1 Yansan ta me’di kwara mo jin murka/ p̱u’dku/ i um mo. E mii gunn kun yera yer is ki gway mo tani minu mii ṯe mo ki te’b ki ’twaŋ ’kwani su/ mo walla ki ’twaŋ ’kwani ikwara mo kun mini mii ta iman/o gwo mo. 2 Aha/ rumkina uni gwansan kun mii miinthus nṯwa/a/ ki gwo mo dhali aris unin tiya si’da/ mo, dhali aha/ rumkina uni ki gwo mo shwane/ me’d jin p̱ikika/ mo me’d jin miikika/ mo ki aha/ dikina i buŋ’kus mo eya p̱om buṯ pem jin ’kon ma p̱o/i su/ mo ki aha/ mina diki ’tash uni ’twa/ mo waḵki/ aha/ mina p̱u’dku/ doḵ/e mo 3 haali/ um ’kokina gwo ibwa mo mmonyo/ mii mo ka Ḵrisṯẖos a’di ṯorki gwo e aha/ mo. A’di yisa ’ka’da is ki ’ka’da e mo jin ṯu’ba a’di um mo, hili a’di ta gi mom’bi’th e um mo be. 4 Haali/ a’di ’koshkunu jwa mo ki cwany’ciṯẖan dhul mo e mo jin ’ka’da a’di is ki ’ka’d mo, hili a’di di’d ki e mo doḵ/e ki mom’bi’th ma Arumgimis mo. Haali/ aman ’ka’da is e a’di mo, hili mo jin ṯu’bu/ um mo tani aman mina nyaḵ ’ko ki a’di mo ki mom ’bi’th ma Arumgimis mo be.

5 Nyiṯẖi/ is bum mo ma, mmop̱ar e waḵki/ um shurkin mo e moŋgam gwo is bum mo. Pali is bum mo ma. ’Kona um ki nyiṯẖa ka Yesus Ḵrisṯẖos a’di diki’d e um mo – isi ciki/ ka jiŋ gana/ um ushki me’d mo mmogam mompal ’kup̱ mo be. 6 Aha/ ona bwayi ki um mini gam gwo ki aman ’konaki ta ku gun ush me’d mo be. 7 Hili aman ’thokina Arumgimis mo ki um mini ’koki mii a’di jin ta thus ki thus mo – yisa ki aman wana e gi uni gun gam mompal ’kup̱ mo ’te/, hili ki um mini mii a’di jin ta jiŋ ḵar/e mo, ba am a’di iwana e ki uni gun ushi me’d mo be. 8 Haali/ aman mina mol toŋ kamu/ mii ap̱o/ gwoŋ gana/ mo, hili jasi gom gwoŋ gana/ mo be. 9 Haali/ aman ’kunykina bwa mo ki aman ’ka’dkina is mo dhali um a’di i’bi’thkin ki ’bi’th mo. A’di jin ’thokina am mo tani ta gom miim bum jin minu nyo/ shoka ’cesh mo be. 10 Aha/ ’kwarkina gwo yansan ki aha/ si’da ’peni um mo, ki mii gi wakan ki aha/ mina p̱u’dku/ mo tani aha/ mina diki mii o gwo jin ’bitha’bi’th mo mmobu’thka/ moshirr mo a’di jin c̱ikina Tap̱a aha/ mo gom mo jin nyaŋuwa nyaŋ is mo dhali yisa mmop̱or to bwa mo.

11 Ḵwalany ’te/ ba/, iwaḵ mo. ’Koku/ ma. Ṯoki miim bum ma. C̱iya hirdhe/ ki gwom pem mo ma. Gami gwo me’d ka rem ’kup̱ mo ma. ’Koyi e moŋḵu’th is mo ma. Dhali Arumgimis gi mo/en dhali ji gi moŋḵu’th is mo a’di midi di e um mo be. 12 Theka the me’d ka rem ’kup̱ mo ma ki ’twa/ jin ḵogu jin p̱inu mo. 13 Aris uni ’baar mo kun dhunu ki she/ ki dhelel dhelel mo tani theki um me’d mo be.

14 A’the gi Tap̱a Yesus Ḵrisṯẖos mo dhali mo/en ma Arumgimis mo dhali anyaḵ jin nyaḵku to mii gi Shi/in Dheleladhelel mo tani mini ’ko e umi ’baar mo be.

<- KURINṮH̱UUS SU/ 12