1 Gwo yansan shwane/ a’di ta gwo jin ’kon ma p̱o/i su/ mo jin ’kwarkika/ um mo, um gun enu mo, dhali e uni su/ kan mo tani aha/ yiḵinkina uma du is mo e bwam bum kun dar ki washila/ mo e bway yan mo mmoka um gwo e mo, 2 ki um mini ’taki ka gwo e mo ki gwo kun onu iṯwa/a/ mo ki ’twa/ gi imanc̱i gwo ma Arumgimis kadhamo/ mo kun ḵogu mo dhali ki gwoŋḵan gi Tap̱a mo dhali Amanwoṯẖ mo e unim bum kun dhunu ki she/ mo. 3 Nṯwa/a/ ka ris to ’baar mo tani um mini mii mish gwo yansan ’ban mo ki uni kun tana maḵ ka maḵ mo mini p̱u’du/ ka tee kuŋ ’ko’d mo ka maḵ buni mo mmobaṯẖ en’dap̱ gana/ kun dhuna uni e ki ’thir ’thir mo 4 dhali o gwo mo ki: Mane gwom piti jin onu is ki a’di midi p̱u’du/ mo? Haali/ ’peni me’d jin wukina ibabam bana mo tani aris to ’baar mo ’kon mmoṯikir ’ko mo me’d mii kun ’kokina uni mo ’peni ka muŋ’kup̱ ki mo jin uḵkunu to mo. 5 Uni c̱i mii ’ko’d mo ki bwam buni mo, ki, ki gwo ma Arumgimis mo tani aris momis ’kokin kadhamo/ innii mo ba/, dhali mony’cesh uḵkunu ’peni yi’de/ mo dhali ki yi’de/ jin ta yi’de/yi 6 dhali ki a’di mo tani mony’cesh jin diki’d mo me’dyin, a’di halaskunu a’di ki yi’de/ mo dhali ’ce’d sho’k mo. 7 Hili ki gwon ’de/ mo tani aris momis dhali mony’cesh kun ’kokin mo shwane/ mo tani uni dhunu mo mmo/ish ḵumma/ mo gom mo/o’d mo, mmo’kokunu mmodhu uni mo ntaga tee jin minu tor gwon dwall ’twa/a ’cesh mo dhali ’ce’d ’kwani sho’k mo uni gun ushuna ush mo be.

8 Hili dhalku/ ki c̱i miin ’de/ yan ’ko’d mo, um gun enu mo, ki, ki Tap̱a mo tani ateen ’de/ yan wana e ki yil alip̱ mo dhali yil alip̱ mo tani a’di wana e ka teen ’de/ mo be. 9 Tap̱a a’di midi diki miiya diiṯe/ mo gom gwom piti jin ona a’di is mo me’d jin ona kun tiya ki a’di midi taya diiṯe/ mo, hili a’di thonki’da thon me’di ’ko’d mo ’kup̱ki um mo. A’di yisa ona bwa ki ṯal ’deŋ kamu/ midi ’taki this e mo, hili ka ris ’kwani ’baar mo mini ’taki jidhir mo e mo jin rijuwa du is mo be. 10 Hila tee gi Tap̱a mo tani a’di midi p̱u’du/ mo me’d wathin ’di/ mo dhali yan’ko’d aris momis mini pe mo ki dhan cuuwa/ jin minu rayu/ mo, dhali to kun ’kon e mo ma tor piti mo tani mini wa ki o’d jin c̱a’b ki wur wur mo, dhali mony’cesh yan mo dhali miim piti mo kun ’kona p̱o/ a’di mo tani minu puri ’baar mo be.

11 Haali/ me’d jin mina ris to gwansani ’baar mo wa mo wakan mo tani um mini ta ’kwani kun mini wakata ḵa ba/ mo mmomii mii kun ḵogu mo dhali mii mii ma gayiin mo 12 mmoc̱ora c̱or mo dhali gom bwa jin onu ka daran du mo goma tee ma Arumgimis mmop̱u’du/ mo, haali/ gom a’di mo tani momis minu ṯushun ki o’d mo dhali minu wa mo dhali to kun ’kon e mo ma tor piti mo tani uni minu ṯo’d ki o’d mo be. 13 Hili ki isi gwom piti jin onu is mo tani ana c̱ora momis kun ta kun this mo dhali mony’cesh jin ta jin this mo, a’di jin mina mo ma ḵar/e nyc̱a’bi cine/ mo be.

14 Wakan, um gun enu mo, me’d jin c̱orkina um gom to gwansan mo tani shwayi anyor ki thiṯẖ mo ki um minu gam e a’di mo ki dar gi monyo/o’d mo walla thalkin mo dhali um minu gam mo ki mo ma ḵu’th is mo. 15 Dhali kar mo ma thon jin thonkina Tap̱am bana ana me’di ’ko’d mo gom bway mowoṯẖ mo. Wakan si’da/ akam bana jin enu jin ta’da Buulus mo ’kwarki um gwo mo isi ki gwo ki moyuḵ jin c̱ikunu a’di mo 16 mmoṯor a’di yansan mo me’d miim piti jin miikina a’di eya ris gwom piti jin ’kwarkina a’di mo. Dhali gwon tiya kun ’kokin e uni mo tani ’bitha’bi’th mo mmomish ’ban mo, ki uni kun ta p̱us mo dhali uni kun ’konuki ṯel sho’k mo tani uni wuṯulki uni mii mo ntagi mo jin minu ’ce’d sho’k buniŋ gana/ mo be me’d jin miikina uni gom gwo ma Arumgimisa tiya kun ’kwarkunu mo. 17 Wakan um gun enu mo mmomisha um a’di nṯwa/a/ mo tani jiyi mo ki e mo isi ciki/ mo ki um minu ’koki ’de’k shoki mis mo ki gwo jin thamu mo ’peni ’kwani kun ush gwoŋḵan mii mo dhali this mom bum gana/ jin ṯela um sho’k e mo. 18 Hili ’bap̱i um mo eya ’the mo dhali e monyiṯẖ Tap̱am bana mo dhali Amanwoṯẖ jin ta’da Yesus Ḵrisṯẖos mo. E a’di mo tani monyca midi di mo ’peni shwane/ mo dhali ntaga tee jin midi di ki sule/ sule/ ya ye ’ba/ mo. Amen.

<- BUṮERUS SU/ 2