1 Haali/ me’d mii gi wakan mo tani aḴrisṯẖos ’koshkina is ka nyor e shuman is mo tani thosoni is bum mo ki gwon ’de/ mo mmokulumi bwa mo, haali/ a’diyin jin ’kosha is ka nyor mo e shuman is mo tani a’di daḵki miinthus mii mo, 2 wakan mmo’ko mo gom mo jin boc̱o’d mo naskina/ e shuman is mo yisa mmodoḵ/e dhu e ki ’thir ’thir ki e gi ’kwani en’thi/ mo, hili ki bwa ma Arumgimis mo be. 3 Hili dhalka tee yin jin yaki’d ki jim pe mo ’kosh jwa mo mmomii me’d mii kun miikina ’kwani kun ’koki ta ’Kwani Yahuuda/ mo mmo’kokina uni e mii kun ’kanuwa ḵanthi/ mo dhali e mii gun dhunu e ki ’thir ’thir mo dhali e mo jin ’kosh ma suwa ’kosh mo dhali e mii kun waluwa wal e moŋ’kup̱a su mo, dhali mmomii ki ra’b mo e mo ma su mo dhali e mii kun luŋu tomp̱inycon mo kun ’kona gwoŋḵan ki dhal bway mo. 4 Uni wunyu/ is shwane/ mo ki um ’koki gam mii me’d ki uni mo e miin ’de/ jin ’baara uni mo ki ’twa/ mo e mii gun miina uni ki ra’b mo, dhali uni sorki um mo. 5 Hili uni mini c̱i gwo e a’di mo, a’di jin thosonki is mo mmodwall gwo mo gom uni kun ’kon ki e mo dhali kun wukin mo be. 6 Haali/ gom gwo gi wakan mo tani a’di c̱inu gwom ’borga/ yan mo isi kani gom uni gun wukin mo, ba ki uni dwallkunu gwo mo e shuman is mo me’d ’kwani mo tani uni mini ’taki ’ko ki e mo e shi/in mo me’da Arumgimis mo be.

7 ’Pemen ma ris to gwansani ’baar mo tani p̱u’dkin hila/ mo be. Wakan dhuyi adum bum ki ’bore/ mo dhali ḵuthi is ki ’cese/ ’cese/ mo goma ’thom bum jin mina umi ’tho mo. 8 Ap̱owa ris mii gwansani ’baar mo tani buthi/ mii ki ri’d mo mmo/ena en ka rem ’kup̱ mo jin diki ush me’d mo, haali/ mo/en a’di kumki’da ris miinthus kun dhukunu ka maḵamp̱o/ ’twa/a ’cesh mo. 9 Boṯi ki mii jin minu ta gu’b bum ŋal mo ki dar ga gumgum ka rem ’kup̱ mo. 10 Me’d ’kwani ’baar ka ’deṯe/ ’deṯe/ mo kun bu’thki to kun c̱inu ki me’d mo tani bu’thki a’di mo mmomii to mo gom tiya ka rem ’kup̱ mo me’d imandhuwa ’the ma Arumgimis ki she/ ki she/ mo kun ta kum ’boron mo. 11 A’diyin jin oki gwo mo tani me’d a’din ’de/ yin jin baḵki gwoŋḵan ma Arumgimis mo. Dhali a’diyin jin mii to e mo jin miinu to mo tani me’d a’din ’de/ yin jin mii to mo ki mom’bi’th jin thip̱ ma Arumgimisa thip̱ mo. Ki mii gi wakan mo tani eya ris to ’baar mo Arumgimis minu kar ki ca mo eya Yesus Ḵrisṯẖos mo be. E a’di mo tani monyca cila a’di mo dhali mo jin tanu tap̱a mo gom ’pemen ki sule/ dhali ki sule/ ya ye ’ba/ mo. Amen.

12 Um gun enu mo, dhalku/ ki ta ku gun minu wuny is mo e mii kun ’batha’ba’th mo me’d o’d mo jin p̱u’dki’da p̱o/ um mo mmonyo/ um mo, me’d toŋ kamu/ jin molu mo jin mii um mo be. 13 ’Kunyi bwa mo isi me’d jin pwaḵkina um isa nyor ma Ḵrisṯẖos mo tani ki um si’da/ mina bwa ’taki ’kuny mo dhali ’bor mo, ki monycam piti minu ṯor eya tente/ mo be. 14 Waḵki/ um waḵu mo gom gway ma Ḵrisṯẖos mo tani um ’borkunu mii mo, haali/ Shi/in gi monyca mo dhali ji ma Arumgimis c̱a’bki’da p̱o/ um mo be. 15 Hili dhalku/ ki dhal jan ṯal ’deŋ kamu/ ’peni bwam um mo mmo’kosh is ka nyor mo me’d a’di jin ’koshki’da mee mo, walla me’d a’di jin ḵwalki’da ’di/ mo walla me’d a’di jin ṯẖu’th to mii mo walla me’d a’di jin shwan ma pipi anyor mo. 16 Hili waḵki/ jan ṯal ’deŋ kamu/ ’kosha is ka nyor mo me’d a’di jin ta’da Ḵrisṯẖiyan mo tani a’di mina is diki mii ’theya ’the mo, hili e bwaŋ’kwariny gway yan mo tani dhalki a’di kara’da Arumgimis ki ca mo. 17 Haali/ mo p̱u’dki’d mo gom gwon dwall mo mmoṯel ’pen ’peni uni gun tana ṯa/ ma Arumgimis mo. Dhali waḵki/ a’di ṯelu ’pen ki ana mo tani ’pemen midi ta ata mo gom uni gwansan kun ’koki ha gwom ’borga/ ma Arumgimis e mo? 18 Dhali me’d gwo jin ’kwarkunu mo ki: