1 Dhali ’kwaniŋ gwasa tiya iiyin ka luŋgu’b ’peni Pa Yahuudiyya mo dhali ṯorkina waḵ buni gwo mo mmo/o gwo mo ki: Isi ciki/ ki um ’konuki ’ciṯẖa/ munyjal yis mo me’d mii jin miikin ma Musa mo tani um molu woṯẖ mo be. 2 Dhali ki iBuulus dhala Barnaaba uni walkina wal jin gwa’da’d yisa tani uni ṯirrishki uni ki gwo kagahara mo dhali awaḵ buni ki dhu iBuulus mo dhala Barnaaba mo dhali kun tiya si’da/ ’peni bwam uni ki uni mini ’taki ii ka gagamis e Pa Urushaliim mo e imandhunu ki she/ mo dhali ’kwaniŋ gwanyjaḵa/ si’da/ mo gom gwo yansan jin doṯu/ mo. 3 Wakan mmosuskina ’kwaniŋ ḵaniisa uni ibway mo tani uni ’ciṯẖkin ki tur mo e Pam P̱iniikiya mo dhali e Pan Saamira mo mmoṯor gwo eya tente/ gom mo gi ṯuka ’kwani kun ’koki ta ’Kwani Yahuuda/ adu is mo dhali a’di pina dhan bwam ’boro’d eya waḵ buni ’baar mo. 4 Dhali ki uni p̱u’dkin e Pa Urushaliim mo tani uni butha ’kwaniŋ ḵaniisa mo dhali imandhunu ki she/ mo ki ’kwaniŋ gwanyjaḵa/ ilu/ mo dhali gwo lolop̱kina uni uni mo goma ris to ’baar mo kun miikin ma Arumgimis e uni mo. 5 Hili ’kwanin tiya ’pena waḵa kamu/ ’peni bwaŋ ’Kwanim P̱arisiyiin kun gam gwo is mo tani doshkin ’peni bwam uni mo mmo/o gwo mo ki: A’di minu mii mii mo mmo’ciṯẖ uni amunyjal yis buni mo dhali mmoḵan uni gwo mo ki uni mini ha gwoŋḵan ma Musa jin c̱inu e mo.

6 Dhali imandhunu ki she/ mo dhali ’kwaniŋ gwanyjaḵa/ nyaḵki is tul mo imonṯal ’de/ mo mmoṯora ṯor gom gwo yan mo be. 7 ’Ko’di gwo kun sugu ki rash rash mo tani aBuṯerus cuki mis mo dhali o uni gwo mo ki:

Iwaḵ pema, um mishkin ka Arumgimis kwanyki’d ’peni um kagush ki ’twam pem mo tani ’kwani kun ’koki ta ’Kwani Yahuuda/ mini ciḵ gwom ’borga/ yan mo dhali gam gwo is mo. 8 Dhala Arumgimis jin mishki’da du mo tani a’di ṯorki gwonṯor gom uni mmoc̱i uni Shi/in Dheleladhelel mo me’d jin c̱ikina a’di ana mo. 9 Dhali a’di diki mii mii ka gwar ’de/ gom ana mo dhali gom uni si’da/ kun ’koki ta ’Kwani Yahuuda/ mo haali/ a’di ki lam uni adum buni ki dhelel dhelel ki moŋgam gwo is mo be. 10 Haali/ a’di wakan mo tani ata pala uma Arumgimis kan mo ki um mini ’taki dhu dhaŋḵa’b tom’ba/, i’ba/i imanciḵ gwo kun molkina ibabam bana ḵal mo dhali ana si’da/ mo. 11 Hili ana gama gwo is ki ana minu woṯẖ mo ka ’the gi Tap̱a Yesus mo me’d mii jin mina uni mii kan si’da/ mo be.

12 Dhali arisa waambuhany ’kwani ’baar mo ’kon ki shwam mo, dhali uni ciḵki gwo ma Barnaaba mo dhala Buulus mo mmololop̱a uni gwo mo gom momer mo dhala dhan mii kun caaca kun miikin ma Arumgimis i bwaŋ ’kwani kun ’koki ta ’Kwani Yahuuda/ e uni mo be. 13 Dhali ’ko’di uni ’kokin ki shwam mo tani aYakuub thoḵ uni gwo mo mmo/o gwo mo ki:

Iwaḵ pema kana, ciḵi gwom pem mo ma. 14 Simaan lolop̱ki gwo gom monthip̱ jin thip̱kin ma Arumgimis ’kwani kun ’koki ta ’Kwani Yahuuda/ mo mmobuḵ ’kwani ka pije/ ’peni bwam uni gom gway piti mo. 15 Dhali gwo yan gama imanc̱i gwo ma Arumgimis is kadhamo/ mo me’d jin ’kwarkunu mo ki:

