Gwo jin ’Kwar ma Buulus gom ’Kwani gi Paŋ KULUUSI mo

1 ABuulus, a’di jin karu ki she/ mo goma Ḵrisṯẖos jin ta’da Yesus mo ki bwa ma Arumgimis mo dhala Ṯimuṯẖawuus jin ta’da kam bana mo.

2 E uni kun dhunu ki she/ ki dhelel dhelel mo dhali iwaḵ kun ta ku isiŋ gana/ mo eya Ḵrisṯẖos mo, uni kun ’kokin mo e Paŋ Kuluusi mo.

A’the e um mo dhali moŋḵu’th is ’peni Arumgimis jin ta’da Babam bana mo be.

3 Aman isa yempa/ ’bora Arumgimis bwa i is mo, a’di jin ta’da Baba gi Tap̱a Yesus Ḵrisṯẖos bana mo, me’d jin ’thokina aman mo gom um mo, 4 haali/ aman ciḵkina gwo gom moŋgam gwo is bum eya Ḵrisṯẖos jin ta’da Yesus mo dhali mo/en jin takina um mo goma ris uni ’baar mo kun dhunu ki she/ ki dhelel dhelel mo, 5 haali/ mo ma ’teŋ kap̱e/ a’di karkunu mo gom um e momis mo. Gom a’di yansan mo tani um ciḵki gwo nṯwa/a/ mo e gwo jin ta gwoŋ gana/ mo, a’di jin ta gwom ’borga/ mo, 6 a’di jin p̱u’dki’d e um mo, me’d a’di ka jiŋ gana/ diki’d e mony’ceshi ’baar mo mmodho’thkina a’di maman mo dhali mmo’twaḵkina a’diya ’twaḵ mo – wakan e bwam um ki is bum mo ’pena tee jin ciḵkina um a’di mo dhali mish a’di ’ban mo, a’di jin ta’da ’the ma Arumgimis mo e gwoŋ gana/ mo, 7 me’d jin da/arkina um a’di mo ’pena Abap̱raas mo, a’di jin ta’da garr bam jin enu jin mii to mo. A’di ta a’di isiŋ gana/ mo jin mii to goma Ḵrisṯẖos mo gom gway bam mo 8 dhali a’di ṯorki a’di aman mo gom mo/en bum e Shi/in mo be.

9 Dhali wakan ’pena tee jin ciḵkina aman a’di mo tani aman yisa daḵkina ’tho mo mmo’tho mo gom um mo, mmodoṯa/ doṯ mo ki um minu ’taki ’tu’d mo ki monyiṯẖ bwam piti mo eya ris miin to gi shi/in gi moyuḵ mo dhali momish gwo ’ban mo, 10 mmosusa sus e bway mii kun mini ha me’d gom Tap̱a mo, mmo’tu’d mo ki mii kun mini ’bor a’di bwa i is mo mmoḵal mamana dho’th mo goma ris miim ’borga/ mo dhali mmomara mar is mo ki monyiṯẖa/ Arumgimis mo be. 11 Dhalki um ’bitha is mo eya ris mom’bithi ’baar mo isi ki monycam piti jin c̱a’bki dem dem mo goma ris mo jin ’dimuwa ’dim ’kup̱ mo dhali bwa jin ’kuc̱u ki ’kari’th mo ki moŋ’kuny bwa mo, 12 mmoc̱iya Baba bwam ’boro’di is mo, a’di jin thumki ana mo mmonyaḵ mal pwaḵ ki uni kun dhunu ki she/ ki dhelel dhelel mo e moŋkush mo be. 13 A’di ’cuḵki ana mo ’peni mom’bi’th gi mondhurumi’d mo, mmo’ciṯẖ ana agap̱ mo e bampa/ gi Ya/m piti jin ena a’di mo, 14 e a’di jin takina ana mo jin wanuwa wan ’ba/ mo dhali amure/ gi miinthus jin dhalkunu ana ’pen mo be.

