1 Dhalka aris ’kwani ’baar ka ’deṯe/ ’deṯe/ mo ibuḵ ana ka pije/ mo ki ana itana c̱iŋkina/ ma Ḵrisṯẖos mo dhali imandhu to mo gom gwo ma Arumgimis jin c̱inu mo ki jim bag mo. 2 Bakata ’te/ a’di itheke’thkunu gwo mo gom imandhu to mo ki uni minu gam mo ki uni mini ta uni kun ta isiŋ gana/ mo. 3 Hili, ki aha/ mo tani a’di ta ari to jin gwa’da’d mo ki aha/ minu ’taki ’koki pal mo ki um mo walla ki gwon dwall gi wathi/ en’thiŋ kamu/ mo. Aha/ dinaki dwall isi is pem gwo mo si’dayi. 4 Haali/ aha/ mola toŋ kamu/ nyiṯẖ ap̱o/ is pem mo. Hili ki a’di wakan mo tani aha/ dinaki di ki dar gi mii ’ba/ mo. A’di ta Tap̱a jin nyiṯẖki aha/ mo be. 5 Wakan dhalku/ ki c̱i ’twa/ gwon dwall nṯwa/a/ ka tee mo, nṯwa/a/ ki Tap̱a diki p̱u’d mo, a’di jin midi dhu aris to ’baar mo e moŋkush mo, aris to kun diḵu ’kup̱ shwane/ mo e mondhurumi’d mo. Dhali a’di midi thisa dum pa ṯor mo. Dhali yan’ko’d aris ’kwani ’baar ka ’deṯe/ ’deṯe/ mo mini bu’th ’twa/ maŋ ’peni Arumgimis mo be.

6 Aha/ dhukina ris gwo gwansan gom is pem si’da/ mo dhala Abulluus si’da/ gom gway bum mo kun tana waḵ mo ki um si’da/ mini da/ar ’peni aman mo mmo’ko mo me’d isi gwo ma Arumgimis kun ’kwarkunu mo, ki jan ṯal ’deŋ kamu/ ’peni um mo midi diki p̱e mii i is mo ap̱owa kamuŋ kamu/ mo. 7 Haali/ aja a’di jin hilki to gunn kun ’ko ki she/ e um mo? Ata tana um mo waḵki/ um ’konuki c̱i to mo? Dhali yan’ko’d waḵki/ a’di bu’thkina um mo tani atinta dhuna um ’ba/ ki ca mo me’d waḵki/ a’di diki ta to jin c̱inu ki me’d mo?

8 Um ’tu’dkunu mo hila/ mo be. Um ta ’kwani kun ta pa ki pa mo hila/ mo be. Ki dar gi aman mo tani um waran ki imaliḵ mo. Dhali aha/ onayi ki um mini jiya ji moyi. Wakan ki aman mina ’taki nyaḵ tap̱a ta ki um mo. 9 Haali/ aha/ ṯosha ka Arumgimis a’di dhuki aman mo ki uni kun dhunu ki she/ mo mmota kuŋ ’ko’d mo me’d ’kwani kun toru gwo ’twa/a ’cesh mo mmowu mo. Haali/ aman takina businye/ gom ’kwaniny’cesh mo dhali gom iman’doyu gwo mo dhali gom ’kwani mo be. 10 Aman takina p̱us mo gom gway ma Ḵrisṯẖos mo be, hili um a’di iyuḵayuḵ eya Ḵrisṯẖos mo. Aman ’ka’dkina is mo. Hili um a’di i’bi’thkina is mo. Um a’di ishumkunu mo ki montaḵ mo. Hili aman iwaḵkunu mo be. 11 E mo yansan shwane/ mo tani aman ’koshkina ṯe/ mo dhali bu’thkina yi’de/ mo. Aman hatha to hi’th ’ko’d mo dhali ḵaŋkamkina is ki ḵaŋkam mo gom mondor mo dhali aman dara gi gu’b mo be. 12 Dhali aman miikina aṯu’c mo mmomiiya ṯu’c ki me’d bam gana/ mo. Ki aman sorkunu mo tani aman ’bora ’bor mii mo. Ki aman ṯo’ckunu bwa mo tani aman ’dimkina ’kup̱ mo be. 13 Ki aman yerkunu is ki gway ki gwonthus mo tani aman malaskina gwo mo. Aman warkina mo dhali shwane/ wa e ka duhal gi ’kwaniny’cesh mo dhali aman wana e ki to jin dhi’thkunu aris to nyo/o’di ’baar mo be.

14 Aha/ dinaki ’kwar gwo yansan mmodhu um ki mon’the is mo, hili mmorum um ki gwo mo me’d uc̱im pem kun enka/ ki mo/en gana/ mo be. 15 Haali/ um bala tanki imanshu um bway ki gwo mo kun wana risa eya Ḵrisṯẖos mo. Dhali um yisa tanki ibabam bum ka ris yisa. Haali/ aha/ wara ka babam bum eya Ḵrisṯẖos jin ta’da Yesus mo ki gwom ’borga/ mo be. 16 Aha/ yip̱a ’kup̱ ’kup̱ ki um mo wakan ki um mini ta imanthoḵ aha/ mii mo be. 17 Wakan a’di ihashkika/ uma Ṯimuṯẖawuus mo, ya/m pem jin enka/ ki en gana/ mo dhali a’di jin ta’da a’cim pem jin ta isiŋ gana/ e Tap̱a mo, a’di jin midi rogom um ki gwo mo gom miim pem eya Ḵrisṯẖos mo me’d jin ṯorka/ uni gwo mo eya ris mo ’baar mo eya ḵaniisa ki she/ ki she/ mo be. 18 Kun tiya dhu ’ba/ ki ca mo me’d jin oka/ ki aha/ mina diki yaku/ i um mo. 19 Hili aha/ mina yaku/ i um ki ’dishe/ mo waḵki/ a’di ta bwa gi Tap̱a mo dhali aha/ mina nyiṯẖ mom’bi’th gi ’kwani gwansan kun dhu ’ba/ ki ca mo, yisa gom gwom buni ’te/. 20 Haali/ Bampa/ ma Arumgimis mo tani diki ta gom gwo mo hili gom mom’bi’th mo be. 21 Um ’kona gwonta ibwaye? Miga/ yaku/ i um ki cwa jin doruwa dor mowa? Walla ki mo/en e shi/in gi moŋkar bwa ki gwa’d mo?

<- KURINṮH̱UUS ’DE/ 3KURINṮH̱UUS ’DE/ 5 ->