22 Ŋ’ko’d mo tani uni ṯoshkin ki a’di ’boro’d mo gom imandhunu ki she/ mo dhali ’kwaniŋ gwanyjaḵa/ gi ’kwaniŋ ḵaniisa ’baar ilu/ mo mmokwany ’kwani ’peni bwaman uni mo dhali mmoṯu’c uni mmo/ii Pa Anthaakiya nyaḵki iBuulus mo dhala Barnaaba mo. Gway yerkunu mo ka Yahuusa mo jin yuḵu ki gwaya kamu/ ka Barsaaba mo dhala Sila kun ta tap̱a ibwaman ma waḵ buni mo. 23 Dhali uni ’kwarki gwo cikise/ e uni mo ki: Imandhunu ki she/ mo dhali ’kwaniŋ gwanyjaḵa/ ma waḵ buni eya waḵ kun ’koni bwaman ’kwani kun ’koki ta ’Kwani Yahuuda/ mo e Pa Anthaakiya mo dhali Pan Suriyya mo dhali Paŋ Kilikiyya mo tani theki uni me’d mo ma. 24 Haali/ ka jiŋ gana/ aman ciḵkina gwo ki unin tiya kun iikin ka pije/ ’peni bwam am mo tani uni ṯo’c um ’kus ki gwo mo mmo’kosh uma dum bum is mo uni kun ’kona aman ki ye’th sho’k ki gwo mo be. 25 A’di ṯoshkina aman ki a’di ’boro’d mo mmogama aman bwa me’d ki bwan ṯal ’de/ tani mmokwany ’kwani mo dhali mmoṯu’c uni ki ii i um mo nyaḵki iBarnaabam bam mo dhala Buulus kun ena aman kagahara mo be. 26 Uni ta ’kwani kun c̱iki is buni ki ’kwanin tiya ki moŋ’koki/e gom gway gi Tap̱a Yesus Ḵrisṯẖos mo be. 27 A’di hashkina amana Yahuusa mo dhala Sila mo. Uni ki is buni mini ṯor um gwo nyaḵki gwo kun ṯoru ki ’twa/ mo. 28 A’di ṯoshkina Shi/in Dheleladhelel ki a’di ’boro’d mo dhali am si’da/ mmo’koki dhu um towa p̱o/ kun diṯadiṯ mo kun mini bol to gwansan gun minu mii mii mo e ki diṯ mo: 29 ki um mini dhal mii ’pen mo ’peni to kun ’ciṯẖu/ mo mmomiiya basa ’cesh mo mmoluŋ tomp̱inycon dhali ’peni miin to ma bas mo dhali ’peni to kun minyciru ’kus mo dhali ’peni mo jin miinu miinyc̱al si’da/ mo be. Waḵki/ um mini non is bum ’peni to gwansan mo tani a’di midi bor mo gom um mo. ’Koyi ki mom’bi’th is mo ma.

30 Wakan ki uni ’cuḵkunu mo tani uni p̱u’dkin ka luŋgu’b mo e Pa Anthaakiya mo dhali mmotula uni awaambuhany ’kwani is mo mmonṯal ’de/ mo tani uni ki c̱i uni gwo kun ’kwarkunu mo be. 31 Dhali ki uni deŋki a’di e mo tani uni ’kunykina bwa mo gom gwo malas yan mo be. 32 Dhala Yahuusa dhala Sila mmotana uni imanc̱i gwo si’da/ mo tani uni malaskina waḵ yan ki gwo ka ris mo dhali ṯel uni sho’k mo be. 33 Dhali ’ko’di uni ’kokin ki rash rash ari’ceenne/ mo tani uni ’cuḵkunu mo ki moŋḵu’th is ’pena waḵ yan e uni gun ṯu’cki uni ki ii mo be. 34 Hili a’di ṯoshkin ma Sila ki a’di ’boro’d mo jin mina a’di c̱a’b imun mo. 35 Hila Buulus dhala Barnaaba ’kokin mo e Pa Anthaakiya mo mmoṯor gwo mo dhali mmoc̱i gwon Tap̱a nyaḵki aris kun tiya si’da/ mo be.

36 Dhali ’ko’da cim ka hony/e mo tani aBuulus oki’da Barnaaba gwo mo ki: Dhalki ana doḵa shwane/ mo dhali ii yilkina/ awaḵ bana eya ris bampa/ ’baar ki ’beles mo kun c̱ikina ana gwon Tap̱a mo mmop̱ar uni e mo ki uni wakata mo? 37 Dhala Barnaaba e bwam piti mo tani a’di o’d ki susa Yohaan si’da/ jin yuḵu ki gwaya kamu/ ka Markus mo. 38 Hila Buulus a’di ikulumki gwo ibwa mo ki a’di diki ’bor mo mmosus a’di jin ya’d mo ’peni uni ’peni Pam Pamp̱iliyya mo mmonyaḵ ya ki uni mo a’di jin diki nyaḵ ya ki uni eya ṯu’c mo. 39 Dhali gwo jin kaaka jin wala uni piki’d mo tani a’di ḵwa/ uni bwa c̱em buni mo dhala Barnaaba suski’da Markus nyaḵki a’di mo dhali uni iikin mo eya ḵur yi’de/ jin bela ’tham mo ki bway gi Paŋ Kuprus mo be. 40 Hila Buulus kwanyki’da Sila mo dhali uni iikin mo mmodhun ma waḵ yan uni eya ’the gi Tap̱a mo be. 41 Dhali a’di yaki’d ki tur mo e Pan Suriyya mo dhali Paŋ Kilikiyya mo mmoṯel ’kwaniŋ ḵaniisa sho’k mo be.

<- MII GUN MIINU MO 14MII GUN MIINU MO 16 ->