Gwo jin ’Kon ma P̱o/i Su/ jin Ḵwar ma YOHAAN mo
1
Monthe Me’d mo
1 Wathiŋ gwanyjaḵa/ eya yim jin kwanyu mo dhali uc̱im piti mo, uni gun enka/ e gwoŋ gana/ mo, dhali yisa jasi aha/ ’de/ mo hili aris uni ’baar mo kun mishi gwoŋ gana/ si’da/ mo 2 haali/ gom gwoŋ gana/ jin c̱a’bki’d e ana mo dhali jin midi di e ana ki sule/ sule/ mo.
3 A’the dhali momiimii mo dhali moŋḵu’th is mini ’ko e ana mo ’peni Arumgimis jin ta’da Baba mo dhali ’pena Yesus Ḵrisṯẖos jin ta Ya/ gi Com mo, e gwoŋ gana/ mo dhali e mo/en mo be.
’Koyi e Gwo ma Ḵrisṯẖos mo ma
4 Aha/ ’kunya bwa kagahara mo mmogam uc̱im pinin tiya mmobaṯẖ gwoŋ gana/ mo, me’d jin ḵankin ma Baba ana gwo mo. 5 Dhali shwane/ aha/ yuḵa /e jin tana yim mo, yisa me’d jin miga/ ’taki ’kwarki /e gwoŋḵan jin ’kwarkunu jin ta jin this mo, hili a’din ’de/ jin takina ana ’peni ka muŋ’kup̱ mo, ki ana mina en ka rem ’kup̱ mo be. 6 Dhali mo/en a’dan be ki ana mina baṯẖ gwoŋḵan piti kun ’kwarkunu mo. Gwoŋḵan jin ’kwarkunu mo a’dan be, me’d jin ciḵkina um ’peni ka muŋ’kup̱ mo ki um mini baṯẖ mo/en mo be. 7 Haali/ ’kwani ka ris kun he’kkina he’k e mo tani iikin ka pije/ mo e mony’cesh mo, ’kwani kun ’koki pi gwo mo gom mo jin yayin ma Yesus Ḵrisṯẖos ki buŋgwar is mo. A’din ’de/ gi wakan mo tani ita’da he’k e mo dhala Ḵrisṯẖos jin diki ta jiŋ gana/ mo. 8 Hili is bum ki ’bore/ mo ma ki um mini ’koki this a’di e mo a’di jin miikina um mii mo gom a’di mo hili ki um mini gam to jin c̱inu jin waki mii jin miinu mo mmo’koki ta bade/ mo. 9 Macin ’de/ jin ya’di ṯwa/a/ mo dhali diki c̱a’b e gwo ma Ḵrisṯẖos mo tani a’di diki ta ga Arumgimis mo. A’di jin c̱a’bki’d e gwo ma Ḵrisṯẖos mo tani a’di ta’d ga Baba mo dhali Ya/ mo be. 10 Waḵka cin ’deŋ kamu/ pu’dki’d e um mo dhali diki guyu/ gwo yan mo tani dhalku/ ki bu’th a’di bway gu’b mo walla dhalku/ ki c̱i a’di monthe me’d mo, 11 haali/ a’di jin theki a’di me’d mo tani nyaḵki miin tonthus piti bu’th mo be.
Ḵwalany Monthe Me’d jiŋ ’Ko’d mo
12 Ba aha/ tana gi gwo ka ris mmo’kwarki um mo tani aha/ ona bwa yisa mmo’kwarki um to ka galama risha mo, hili aha/ ṯosha mmop̱ar um e ki ’dishe/ mo dhali mmoṯora ṯor ki um ka ḵarambuye/ mo, wakan ki mom’bor bwam bana minu thim mo be.
13 Uc̱i gi ’bwah pini jin kwanyu mo tani uni theki /e me’d mo be.