MMO/II KA PIJE/ MO 7

1 Dhali TAP̱A oki’da Musa gwo mo ki: Hili ma. Aha/ mina mii /e me’da Arumgimis ibwambora maliḵ mo. Akam pini ka Haruun midi o gwom pini goma maliḵ me’d isa manc̱i gwo ma Arumgimis jin o gwo ma Arumgimis gom ’kwani mo. 2 Ṯorka Haruun aris to ’baar mo kun ḵankika/ /e mo dhala Haruun midi luḵ ka P̱irawn gwo mo mmodhal ’kwani ma Israyiil bway mo mmo/ii ka pije/ mo ’peni bampam piti mo. 3 Hili aha/ mina ’bitha P̱irawn adum piti mo, dhali ba aha/ mina mara ris jamas miim pem is mo dhali momer mo e Bampa/ Masir mo be. 4 P̱irawn yisa midi ciḵ gwo ’peni /e mo. Dhali yan’ko’d aha/ mina dor Pam Masir mo dhali susa waḵ pem ka ’deṯe/ ’deṯe/ ka pije/ mo uni kun ta ’kwanim pem mo ’peni Bampa/ Masir mo. 5 Dhali ’kwanim Pam Masir mini mish mo mo ki aha/ tana TAP̱A mo me’d jin miga/ dor Pam Masir mo dhali susu ’kwani ma Israyiil ka pije/ mo ’peni bwam uni mo be.

6 AMusa dhala Haruun uni miikin kan mo me’d isi ji gi ḵankina TAP̱A uni gwo mo be. 7 Ka tee jin okina uni a P̱irawn gwo mo tani aMusa i ’kona yili iss ’kwanim pa i doŋon mo dhala Haruun i ’kona yili iss ’kwanimpa i doŋon i ’ce’dka kwara ap̱o/ mo be.

Alukaas ma Musa Warka’d ki Tasha/ mo be

8 Dhali TAP̱A oki’da Musa dhala Haruun gwo mo ki: 9 Waḵka P̱irawn midi ḵan um mmomii miimer mo tani /e mini owa Haruun gwo mo ki: Budhi cwam pini mo dhali biṯi a’di a ’cesh i bwambor ma P̱irawn mo ki a’di midi war ki tasha/ mo.

10 Wakana Musa dhala Haruun uni iikina P̱irawn mo dhali miiki a’di me’d jin ḵankina TAP̱A uni gwo mo. Haruun biṯki’da lukaas piti a’cesh ibwambor ma P̱irawn mo dhali aris imanmiiya ṯu’c piti mo dhali a’di warki’d ki tasha/ mo be. 11 Dhali yan’ko’d si’da/ P̱irawn yuḵki ’kwanim piti kun yuḵayuḵ mo dhali aris ŋarim piti mo. Dhali uni si’da/ miiki to jin nyaḵan mo ki miilaṯṯ buni mo. 12 Haali/ aris uni ka ’deṯe/ ’deṯe/ biṯkina lukaas buni mo dhali uni warkin ki tasha/ mo. Hila lukaas ma Haruun a’di i loski’da lukaas buni i ’baar mo be. 13 Naskina/ adu ma P̱irawn wa ki wosh jin ’bitha’bi’th mo dhali ushki gwom buni gam is mo me’d gwo jin ṯorkina TAP̱A uni mo be.

Mompal jin Wo’c ’kwani is she/ ka Bas mo

14 Dhali yan’ko’d TAP̱A ki owa Musa gwo mo ki: Adu ma P̱irawn a’di ’bitha’bi’th mo. A’di ushki’d mo mmodhal ’kwani bway mo mmo/ii mo be. 15 Yaku/ a P̱irawn mon’thamo/ mo me’d isi mii jin miikina a’di mo mmoya ka pije/ e ḵumma/ Yi’de/ Niil mo. C̱ori a’di e yana gap̱ mo dhali ḵala lukaas pini yani me’d mo a’di jin warki’d ki tasha/ mo. 16 Dhali /e mini o a’di gwo mo ki: TAP̱A jin ta’da Arumgimis gi ’kwani ma Ibraniyiin a’di i hashki aha/ i /e mo mmo/o /e gwo mo ki: Dhalki ’kwanim pem iin mo ki uni mini luŋ aha/ mo e mom bwaasho mo. Dhali /e ushki gwo ha e naskina/ mo be. 17 Yase i ta gwo jin ona TAP̱A mo. ’Peni mii yan mo tani /e mini mish gwo ’ban ki aha/ tana TAP̱A mo. Aha/ mina dor ḵumma/ yi’de/ mo ka lukaas pem mo a’di jin diki’d e me’d pem mo dhali a’di midi war ka bas mo be. 18 Dhali wa’c kun ’kokini ḵumma/ yi’de/ yan mo tani uni mini wu mo dhali ḵumma/ yi’de/ midi bulabul mo be. Dhali ’kwani Pam Masir mini mol yi’de/ p̱i ’peni ḵumma/ yi’de/ yansan mo.

19 Dhali TAP̱A ki owa Musa gwo mo ki: Owa Haruun gwo mo ki: Budha lukaas pini mo dhali yetha bim pini mo ap̱o/ aris moŋ’kulu yi’de/ ka ris mo gi Pam Masir mo eya ris wor buni i ’baar mo dhali eya kanycal buni mo dhali eya ris ushi mo kun doshkina yi’dem buni dhali eya al buni ’baar mo, ki uni mini war ka bas mo. Dhali abas minu mish ki tur mo e Bampa/ Masiri ’baar mo eya ris bwaman toŋ’kul bwa mo kun ta cwa mo dhali e bwaman wosh kun ta ton tantar bwa mo be.

20 Musa dhala Haruun uni miikin me’d jin ḵankina TAP̱A gwo mo. E jis e ma P̱irawn dhali aris imanmiiya ṯu’c piti mo tani Haruun ’de’kki’da lukaas mo dhali dora p̱o/ ḵumma/ Yi’de/ Niil mo. Dhala ris yi’de/ kun ’kokin mo eya Niil mo tani uni warkunu ka bas mo be. 21 Dhali aris wa’c kun ’kokin eya Niil mo tani uni wukin mo dhala Niil ki bul mo mo. Wakan ’kwani Pam Masir uni molki yi’de/ p̱i ’pena Niil mo. Dhali abas si’da/ ishki’d ki tur e Bampa/ Masiri ’baar mo be.

22 Hili ŋari gi Pam Masir mo tani uni si’da/ mii to jin nyaḵan ki miilaṯ buni mo. Wakan adu ma P̱irawn wa ki wosh jin ’bitha’bi’th mo. Dhali a’di diki ha uni gwo e mo me’d gwo jin okina TAP̱A mo be. 23 AP̱irawn ṯu’kki’d mo dhali ya gu’b piti mo dhali a’di si’dayi diki kar ’cem piti gom to yan mo. 24 Dhala ris ’kwani Pam Masir si’da/ uni c̱wanyki jis e yana Niil ka ris mo gom yi’de/ mmop̱i mo, haali/ uni molki yi’de/ p̱i ’pena Niil mo be.

Mompal jin Wo’c ’Kwani Is She/ ka ’Dwa/ mo

25 Acim ’koni pesu/ kun pekin ’ko’di TAP̱A warki yi’den Niil ka bas mo be.

<- MMO/II KA PIJE/ MO 6 MMO/II KA PIJE/ MO 8 ->