1 Dhali yan’ko’da Musa dhali ’kwani ma Israyiil yuḵi gway yansan mo e TAP̱A mo mmo/o gwo mo ki:
Aha/ mina yuḵ gway e TAP̱A mo
haali/ a’di karu ki ji gi eḵa/ eḵ mo.
Shumarum dhali com piti mo tani
uni belkunu mo e ḵumma/ yi’de/ mo be.
2 TAP̱A a’di i ta mom’bi’th pem mo dhali moroc̱ pem mo
dhali a’di warki’d ki mowoṯẖ pem mo.
A’di i ta’da Arumgimis pem mo dhali aha/ mina maŋ a’di mo,
Arumgimis jin ta ji gi ibabam pem mo dhali aha/ mina kar a’di ki ji gi eḵa/ eḵ mo.
3 TAP̱A a’di i ta a’di gi mo/as mo,
gway piti i ta TAP̱A mo.
4 Arabiya ma P̱irawn kun dirkina shumarum ka ris mo dhali ajesh piti mo tani uni i ṯa’kkina a’di mo e ḵumma/ yi’de/ mo.
Dhali ’kwaniny can piti kun yuḵayuḵ gun bol tiya e ki yuḵ mo tani uni loskina ḵumma/ Yi’de/ jin Ta gi ’Per mo be.
5 Agannu/ yi’de/ i kumki uni mo,
uni iikin ka ’cesh mo ki si’d si’d me’d wosh gana/ mo be.
6 Me’da bim poros pini ayy TAP̱A, a’di eḵa/eḵ e mom’bi’th mo.
Me’da bim poros pini, ayy TAP̱A a’di i c̱ekerki ’kwaniŋ ’kup̱ bwa mo.
7 E monycam pini jin caaca kagahara mo e mo jin eḵa/ /e ki eḵ mo tani
/E yocorki ’kwani ’twa/a ’cesh kun ta ’kup̱ ki /e mo.
/E hashkina nyor pini jin ’batha’ba’th mo
a’di shwa ki uni mo me’da wusha/ mo be.
8 Eya le’dan gi jisan shush pini mo tani aris yi’de/ p̱alan ka pije/ mo.
Dhali agannu/ yi’de/ a’di doshki’d ka jisho’k me’da gaŋgara/ mo
dhali moŋ’kulga/ gi ḵumma/ yi’de/ wara’d ki boro’th mo.
9 ’Kwani kun ta ’kup̱ oki gwo mo ki: Aha/ mina ura uri sho’k mo, dhali aha/ mina bu’th uni mo.
Dhali aha/ mina ḵwa/ mal buni bwa mo, dhali dil ku gi o aha/ bwa mo.
Dhali aha/ mina buḵ gandala turgam me’d pem mo.
Dhali me’d pem a’di i midi i ’ce’d uni sho’k mo be.
10 /E ’theḵki ’tham pini mo dhali ḵumma/ yi’de/ i kumki uni ’twa/a ’cesh mo be.
Uni loskina yi’de/ mo ki ’kolo’c me’da hathiṯẖ mo, e yi’de/ jin c̱a’b ki dem dem mo.
11 Kaja a’di wana e ki /e, ayy TAP̱A, i bwaman ma risa ruma ’cesh mo kun yeru gway ka wuny is mo?
Kaja a’di wana e ki /e mo?
/e jin cayaa/ e ki ca mo e mo jin ḵogu mo.
/e dar ki liil e monycam pini jin miina /e to mo
/e miiki miimer ka ris mo.
12 /E ye’thki me’d pini jin ta’da bim poros mo tani mony’cesh loski uni mo be.
13 ’Kwani kun wankina /e ’ba/ mo tani
/E shuki uni bway ki mo/en pini jin ṯelkunu sho’k mo.
/E shuki uni bway ki mom’bi’th pini mo
e moŋḵogum pini jin dina /e nycine/ mo.
14 Ka ŋul’kup̱ ’kwani i ciḵkin mo tani uni dekin ki bir bir mo be,
dhali akap̱e bu’thki ’kwani P̱ilisṯiyiin mo be.
15 Dhali aris tap̱a gi Pa Aduum uni si’da/ ḵalkina jwa mo
dhali aris tap̱a gi ’kwani Mu/ab mo tani mo jin denu ki bir bir mo tani a’di bu’thki uni mo.
