BUṮERUS ’DE/ 3

Shush Mii jin Miina Up̱ kun Mashu mo dhali Ikaṯẖ mo

1 Wakan si’da/ um up̱a, ’dap̱i ’twa/ mo e ikaṯẖim bum mo, wakan ki kun tiya mo, ba kun tiya yisa ha gwo eya, uni minu ’taki gama du is ki dar gi gwo mo goma nyoŋ is gi i/ashim buni mo 2 ki uni mini p̱ar miim bum jin ṯuka uma ṯu’k is e mo dhali miin dhelelga/ mo gom mii kun nyoŋuwa nyoŋ mo. 3 Hili dhalku/ ki dhal miim bum mmota ji ma p̱or ma pije/ mo gom tom bum kun hidha um i is mo ka mur jin ṯo’du mo, dhali mmonyoŋ ’dolkon gana/ mo dhali hi’th burrinyem p̱o/ mo, 4 Dhali hili dhalki a’di ta’da ciŋ kamu/ jin bagu mo jin ta’da du mo ki wosh dhel jin moli p̱u/ mo jin ta shi/in jin ’thup̱a e mo dhali jin di’d ki shwam mo, a’di jin ta yintho/ ki yintho/ mo e bwambori jis/e ma Arumgimis mo. 5 Wakan ’thissa/ up̱ kun dhelelin mo, uni kun tan ga ’teŋ kap̱e/ eya Arumgimis mo tani nyoŋki is buni mo dhali ’dap̱ ’twa/ mo e gwo gi ikaṯẖim buni mo, 6 me’da Saarah mmohakina a’di gwo ma Ibrahiim e mo dhali yuḵ a’di ki tap̱a mo. Dhali um shwane/ mo ta uc̱i ma yim mo waḵki/ um mini mii mii ki ’bore/ mo dhali mmodiki dhal toŋ kamu/ bway mo mmodee um is mo be.

7 Wakan si’da/ um gwaṯẖa, ’koyi ki isi ’kom pa mo nyaḵki up̱ bum mo, mmoc̱i montaḵ goma ’bom mo me’d jin ’ka’da isa yim mo ki buŋgwar ma yim mo, haali/ um nyaḵki mal buthi mon’de/ mo ka ’the ki mondiki/e mo, ki mii gi wakan mo tani ka ’thom bum kun ’thona um mo tani minu ’koki ’taki non ’kup̱ mo be.

’Koshi Is ka Nyor ma gom Gway Mii ma Ḵar/e mo

8 Ḵwalany ’te/ be. Aris umi ’baar mo, tayi gi mo jin gamu gwo me’d e shi/in mo, dhali ḵoci e mo, dhali eni iwaḵ bum mo, dhali tayi ka duŋ ’ka’dga/ mo dhali bwa kun dhunu ki gwa’d mo. 9 Dhalku/ ki raḵ tonthusi bway mo gom tonthus mo walla dhalka sor ki raḵi bway mo goma sor jin soru mo. Hili ap̱o/ mii yan ki c̱a’ckon mo tani ’boriya ’bor mii mo haali/ gom mii yan mo tani um yuḵkunu mo ki um mini ’taki bu’th mo jin ’boruwa ’bor mii mo be. 10 Haali/ me’d gwo jin ’kwarkunu mo ki:

A’di jin midi ’taki en mondiki/e mo

dhali p̱ar ateem ’borga/ e mo tani

dhalki a’di noni’da le’d piti ’peni tonthus mo

dhali ’twam piti ’peni mo jin onu gwo ma maḵ mo.

11 Dhalki a’di ṯu’kki’d mo ’peni tonthus mo dhali mii miim ’boro’d mo

dhali dhalki a’di simm moŋḵu’th is e mo dhali ur a’di isho’k mo.

12 Haali/ e gi Tap̱a a’di di’d ap̱o/ uni gun mii miiŋḵar/e mo

dhali ’cem piti ḵa’dkina a’di mo gom mon’thom buni mo be.

Hili bwam/e gi Tap̱a diki’da p̱o/ uni gun miiki tonthus mo.

13 Dhali kaja di’di mmoshi/ um mo waḵki/ um shwana miiŋ gana/ anyor ki thiṯẖ mo? 14 Hili isi kani waḵki/ um ’kosha is ka nyor mo gom gway gi mii ma ḵar/e mo tani um minu ’bor mii mo be. Dhalku/ uni ki ḵo/ mo walla dhalka du ki mur mo, 15 hili eya dum bum mo tani tuḵi aḴrisṯẖos me’d Tap̱a mo. Isa yempa/ mo tani um mini thoson is mo mmota iman’ce’d gwo she/ mo gom ma gom ’kwani gunn kun yuḵki um mo mmoc̱i gwo goma ’teŋ kap̱e/ jin di’d e um mo, hili miiyi a’di ka du jin ’thup̱u e mo dhali ka tuḵ jin tuḵu/ mo. 16 Dhali dhuyi ’twa/ ma dum bum ki dhelel dhelel mo, wakan waḵki/ um minu ’taki sor mo tani uni gwansan kun sorki um mo goma nyoŋ bum jin nyoŋa um is ki ’bore/ mo eya Ḵrisṯẖos mo tani uni minu dhu ki mo ma ’the is mo be. 17 Haali/ a’di ’boro’d ki ’bor gana/ mo mmo’kosh is ka nyor mo gom miiŋ gana/ mo waḵki/ a’di midi ’taki ta bwa ma Arumgimis mo mmobol mii jin ṯẖudhu mii e mo. 18 Haala Ḵrisṯẖos a’di wuki’d mo si’da/ gom miinthus mo me’d ’de/ mo gom ’kwani ’baar mo, a’di jin ta’da ḵar/e mo wuki’d mo gom uni kun ’koki ta ḵar/e mo, ki a’di midi ’taki sus ana eya Arumgimis mo. A’di karkunu mo mmowu mo ki buŋgwar is gi shuman is mo, hili a’di karkunu ki e mo e shi/in mo. 19 E a’di jin yakina a’di mo dhali c̱i gwo e shi/in kun ’kon eya sijin mo, 20 uni gun ’koki ha gwo e ’thissa/ mo, me’d jin ’kuc̱kin ma Arumgimis bwa ki ’kari’th mo mmoc̱ora c̱or ka tee ma Nuuh mo, me’d jin dikina a’di mmonyaŋa dhana ḵur mo, a’di jin ’kokina ’kwani ki daḵa/ icine/ mo, uni gun ’koni jasi pekwara mo, uni a’di itakunu is ki me’d ’peni yi’de/ mo be. 21 Mo ma cuc̱ jin cuc̱u/ jin ’dap̱a’d ki gwo yan mo tani a’di woṯẖki um shwane/ mo, yisa me’d mii jin ḵalkunuwa dihar ka pije/ ’peni buŋgwar is mo, hili me’d isi ’kup̱ jin yip̱kunu eya Arumgimis mo gom ’twa/ ma dun dhelelga/ mo ki mompi ma Yesus Ḵrisṯẖos mo, 22 a’di jin cic̱ki bway momis mo dhali a’di jin diki’d ka bim poros ma Arumgimis mo nyaḵki aris iman’doyu gwo mo dhali ki moshirr mo dhali mom’bi’th kun ’dap̱ki ’twa/ ki a’di mo be.

<- BUṮERUS ’DE/ 2 BUṮERUS ’DE/ 4 ->