1 Gwo jin ta jin ṯwa/a/ ki gwo ’baar mo tani a’dihe/ be. Aha/ ṯirrishkina aṯirrish ki gwo mo ki mo jin di’buwa di’b is mo dhali mo ma ’tho mo jin ’thonu mo dhali gwo jin woṯẖu/ is mo dhali mo jin c̱inuwa ’borim bwa i is mo minu mii mo gom ’kwani ’baar mo, 2 gom imaliḵ mo dhali gom ’kwani ’baar mo kun ’ko ’kom ’penkap̱an mo, ki ana mina ’kowa lam bana ki shwam mo dhali ki moŋḵu’th is mo dhali ki mii ma gayiin mo dhali ki ana minu tul ’twa/ ’kup̱ mo ki momaŋ mo ka ris ’twaŋkal kuku/ mo be. 3 Mii yansan a’di ’boro’d mo dhali a’di mishkunu bu’th mo e jis/e ma Arumgimis jin ta’da Manwoṯẖ bana mo, 4 a’di jin dina gwo ibwa mo goma ris ’kwani ’baar mo ki uni minu woṯẖ mo dhali mmop̱u’du/ mo mmonyiṯẖ gwoŋ gana/ mo be. 5 Haali/ Arumgimis ṯal ’de/ mo be dhali jan ’de/ di’d si’da/ jin doshki’d e bwaman ma Arumgimis mo dhali ’kwani mo, a’di jin ta wathi/ jin ta’da Ḵrisṯẖos jin ta’da Yesus mo, 6 a’di jin c̱iki is piti mo mmota to jin wani ’kwani ’baar mo ’ba/ mo. Gwonṯor gom a’di mo tani a’di ṯorkunu mo ki embul ma teem piti mo. 7 Gom a’di yan mo tani aha/ karkunu ’pen ka pije/ mo mmota amanc̱i gwo mo dhali mmota a’di jin karu ki she/ mo (Aha/ ṯora gwo ki ṯor gana/ mo. Aha/ dinaki ta aṯor mo). Aha/ tana amanṯor ’kwani kun ’koki ta ’Kwani Yahuuda/ gwo mo e moŋgam gwo is mo dhali e gwoŋ gana/ mo be.

8 Aha/ dina gwo ibwa mo si’da/ eya ris mo ’baar mo ki ’kwani mini mii ’tho mo, mmo’de’k me’d kun dhelelini mis mo ki dar ka nyor mo walla dar gi wala jin walu mo ki ṯas ṯas mo. 9 Wakan si’da/ up̱ mini nyoŋ is buniŋ gana/ mo ki dar gi mo jin minu ṯera ṯer mo dhali mmohi’th burrinye/ i is mo kun gamana gam mo kun diṯ ma po/ e mo, yisa mmoṯo’da mur kagahara mo walla mmohi’th ’dolkon gana/ i is mo walla mmohi’th dhema/ i is mo walla mmohi’th burrinye/ kun ’bitha yol she/ ki ’bi’th mo. 10 hili uni mini nyoŋ is ki miim ’borga/ mo me’d jin mina a’di ha me’d mo gom up̱ kun o gwo ki ’twa/ mo ki uni tana gayiin mo gom ji gi luŋu mo. 11 Dhalka ’bom da/ar mii mo mmoc̱a’b ki shwam mo dhali c̱a’b ki c̱a’b ’ko’d me’di ’baar mo. 12 Aha/ dinaki dhala ’boma kamu/ bway mo mmota amanṯor gwo mo walla mmota gi moshirr ap̱o/ ’kwaniŋ gwas mo. Ayim midi mii c̱a’b ki shwam mo. 13 Haala Aadam a’di ta a’di jin uḵu nṯwa/a/ mo dhala Hawwa ŋ’ko’d mo. 14 Dhala Aadam yisa ihe’kkunu eya, hila ’bom a’di ihe’kkunu e mo dhala yim warki’d ka mandhaŋ gwo mo be. 15 Hila ’bom minu woṯẖ mo ki mo jin dhodhu uc̱i mo waḵki/ ayim midi rash di mo e moŋgam gwo is mo dhali e mo/ena en mo dhali mii kun dheleladhelel mo dhali mii kun miinu ki dar gi mii ma ṯer mo.

<- ṮIMUṮH̱AWUUS ’DE/ 1ṮIMUṮH̱AWUUS ’DE/ 3 ->