Gwo ma Musa jin ’Kon ma P̱o/ i Su/: Mmo/ii ka Pije/ mo

1 Gwansan i ta gway gi iya/ ma Israyiil mo uni kun iikin bway Pam Masir mo nyaḵka Yakuub mo, aris uni ka ’deṯe/ ’deṯe/ mo ’peni kuŋ gu’b piti mo be. 2 Ra/ubiin mo dhala Shim/uun dhala Lawi mo dhala Yahuuda/ mo be. 3 Yassaakar dhala Sabuluun dhala Benyamiin mo. 4 Daan dhala Nap̱taali dhala Jaad dhala Ashiir mo be. 5 Aris emen ma Yakuub i ’baar mo uni ’ko iss ’kwanimpa i kwara i’ce’dka ’kume’d mo. Dhala Yuusup̱ diki’di ṯwa/a/ e Pam Masir mo be. 6 Dhali yan’ko’d aYuusup̱ wuki’d mo dhala ris ikam piti mo dhala risa nyaḵum yil ki uc̱im buni mo be. 7 Hili emen ma Israyiil uni dho’thkin ka ris mo dhali markunu is kagahara mo. Dhali uni eḵkin mo ki nyanye/ dhali ’bi’thkina is ki ’bi’th mo. Gom kan mo tani Pam Masir ’tu’dkunu ki uni mo.

8 Dhali yan’ko’d amaliḵ thisa kamu/ bu’thki embul ma kamu/ dhamo/ mo i Pam Masir mo a’di jin diki misha Yuusup̱ mo be. 9 Dhali a’di ki o ’kwanim piti gwo mo ki: Ayy, ’kwani ma Israyiil uni tana ris ka ris mo dhali uni si’da/ ’bitha’bi’th mo mmobol ana e mo be. 10 Waḵki/ mo/as midi biṯa p̱o/i ana mo tani uni mini gam me’d ki ’kwani kun ta ’kup̱ ki ana mo dhali as ana mo dhali ye mo ’peni bampam bana mo be. Dhalki ana ṯikira ap̱o/ uni ki yuḵ yuḵ mo ki uni mini ’koki mar is mo.

11 Gom ’kup̱ gwo yan tani uni dhuki itap̱a ap̱o/ uni mo mmoṯa/ uni is jwa ka ṯu’c kun diṯadiṯ mo. Dhali uni nyaŋkina P̱irawn ’peŋkuman bampa/ ki jasi mondhu tom piti mo kun yuḵu gway ka Piṯuum dhala Ramasiis mo be. 12 Hili ki ’kwani ma Israyiil ’kokunu mo mmosirica p̱o/ ki sho’k mo ki nyanye/ mo tani uni si’da/ markunu is mo ki nyanye/ mo dhali mmohakara ’cesh ka bor mo. Wakan ’kwani Pam Masir uni ḵo/ ki is mo gom ’kwani ma Israyiil mo be. 13 Wakan uni dhuki ’kwani ma Israyiil mo mmomiiya ṯu’c ki c̱iŋkina/ ki mom’bi’th mo be. 14 Dhali uni si’da/ dhuki ’kwani ma Israyiil is mmo’ta’bula’ta’bul mo ka ṯu’c jin ’batha’ba’th mo mmo’thoḵa jeeŋ gu’b mo dhali eya risa ṯu’c kun ’kona e ki she/ ki she/ mo e bwam buntom buni mo. Eya risa ṯu’c buni gwansani ’baar mo tani c̱inu uni ki dar gi mo si/is mo be.

15 Dhali yan’ko’da maliḵ gi ’kwani Pam Masir ki o iShip̱ira uni ka Puu/a kun ta up̱ kun dho’th tiya Ibraniyiin gwo mo ki: 16 Waḵki/ um dho’th up̱ ’kwani Ibraniyiin mo dhali um ki p̱ar uni e eya p̱owa birish jin dhodhuwa dho’th ap̱o/ mo tani, ’koshi a’di jwa mo waḵki/ ta’da ’ciŋgwaṯẖ mo. Hili waḵki/ ta’da ’bomi mo tani dhalka yim di’d ki e mo. 17 Hili up̱ gwansan kun dhodhi tiya mo tani uni ḵo/kina Arumgimis mo. Dhali uni ’koki mii gwoŋḵan ma maliḵ gi Pam Masir jin ḵankina a’di uni mo. Hili uni dhal uc̱iŋgwaṯẖ mo mmo’ko ki e mo be. 18 Dhali amaliḵ gi Pam Masir a’di yuḵki up̱ gwansan mo dhali o uni gwo mo ki: Atinta miina um kan mo mmodhal uc̱iŋgwaṯẖ bway mo mmo’ko ki e kan mo?

19 Up̱ kun dhodhi tiya thoḵkina P̱irawn gwo mo ki: Haali/ up̱ gi ’Kwani Ibraniyiin yisa wa ki up̱ gi ’kwani Pam Masir yisa. Hili uni c̱a’b ki dem dem mo dhali uni la dho’th uc̱im buni nṯwa/a/ mo ki aman ’konaki p̱u’d naskina/ mo be.

20 Wakan Arumgimis miiki’d ki ’bore/ gom up̱ gun dho’thki tiya mo. Dhali ’kwani markunu is ki nyanye/ mo dhali uni c̱a’b ki dem dem e mom’bi’th buni mo be. 21 Dhali gom moŋḵo/ jin ḵo/kina up̱ Arumgimis mo tani a’di c̱iki uni uc̱im buni si’da/ mo be. 22 Dhali yan’ko’d mo tani aP̱irawn ḵanki’da ris ’kwanim piti gwo ’baar mo ki: Aris iya/ kun dho’thkunu gom ’kwani Ibraniyiin mo tani minu ṯa’kku/ mo e ḵumma/ yi’de/ mo, hili um mini dhalku/ ushi i’bwa/ i ’kon ki e mo be.

MMO/II KA PIJE/ MO 2 ->