1 Waḵki/ aha/ mina o gwo ki ’twa/ gi ’kwani mo dhali ki ’twa/ gi iman’doyu gwo mo tani ihili aha/ dara gi mo/en mo tani aha/ gwona is ’te/ me’da sahan gurany ’per mo walla me’da sahana shu e mo jin tiri’d ki nyanye/ mo. 2 Waḵki/ aha/ tana gi mom’bi’th mo mmo/o gwo is mo dhali mmomisha ris gwo ’baar mo kun ta gwo kun baku ’ban mo dhali aris yuḵ mo si’da/, dhali waḵki/ aha/ tana gi moŋgam gwo isi ’baar mo, wakan mmomish joc̱ wosh kun turatur mo tani ihili aha/ dara gi mo/en mo tani aha/ tana toŋ kamuwa? 3 Waḵki/ aha/ c̱ina tom pemi ’baar mo kun taka/ mo dhali waḵki/ aha/ pisha is pem ki o’d mo mmopur mo tani ihili aha/ dara gi mo/en mo tani aha/ ḵala toŋ kamu/ ’kup̱ paa?

4 Mo/en a’di ta moŋ’kuc̱ bwa mo dhali momii ki bwaŋkush mo. Mo/en ta mii mmoṯa’c bwa mo yisa walla mmokar ’ba/ ki ca mo yisa. 5 A’di yisa kar is ki ji gi mish to mo yisa walla mii mii jin mantharamandhar yisa. Mo/en diki ses mo mmomii a’di jin o a’di bwa mo. A’di diki shwa mii ki o’d mo walla push gwo shi/i’d eya du mo. 6 A’di yisa ’kunya bwa mo gom tonthus gun thamu mii mo yisa, hili a’di ’kunya bwa mo gom mii kun miinu ki miiŋ gana/ mo be. 7 Mo/en a’di dininki’da ris to ’baar mo she/ mo, a’di gama’da ris gwo ’baar mo is mo, a’di ta’d ga ’teŋ kap̱e/ gom to ’baar mo, a’di ’dim ’kup̱ gom to ’baar mo.

8 Mo/en midi diki wu ’kup̱ mo. Me’d gwo jin onu is mo tani a’di midi pe mo. Me’d gwo jin onu ki ’twaŋ ’kwani mo tani uni mini daḵ mo. Me’d gwo gi yuḵ mo tani a’di midi pe mo. 9 Haali/ monyiṯẖ bana mo tani a’di aṯẖa ’ban mo dhali gwom bana jin ona ana is mo tani a’di aṯẖa ’ban mo be. 10 Hili ki a’dim ’borgaŋ gana/ midi p̱u’du/ mo tani a’di jin aṯẖa ’ban mo tani midi pe mo be. 11 Ki aha/ tana a’ci mo tani aha/ ona gwo mo me’da ’ci mo, aha/ kulumkina gwo ibwa mo me’da ’ci mo, aha/ miina mii me’da ’ci mo. Ki aha/ wara ki wathi/ mo tani aha/ dhalkina mii ma ’ci ’pen mo. 12 Haali/ shwane/ to p̱arkina ana e eya hiljaro/ jin duḵaduḵ mo tani, hili yilaŋ kamu/ ka ḵarambor mo. Shwane/ ’bana kamu/ mishka/ mo. Hili yilaŋ kamu/ mo tani aha/ mina mish ’bani ’baar mo, isi kani me’d jin mishkunu aha/ ’bani ’baar mo be. 13 Wakan moŋgam gwo is mo dhali mo ma ’teŋ kap̱e/ ’dap̱an ki me’d mo ki mo/en mo, uni kwara gwansan mo. Hili a’di jin ca’d ki caŋ gana/ mo mmobol gwoho e mo tani a’di ita mo/en mo be.

<- KURINṮH̱UUS ’DE/ 12KURINṮH̱UUS ’DE/ 14 ->