni bway ma ’the mo be. 5 Haali/ ki Shi/in mo tani dhali ki moŋgam gwo is mo tani ana c̱orkina c̱or mo gom mo ma ’teŋ kap̱e/ gi mo ma ḵar/e mo be. 6 Haali/ eya Ḵrisṯẖos jin ta’da Yesus mo walla e mo ma munyjal yis jin ’ciṯẖu/ mo walla e mo ma munyjal yis jin ’konuki ’ciṯẖ mo tani a’di midi mii toŋ kamuwa? Hili moŋgam gwo is mmomiina a’di to mo ki mii gi mo/en mo be. 7 Um ’kokin mo mmoso ki ’bore/ mo. Kaja nonki um ’kup̱ mo ’peni moha gwoŋ gana/ e mo? 8 Mii yansan jin laluwa lal sho’k mo tani a’di diki di ’peni a’di jin yuḵki um mo. 9 Ara cumaṯa gwa’dga/ tani a’di seki’da gana’th jin ta’da gabul ka ’bimpil mo. 10 Aha/ wukina Tap̱a jwa i is mo ki um mini ’koki budha yisaŋa kamu/ mmodhal jim pem mo. Dhali a’di jin ṯo’c um bwa mo tani a’di midi mii bu’th gwon dwall jin minu mii tor ’twa/a ’cesh gom a’di mo, ma a’di yin jin tana a’di mo. 11 Hili waḵki/ aha/ iwaḵ mo, dina mmoc̱i gwo mo gom mo jin ’ciṯẖuwa munyjal yis mo tani atinta iṯo’ckunu aha/ bwa mo naskina/? E mii yan mo tani mo jin goluwa gol mo jin ta cwany’ciṯẖan dhul mo tani a’di joc̱kunu mo be. 12 Aha/ onayi ki uni gun ’kon mmoduŋkur um mii is mo mini uṯẖ is buniŋ gana/ ki ṯollo’k mo.

13 Haali/ um yuḵkunu mo mmo’ko ki ’kus mo iwaḵ mo. Dhali dhalku/ ki bu’th mom bum jin ’kona um ki ’kus mo mmota shi/ embula ’borga/ mo gom buŋgwar is mo. Hili e mo/en mo tani tayi imanmii to ka rem ’kup̱ mo ma. 14 Haali/ gwoŋḵan jin c̱inu ka ’dan’dap̱ mo tani a’di thimkunu mo e gwon ’de/ mo, jin o gwo mo ki: /E mini en amannyaḵ c̱a’b pini jin ’dish /e is mo me’d is piniŋ gana/ mo be. 15 Waḵki/ um ki shila shil ki she/ mo dhali losa los ka rem ’kup̱ mo tani hil ki ’bore/ ki um minu ’koki ’ce’d sho’k ka rem ’kup̱ mo be.

16 Hili aha/ ona gwo mo ki: Iiyi mo e Shi/in mo dhali dhalku/ ki ṯe bwa en’dap̱ kun o um ki buŋgwar is mo. 17 Haali/ bwa en’dap̱ kun onki buŋgwar is mo tani a’di miinu ap̱o/ Shi/in mo, dhali bwa jin o’dki Shi/in mo tani ap̱o/ buŋgwar is mo, haali/ uni gwansan ita gwo kun thanyi ’twa/ ka rem ’kup̱ mo mmonon um ’peni mii gun o um bwa moyi. 18 Hili waḵki/ um shuna Shi/in bway mo tani um yisa i’kokin mo e bwaŋ’kwariny gwoŋḵan jin c̱inu mo. 19 Dhali hili mii gi buŋgwar is mo tani uni ’kon eya tente/ ki ṯẖorony mo: mo jin miinu miinyc̱al mo, dhali mo jin ’dap̱uwa ’dap̱ e mo, dhali mii kun ’kanuwa ḵanthi/ mo, 20 dhali mo jin luŋu tomp̱inycon mo, dhali mii kun miinu mii ŋaari/ mo, dhali mii kun tanu ’kup̱ ki ’kup̱ mo, dhali mii kun biruwa bir mo, dhali mii kun tanuwa ṯacum bwa mo, dhali mii kun miinuwa nyor mo, dhali mii kun tanuwa ham ’kus ka ham ’kus mo, dhali mii kun ushu gwo gam me’d mo, dhali mii kun ’konu ka non she/ mo 21 dhali mii kun tanu dhap̱an mo dhali mii kun ’kosh ma suwa ’kosh mo, dhali mii kun waluwa wal e moŋ’kup̱a su mo, dhali mii gi wakansan mo. Aha/ ruma um ki gwo mo, me’d jin rumkika/ um iṯwa/a/ mo, ki uni gwansan kun miiki to gi wakansan mo tani mini ’koki gam mal gi Bampa/ ma Arumgimis mo. 22 Hili maman gi Shi/in a’di ta mo/en mo dhali moŋ’kuny bwa mo dhali mo ma ḵu’th is mo dhali mombwa jin ’kuc̱u ki ’kari’th mo dhali mii jin tanu ki bwaŋkush mo, dhali mombwam ’borga/ mo dhali mombwa kun tanu ku isiŋ gana/ mo, 23 dhali mombwa kun ’thup̱u e ki ’thup̱ mo dhali mombwa ma du jin ’timu/ mo. Ap̱o/ mii gi wakan mo tani gwoŋḵana kamu/ jin c̱inu mo yisa di’da. 24 Dhali uni gwansan kun ta ku ma Ḵrisṯẖos jin ta’da Yesus mo tani uni ’koshki buŋgwar is buni mo nyaḵki e kun dhuna uni ki ’thir ’thir mo dhali bwa en’dap̱ buni mo be.

25 Waḵki/ ana ’kona e Shi/in mo tani dhalki ana si’da/ iina e Shi/in mo. 26 Dhalki ana nona is bana mo ki c̱oṯ c̱oṯ mo walla rukunya rukuny ’kup̱ ka rem ’kup̱ mo walla ta dhap̱an ka rem ’kup̱ mo.

<- GALATHIYYA 4GALATHIYYA 6 ->