5 Wakan, ’koshi mii ga ’cesh jwa mo kun ’kon e um mo, kun ta mo gun miinu miinyc̱al mo dhali mo gun ’dap̱u e mo dhali e kun dhunu ki ’thir ’thir mo dhali bwan thus kun pishu is mo dhali mo jin ’thoṯẖu/ bwa mo, a’di jin ta mii jin luŋu tomp̱inycon mo be. 6 Gom mii gwansan mo tani a’di ip̱u’dkin ma nyor ma Arumgimis ap̱o/ iya/ gi ’kwani kun ushi gwo ha e mo. 7 E mii gwansan ’thissa/ mo tani um iikin e uni mo me’d jin ’kokina um mo e bwam uni mo be. 8 Hili shwane/ dhuyi uni ’baar mo ’pen ka pije/ mo, mii ma nyor mo, dhali anyor jin deḵki’da deḵ mo, dhali mii gun dup̱a dup̱i e mo dhali mo ma thu’th ’pen jin thudhu ka sor gun walu mo dhali gwo nyogga/ ’peni ’twam bum mo. 9 Dhalku/ ki ta aṯor ka rem ’kup̱ mo, mmomisha um ki um dhalki mii gi buyempan dhamo/ ’pen mo ki miim piti kun boṯkina um mo. 10 Dhali um ki hi’th miim buyempan this mo, a’di jin uḵkunu mo doḵ/e e monyiṯẖa/ nyiṯẖ mo ’ko’di jamas gi a’di jin uḵki’da uḵ mo. 11 Mmahan mo tani Wathiŋ Griḵi dhali Wathi/ Yahuuda/ mini mol ’ko ki she/ mo, dhali mo ma munyjal yis jin ’ciṯẖu/ mo dhali mo ma munyjal yis jin ’konuki ’ciṯẖ mo, dhali wathi/ jin diki wal ’twaŋ Griḵi mo dhali jin mii mii kun ḵaŋkama ḵaŋkam mo, dhali c̱iŋkina/ jin yolu mo dhali wathi/ jin di ki ’kus mo, hili aḴrisṯẖos a’di ta to ’baar mo dhali e ana ’baar mo be.

12 Wakan, hithi ma mii gwansan mo, me’d uniŋ gana/ kun kwanykin ma Arumgimis mo, um kun dhelelkin mo dhali kun enu mo, mii gi wakansan mo kun ta mii kun ḵwojuwa ḵwo’c e i is mo dhali mii kun miinu ki bwaŋkush mo dhali mii gun dhunu is ki gwa’d mo dhali mii kun miinu ka ’thup̱ e mo dhali mii kun ’kuc̱u bwa ki ’kari’th mo, 13 mmothona thon me’di ’ko’d ka rem ’kup̱ mo dhali, waḵki/ wathin ’deŋ kamu/ ta gi gwo walla/ ap̱owa kamuŋ kamu/ mo tani dhali adhal gi miinthus ’pen ka rem ’kup̱ mo ma. Me’d mii jin dhalkina Tap̱a uma mure/ miinthus bum ’pen mo tani um si’da/ mini mii dhalka mure/ miinthus ’pen mo. 14 Dhali ap̱owa ris mii gwansani ’baar mo tani hithi mo/en mo, a’di jin deḵki’da ris to ’baar mo mmonṯal ’de/ mo ki ’bor gana/ mo ki dar gi mo ma dhadharmu’th mo. 15 Dhali dhalki moŋḵu’th is ma Ḵrisṯẖos bway mo mmojiya dum bum mo e a’di ka jiŋ gana/ jin yuḵkunu um mo e buŋgwar isa ’de/ mo, dhali mmoc̱i mo jin ’boruwa ’bor bwa i is mo. 16 Dhalki gwo ma Ḵrisṯẖos c̱a’ba’d e um ki c̱a’b ’pempaŋ gana/ mo me’d mii jin ṯorkina um gwo mo dhali mmorogom gwo ka rem ’kup̱ mo ka ris moyuḵ mo, dhali me’d jin yuḵkina um gway mo mmoka mo jin miinuwa mii e mo dhali gway jin maŋuwa maŋ mo dhali gway jin yuḵu gom to gi shi/in mo ki mii jin ’boruwa ’bor bwa i is eya dum bum goma Arumgimis mo be. 17 Dhali ma eya ris to gunn kun mina um imii mo tani e gwo gun ona um mo walla mii gun miina um mo tani miiyi aris to ’baar mo ki gway gi Tap̱a Yesus mo mmoc̱i mo jin ’boruwa ’bor bwa i is ka Arumgimis mo, a’di jin ta’da Baba e a’di mo be.

18 Up̱ ’dap̱i ki me’d ki gwo gi ikaṯẖim bum mo me’d gwo jin ha me’d e Tap̱a mo. 19 ’Kwaniŋ gwas, eni up̱ bum mo ma, dhali dhalki uni ki ’cwar mo. 20 Uc̱iya, hayi gwo gi icim e mo dhali gwo gi ikwan e mo goma ris to ’baar mo, haali/ mii yansan mo tani a’di ki ’bor Tap̱a bwa mo. 21 Ibaba, dhalku/ ki rukuny uc̱im bum ka nyor mo, isi ciki/ uni mini ’koki ’bitha du is mo. 22 C̱iŋkina/ kun yoluwa, hayi gwo e eya ris to ’baar mo gi uni gwansan kun ta tap̱am bum mo e mony’cesh mo, yisa ki mii kun miinu e jis/eŋ ’kwani mo mmo’bor ’kwani bwa mo ’te/ yisa, hili ka dun ṯal ’de/ mo mmoḵo/ Tap̱a mo be. 23 Ma eya risa ṯu’c bum gunn kun miina um mo tani miiyi a’di ki bwaŋ gana/ mo me’d jin miina um Tap̱a to mo, dhali yisa gom ’kwaniya, 24 mmomishkina um ’peni Tap̱a mo ki um mini bu’th mal mo me’d tom bum jin ish ḵumma/ mo. Um miiki Tap̱a Ḵrisṯẖos to mo be. 25 Haali/ amanṯẖu’th to mii mo tani a’di minu doḵu/ tonthus ap̱o/ a’di jin miikina a’di mo dhali mii jin miinu ka gwar ’de/ yisa di’da.

<- KULUUSI 2KULUUSI 4 ->