Dhali aris ’kwani kun ’kokin mo e Paŋ Kanaan mo tani uni thiski mo ma dum ’bi’thgam buni e mo be.
16 Akap̱e/ dhali mo jin ṯagu is jwa mo a’di i biṯki’da p̱o/ uni mo.
Gom monyca ma bim pini mo tani
uni doshkin mo mmoḵu’th guŋkuru/ me’d wosh mo, Ayy TAP̱A.
Ntagi ’kwanim pini pekin mo uni kun ’cuḵkina /e mo be,
17 /E mini susi uni mo dhali i dhu uni e ’kuwosha turgam pini mo,
ayy TAP̱A, e mo jin karkina /e mmota mondim pini jin ḵogu/ mo
jin nyaŋkina /e ki me’d pini mo.
18 TAP̱A /e i mini ta aMaliḵ gom ki sule/ sule/ ya ye ’ba/ mo be.
Gway Yuḵ ma Miriyam
19 Ka arabiyaŋ ’kwani Pa Masir dhali shumarum ki imanmer uni ilu/ ’ceṯẖki bway ḵumma/ yi’de/ mo tani TAP̱A ḵalki yi’de/ ka nyaŋ’ko’d ’peni ḵumma/ yi’de/ ap̱o/ uni mo be. Hili ’kwani ma Israyiil uni iikin ap̱o/a ’cesh jin ḵuthaḵu’th e bwaman ḵumma/ yi’de/ mo be.
20 Dhali yan’ko’d aMiriyam jin ta’da amanc̱i gwo jin ta’da yim mo a’di jin ta ’bwah ma Haruun mo a’di ’bu’thki’da jallugga/ e me’d piti mo. Dhali aris up̱i ’baar mo iikin mo ka pije/ mmobaṯẖa yimi sho’k ka jalluggam buni i me’d mo dhali sa mo be. 21 Dhala Miriyam yuḵki uni gway mo mmo/o gwo mo ki:
Yuḵi gway e TAP̱A mo haali/ a’di p̱iki mii e ki monycaŋ gana/ mo.
Shumarum dhali imanmer uni ap̱o/ mo tani uni belkunu mo e ḵumma/ yi’de/ mo be.
Yi’deŋ ḵa/ga/ mo
22 Dhali yan’ko’d aMusa suski’da Israyiil ki seṯẖ mo ’peni ḵumma/ Yi’dem ’Per mo. Dhali uni iikin mo e mombwaasho jin yuḵu gway ka Shur mo. Uni iikin ka cimi kwara/ e mombwaasho mo dhali ’koki gam yi’deŋ kamu/ mo be. 23 Ki uni p̱u’dkin e mo jin yuḵu gway ka Murrah mo tani uni molki yi’de/ p̱i ’peni a’di mo haali/ a’di ḵa/aḵa/ kagahara mo. Gom gwo gi wakan mo tani a’di i yuḵkunu a’di gway ka Murrah mo. 24 Dhali ’kwani miikina gumgum ap̱owa Musa mo mmo/o gwo mo ki: Atinta a’di mina ana i p̱i mo?
25 Dhala Musa gwo ki ’twa/ e TAP̱A mo dhali TAP̱A ṯorki a’di cwa mo. Dhali a’di birki a’di mo e yi’de/ mo dhali yi’de/ c̱a’b ki dhel dhel mo. E mun mo tani TAP̱A c̱iki uni gwoŋḵan ki ’twa/ mmomii mo. Dhali e mun mo tani a’di palki uni mo. 26 A’di o gwo mo ki: Waḵki/ um mini ha gwom pem e ki ’bor ’bor mo tani dhali mii jasi tom ’boron e jis em pem mo tani dhali c̱iya hirdhe/ ki gwoŋḵan pem mo dhali dhuwa ris gwoŋḵan gi ’twam pem mo tani, aha/ mina dhu ’batha tiya ap̱o/ um yisa me’d kun dhukika/ ap̱o/ ’Kwani Masir mo. Haali/ aha/ tana TAP̱A jin wac̱ um mo.
27 Dhali yan’ko’d uni p̱u’dkin mo e Pa Iliim mo e mo yin jin ’kokina yi’de/ gun du’dun i ’kume’d i’ce’dka su/ mo dhali cwan jeṯkum ’kokina iss ’kwanimpa ikwara i’ce’dka ’kume’d mo. Dhali uni thumki gu’b burrinyem buni mo e yan yi’de/ mo be.