15 A’di jin bu’thki jamas ma Arumgimis mo, a’di jin molu mish ki e ga ’cesh mo, a’di jin ta’da bwa nyara/ jin ṯwa/a/ ka ris to ’baar mo kun uḵu mo be. 16 Haali/ e a’di mo tani aris to ’baar mo ’kokunu mo mmo/uḵ mo e momis mo dhali e mony’cesh mo, uni gun mishu ki e ga ’cesh mo, dhali uni kun molu p̱ar e ki e ga ’cesh mo, waḵki/ adhana ḵursi ma maliḵ mo walla mo jin tanu tap̱a mo, walla mom’bi’th kun molu gadhir mo walla moshirr mo tani – aris to ’baar mo ’kokunu mo mmo/uḵ mo e a’di mo dhali gom a’di mo be. 17 A’di diki’di ṯwa/a/ ka ris to ’baar mo, dhali e a’di mo tani aris to ’baar mo tulkunu ’twa/ ’kup̱ mo e a’di mo mmonṯal ’de/ mo be. 18 A’di ta’da ’kaŋ’kup̱ gom buŋgwar is mo a’di jin ta’da ḵaniisa mo. A’di ta monṯel ’pen mo, a’di ta’da bwa nyara/ ’peni mowu mo, ki a’di eya ris to ’baar mo tani midi ’taki ta isa ’cilman gana/ mo be. 19 Haali/ e a’di mo tani arisa ’tu’d kun ta ku ma Arumgimis mo tani ’borkina bwa mo mmota gi moŋ’ko mo be. 20 Dhali e a’di mo tani a’di gwamki’da gwam ki is pitiŋ gana/ mo eya ris to ’baar mo, waḵki/ to gun ’kon e mony’cesh mo walla e momis mo tani a’di karki mo ma ḵu’th is ka bas piti ki cwany’ciṯẖan dhul mo be.

21 Dhali um kun ’thissa/ ’kokin ka pije/ ’peni a’di mo dhali kun ta ’kup̱ ki ’kup̱ eya dum bum mo mmomii to kun ta thus ki thus mo tani 22 a’di shwane/ gwamki’da gwam mo ki is piti mo jin ta shuman is ki jwam piti mo, ki mii gi wakan mo tani a’di midi ṯor um eya tente/ mo me’d ku gun dhelelkin mo dhali kun dar gi thalkin mo dhali ku gun mini dar gi mo ma waḵ ibwambori a’di mo, 23 ba shi/ mii a’dan ’te/ ba/, waḵki/ um mini ṯikir ’ko mo e moŋgam gwo is mo, ki moŋḵa’b mo dhali ṯel sho’k mo, yisa mmoṯi’k mo ’peni mo ma ’teŋ kap̱e/ gi gwom ’borga/ jin ciḵkina um mo, a’di jin c̱ikunu aris ’kwani ’baar mo kun uḵkunu mo e bwaŋ’kwariny momis mo, dhali gom a’di mo tani aha/ jin tana Buulus warkina ka manmii a’di mo be.

24 Dhali shwane/ aha/ ’kunykina bwa mo e is pem mo jin ’koshki aha/ ka nyor mo gom gway bum mo, dhali e shuman is pem mo tani aha/ thimkina a’di jin harkunu mo e mo jin ṯocuwa Ḵrisṯẖos bwa mo gom gway gi buŋgwar is piti mo, a’di jin ta’da ḵaniisa mo. 25 A’di jin warkika/ ka manmii to mo isi ki gwo jin piyi’d ’peni Arumgimis mo gom mo jin taka/ amandhu gwo mo, a’di jin c̱ikunu aha/ mo gom um mo mmokar gwo ma Arumgimis ki a’di minu mish eya tente/ mo, 26 a’di jin ta gwo ma Arumgimis jin bagu mo, a’di jin ba’kkunu ki she/ yil ka ris mo dhali mo ma nyaḵum yil gun tanu mo, dhali hili shwane/ a’di ṯorkunu eya tente/ ki kum piti kun dhunu ki she/ ki dhelel dhelel mo. 27 E uni mo tani Arumgimis ki kar bwa mo mmoṯor eya tente/ mo ka dhan mii kun wani caa e ’kwani kun ’koki ta ’Kwani Yahuuda/ mo ki monyca jin ta pa ki pa mo e gwo yansan jin c̱inu ki jim bag mo, a’di jin ta’da Ḵrisṯẖos jin di’d e um mo, jin ta mo ma ’teŋ kap̱e/ gi monyca mo be. 28 A’di jin bahkina aman gwo mo mmoruma ris ’kwani ’baar ka ’deṯe/ ’deṯe/ ki gwo mo dhali ṯora ris ’kwani ’baar ka ’deṯe/ ’deṯe/ gwo mo eya ris moyuḵ mo ki aman mina ’taki dhuwa ris ’kwani ’baar ka ’deṯe/ ’deṯe/ mo ki ku gun isin mo eya Ḵrisṯẖos mo be. 29 Haali/ gom mii yan mo tani aha/ miikina mii jin ’batha’ba’th mo, mmo/uṯẖ mo ki is jin umu’di ’baar mo, a’di jin ṯẖi’thki’da ṯẖi’th mo e aha/ mo.

KULUUSI 2 ->