Gwo jiŋ ’Ko’d jin ’Kwar ma BUṮERUS mo

1 ASimaan jin ta’da Buṯerus mo, a’di jin ta c̱iŋkina/ mo dhali a’di jin karu ki she/ mo goma Yesus Ḵrisṯẖos mo.

E uni gwansan kun bu’thki moŋgam gwo is jin nyaḵka’d ki ji yinthom bana mo e mo ma ḵar/e ma Arumgimis bana mo dhali Amanwoṯẖ bana jin ta’da Yesus Ḵrisṯẖos mo be.

2 Dhalka ’the dhali moŋḵu’th is minu mar is mo gom um mo e monyiṯẖ jin nyiṯẖkina uma Arumgimis mo dhali Tap̱a Yesus bana mo.

3 Mom’bi’th piti jin piyi’d ’peni Arumgimis mo tani a’di c̱iki’da ris to ’baar mo e ana mo kun minu mii ta mo gom mondiki/e mo dhali mii ma gayiin mo e mo ma nyiṯẖ piti jin nyiṯẖkina ana a’di mo jin yuḵkina a’di ana mo e monyca jin ta jim pitiŋ gana/ mo dhali e miim ’borgam pitiŋ gana/ mo be. 4 E uni mo tani a’di c̱iki ana gwom piti kun onu is mo kun ta yintho/ ki yintho/ mo dhali kun eḵa/ eḵ kagahara mo, dhali ki uni gwansan mo tani ki um mini ’taki ye mo ’peni mo jin p̱u/uwa p̱u/ mo, a’di jin di’d e mony’cesh yan mo gom mo jin dhunu e ki ’thir ’thir mo, dhali ki um mini war ki imanpwaḵ buyempa jin piyi’d ’peni Arumgimis mo. 5 Haali/ gom ’kup̱ mii yan gana/ mo tani pali aris mii ki ’twaŋkal kuku/ mo mmogalal moŋgam gwo is bum is mo ki miim ’borga/ mo, dhali miim ’borga/ ki mii jin nyiṯẖuwa nyiṯẖ mo, 6 dhali mii jin nyiṯẖuwa nyiṯẖ mo ki mii ma du jin ’timu mo, dhali ki mii ma du jin ’timu mo ki mii sho’k jin ṯelu mo, dhali mii sho’k jin ṯelu mo ki mii ma gayiin mo, 7 dhali mii ma gayiin mo ki momish jin mishu ikam ka rem ’kup̱ mo, dhali mii jin mishu ikam ka rem ’kup̱ mo ki mo/en mo. 8 Haali/ waḵki/ to gwansan ta kum bum mo dhali ish ka enthus mo tani uni mini non um ’peni mii kun ushi me’d mo walla ’peni mo jin molu maman dho’th mo e monyiṯẖ jin mina umi nyiṯẖ Tap̱a Yesus Ḵrisṯẖos bana mo be. 9 Haali/ a’diyin jin midi har to gwansan mo tani a’di ta’da ja’da/ mo dhali hili’d isi shunse/ mo dhali a’di ŋaki mo mo ki a’di lamkunu mo ’peni miinthusa dhamom piti mo be. 10 Wakan iwaḵa, shwayi uma nyor ki thiṯẖ mo mmoṯe mo ma yuḵ jin yuḵu um mo dhala kwany jin kwanykunu um shoka ’cesh mo. Waḵki/ um mini mii to yan mo tani um mini ’koki ṯa’k ki sule/ sule/ mo. 11 Wakan, mo jin tanu pa ki pa mo minu c̱i um mo, a’di jin ta mo jin cic̱u mo e bampa/ gi Tap̱am bana mo dhali Amanwoṯẖ bana mo jin ta’da Yesus Ḵrisṯẖos mo, jin midi di ki sule/ sule/ ya ye ’ba/ mo be.

12 Wakan aha/ dina gwo ibwa isa yempa/ mo mmoka um gwo e mo gom to gwansan mo, ba um mishki uni mo dhali um ṯelkunu sho’k mo e gwoŋ gana/ mo jin takina um mo be. 13 Aha/ ṯosha ki a’di ’boro’d mo me’d jin c̱a’bka/ ki c̱a’b buŋgwar is yan mo mmopir um is mo ki bway jin kaka/ um gwo e mo, 14 me’d jin mishka/ ki mo jin miga/ kar buŋgwar is pem ’pen ka pije/ mo ki ’dishe/ mo me’d gwo jin ṯora Tap̱a Yesus Ḵrisṯẖos bana aha/ mo be. 15 Dhali aha/ mina hil a’di i e mo, ki ’ko’di yam pem jin miga/ ḵwa/ is bwa mo tani um mini ’taki mish to gwansan ka e mo, ma ka tee c̱aan mo be.

16 Haali/ aman ’konaki baṯẖa gany gi gwo lolop̱ kun ta ku ma maḵi sho’k mo kun lolop̱u ki lolop̱ gwocon mo, me’d jin ṯora aman um eya tente/ mo mom’bi’th mo dhali momp̱u’d jin mina Tap̱a Yesus Ḵrisṯẖos bana p̱u’du/ mo, hili aman ’kokina mmota iman/o gwo ki e mo gom mo/eḵ piti mo. 17 Haali/ ki a’di bu’thki montaḵ mo dhali monyca ’peni Arumgimis jin ta’da Baba mo dhali ’twa/ gwoyi’d gom a’di mo ki Monyca jin Eḵa/ Eḵ mo ki: Yansan ta Ya/m pem jin enu mo. Ki a’di mo tani aha/ ’bora bwa mo. 18 Aman ciḵkina ’twa/ yansan jin gwoyi’d ’peni momis mo haali/ aman nyaḵkina ’ko ki a’di mo e wosh jin ḵogu mo. 19 Dhali ana takina gi gwo jin onu is mo jin ṯenu ki nyanye/ mo be. A’di midi ’bor gom um mo waḵki/ um mini c̱iya hirdhe/ mo gom a’di yan mo me’da lamba/ mo mmo’twaḵkina a’di mo mo e bwam mondhurumi’d mo ntaga tee midi ’twaḵ mo mo dhala cul e gi mon’thamo/ ki cu mo eya dum bum mo. 20 Um mini mii mish to yan ’ban mo nṯwa/a/ mo, ki gwoŋ kamu/ jin onu isa kamu/ yisa di’da e bwaŋ Gwo ma Arumgimis jin ’kwarkunu mo jin mina wathin ṯal ’deŋ kamu/ mish ’pemen piti ṯor ki is piti a’di ’de/ mo. 21 Haali/ gwoŋ kamu/ jin onu isa kamu/ yisa di’da jin p̱u’dki’d ki bwa gi wathi/ mo, hili ’kwani mmojoc̱kina Shi/in Dheleladhelel uni mo tani uni oki gwo ’peni Arumgimis mo be.

BUṮERUS SU/ 2 ->