1 Dhali isi gwo gom tonṯe/ jin thenu tomp̱inycon mo tani ana misha ki ana ’baar mo tana gi monyiṯẖ yani ’baar mo. Monyiṯẖ jin p̱e’di mis mo hili mo/en a’di nyaŋki’da nyaŋ mo be. 2 Waḵki/ jan ṯal ’deŋ kamu/ ta’d gi gwalal mo mmo/o ki a’di mishi toŋ kamu/ mo tani a’di yisa mishki’d naskina/ to jin mina a’di ’taki mish mo ḵa ba/. 3 Hili waḵki/ jan ṯal ’deŋ kamu/ enki’da Arumgimis mo tani a’di ta jan ṯal ’de/ jin mishu ki a’di mo be.

4 Isi gwo gom tonṯe/ jin shwanu jin thenu tomp̱inycon mo tani ana misha ki aris tomp̱inyconi ’baar mo ’koki ta to gun ’ko ki ’ko ’koŋ gana/ mo, dhali kan mo tani Arumgimisa kamu/ yisa di’da jasi a’di ’deŋ gana/ mo be. 5 Haali/ bala arisa rum kun yuḵu gway kan ka wuny is mo tani uni ŋala/ p̱elena kun ’kon e momis mo dhali e mony’cesh mo. Isi kan ka jiŋ ganayi arisa rum ŋala/ p̱elena dhali amariny tap̱a mo tani 6 hili gom ana mo tani Arumgimis ṯal ’de/ mo a’di jin ta’da Baba mo dhali ’peni a’di mo tani aris to ’baar mo ’kokin mo dhali gom a’di mo tani ana ’kokina mo, dhali Tap̱an ’de/ mo jin ta’da Yesus Ḵrisṯẖos mo dhali e a’di mo tani aris to ’baar mo ’kokin mo dhali e a’di mo tani ana ’kokina mo be.

7 Bahili, aris ’kwani ’baar mo yisa tan gi monyiṯẖ yan mowa. Hili kun tiya mmo’kokina uni isa dhamo/ mo ntagi shwanesan mo mmoboṯki mii mo mmoluŋ tomp̱inycon mo tani uni shwaki tonṯe/ mo me’d a’diŋ gana/ jin thenu tomp̱inycon mo, dhali ’twa/ ma dum buni mmo’ka’dkunu uni is mo tani shi/kunu mo be. 8 Tonṯe/ midi diki mish ana sus eya Arumgimis mo. Ana minu mii ki shi/ yisa waḵki/ ana ’konaki shwa a’di mo dhali ana minu ’bor mo yisa waḵki/ ana ki shwa a’di mo. 9 Hili miim pini i e ki ’bore/ ’te/ mo isi ciki/ mom pini jin dina /e ki ’kus kan mo midi ’taki war ki mo jin gola /e agol mo gom a’diŋ kamu/ jin ’ka’da is mo. 10 Haali/ waḵki/ wathiŋ kamu/ ki p̱ar /e e mo, /e jin ta wathi/ jin nyiṯẖki to mo, mmoc̱a’ba /e eya tharabeesa e gu’b gi luŋu tomp̱inycon mo tani mina a’di mii diki raḵ is piti mo waḵki/ bwan ’twam piti ’ka’da is mo mmoshwa tonṯe/ jin thenu tomp̱inycon mowa? 11 Dhali wakan gom monyiṯẖ pini mo tani wathi/ yansan jin ’ka’da is mo tani a’di ’ce’dkunu sho’k mo be, a’di jin ta’da akan jin wun ma Ḵrisṯẖos mo be. 12 Wakan miinthus jin miikina /e ap̱o/ iwaḵ pini mo dhali mmodhuna /e jama/ e ’twa/ ma dum buni mo ki uni ’ka’da is mo tani /e miiki miinthus ap̱owa Ḵrisṯẖos mo be. 13 Wakan waḵki/ tonṯe/ raḵki’da kam pem mmobiṯ mo tani aha/ mina diki shwa a’di mo isi ciki/ ki aha/ mina diki raḵa kam pem mmobiṯ mo be.

<- KURINṮH̱UUS ’DE/ 7KURINṮH̱UUS ’DE/ 9 ->