1 Dhali shwane/ isi gom gwo jin mina Tap̱a Yesus Ḵrisṯẖos bana p̱u’du/ mo dhali goma dhana tul ’kup̱ bana jin mina ana gam a’di ’kup̱ mo tani aman yuḵkina um mo iwaḵ mo. 2 Dhalku/ ki ta uni gun mina isi la yiḵin ki jahanne/ mo eya du mo walla la dhal cuuwa/ me’d mo walla ki shi/in mo walla ki gwo mo, walla ki gwo jin ’kwarkunu mo mmo/o ki a’di ta jim bam mo mmoṯes gwo mo ka tee gi Tap̱a p̱u’dki’d mo. 3 Dhalku/ ki dhal wathin ’deŋ kamu/ bway mo mmomu’th um e ki bwaya kamu/ mo. Haala tee c̱aantan midi diki p̱u’du/ ciki/ mo isi ciki/ mo, mo jin dhalu gwo ’pen mo midi p̱u’du/ nṯwa/a/ mo dhali wathin ’de/ yin jin ush gwoŋḵan mo minu ṯor eya tente/ mo, a’di jin ta ya/ gi mo jin daḵu gwo me’d mo 4 a’di jin ceshki mo ki ŋarr mo dhali kar is piti ki ca mo ap̱owa risa rum kun yuḵu gway kan ka wuny is mo walla to jin luŋu mo, wakan a’di ki bu’th monyc̱a’b piti e gu’b gi mondheleladhelel ma Arumgimis mo mmobah gwo mo ki a’di ki is piti ta’da Arumgimis mo be. 5 ’Kona um ki ka gwo eya, ki me’d jin dikika/ e um naskina/ mo tani aha/ ṯorkina um gwo yansan mowa? 6 Dhali um mishki mo mo ki a’di jin ’tashki a’di ’twa/ mo shwane/ wakan mo ki a’di minu ṯor eya tente/ ka teem piti mo. 7 Haali/ mom’bi’th jin ta jiŋ kup̱ ’peni mo jin ushu gwoŋḵan mo di’d mo hila/ mmo/um mii mo. Hili jasi a’di jin ’tashi a’di ’twa/ mo shwane/ midi mii wakan ntaga tee jin minu bu’th a’di ’peni bway piti mo be. 8 Dhali yan’ko’d a’din ’de/ yin jin ush gwoŋḵan mo tani minu ṯor eya tente/ mo, dhali Tap̱a Yesus midi ’kosh a’di jwa mo ki shi/irr ki ’twam piti mo dhali ’ce’d a’di sho’k mo ki is piti mo jin mina a’di piyu/ mo dhali ki p̱u’d piti jin mina a’di p̱u’du/ mo be. 9 Momp̱u’d jin mina a’din ’de/ yin jin ushi gwoŋḵan ip̱u’du/ mo ki mo jin um ma Seṯaan mii mo tani midi di ka ris mom’bithi ’baar mo dhali ki jamas mii ma maḵ mo dhali momer kun ta ku ma maḵ mo, 10 dhali nyaḵka ris mo jin hekuwa he’k e mo kun ta kun thus mo gom uni gwansan kun ’kokini mo’ce’d sho’k mo haali/ uni ushki gwoŋ gana/ en mo dhali wakan ki uni minu ’taki woṯẖ mo. 11 Wakan Arumgimis a’di hashki’da p̱o/ uni adhan mo jin susuwa sus mmoper mo ’peni gwoŋ gana/ mo mmodhu uni mmogam a’di jin ta thus ki thus is mo. 12 Wakan ki uni ’baar mo minu waḵ mo, uni kun ’koki gam gwoŋ gana/ is mo, hili uni ’kola ’ce mo e momii mii kun ’koki ta kuŋ ḵar/e mo.

13 Hili am ḵara ba/ imina c̱i mo jin ’boruwa Arumgimis bwa i is mo isa yempa/ mo gom um mo iwaḵ mo, um gun enu ki Tap̱a mo, haali/ Arumgimis kwanyki um ’peni ka muŋ’kup̱ mo mmota ku gi minu woṯẖ mo e mii kun dhagamkunuwa dhagam ki Shi/in mo dhali mo jin gamkunu gwo is e gwoŋ gana/ mo. 14 E mii yan mo a’di yuḵkina a’di um mo e gwom ’borgam bam mo, wakan ki um mini bu’th monyca gi Tap̱a Yesus Ḵrisṯẖos bana mo be. 15 Wakan mo tani iwaḵ mo, doshi mo dhali ṯeli sho’k mo dhali budhi gwo kun luḵu um mo, a’di jin ṯorkunu um ki aman mo, wakan, ki gwo jin onu ki ’twa/ mo walla ki gwo jin ’kwaru mo be.

16 Dhali shwane/ dhalki Tap̱a Yesus Ḵrisṯẖos bana ki is piti mo dhali Arumgimis jin ta’da Babam bana mo, a’di jin enki ana mo dhali c̱i ana momalas jin midi di ki sule/ sule/ ya ye ’ba/ mo dhali mo ma ’teŋ kap̱eŋ gana/ ka ’the mo, 17 dhalki a’di malaski’da dum bum mo dhali ṯel uni sho’k mo eya risa ṯuca ’borga/ mo dhali gwo mo be.

<- TASALUNIIKI SU/ 1TASALUNIIKI SU/ 3 ->