LIPE ORA SIRIMU 5

1 Pe na kanorundu kinie ye nomi kingimunge polona molorumu yemo yunge ki umbukundu boku panga teli te lerimu kanorundu, akumunge olakondo maniekondo pea imbi mare molopa, wale yepoko pakara wakaye lelko tambu siringi. 2 Kanorundu kinie angello enge nili te molorumu kanumuni tondolo ru nimbelie nimbendo: “Yambo nae molopa konjilimomone boku wakaye lelko tambu siringime manda wendo limbeye?” nirimu. 3 Nakolo mulu koleana kepe mana kepe mana sukundu kepe yambo tene manda wendo lipe, sukundu imbi molorumuma manda kanomba yambo te molopa paa konjilimo yambo te naa molorumu. 4 Kanu kinie yambo molopa konjipelie manda bokumu wendo lipe kanomba yambo te naa molorumumunge kanopolie na kola aisili terindu. 5 Kanu kinie ye nomi wane paono po moloringimenga tene nando nimbendo: “Kola naa téa! Pilie! Juda Talapemonga Lopa Posi LLayono,* ye nomi kingi Depisini kalopa lirimu yemo,** yuni enge nimbe opa toumu ⸤kamu⸥ topa manie mundurumu. Ye akumu molopa paa konjilimomone boku wakaye leli yepoko pakara manda wendo lipe sukundu kanomba.” nirimu.

6 Kanu kinie na kanorundu kinie Kongi Sipisipi Walo* te ⸤angilirimu⸥ kanorundu. Yu kongi sipisipi toko konjiku nosilimele mele yu aku sipe molopa, yu ye nomi kingi polona ai suku singine angilirimu. Mele konde mololi kise kinie** ye nomi wane paono po kinie yu liku sukundu munduku ene molko makaye teringi. Yunge pengena ola kongi kao ungú mele yepoko pakara wendo omba angilipe, mongo yepoko pakara angilirimu, kanu mongoma Pulu Yemo yunge mini yepoko pakara yuni ma koleamanga pali lipe mundurumu akuma. 7 Kanu Kongi Sipisipi Walomo yu omba ye nomi kingi polona molorumu yemonga ki umbukundu lerimu bokumu lirimu. 8 Lirimu kinie mele konde mololi kise kinie ye nomi wane paono po kinie yunge kumbikerena manie puku tamalu peringi. Ene yu mele mele gita mele mare ambolko, pellete kou gollone teli, akuna paura kaloringi kinie mune paa torumu pauramo peko lepili amboloringi.* Aku paurama Pulu Yemonga yambomanga pali Pulu Yemo popo toko mawa telemele unguma. 9 Enene konana konde te ningulie ningindu:

“Nu toringi kinie

yambo ungu lupe lupe lelime kinie,

kangi lupe lupe angililime kinie,

talape lupe lupema kinie,

kolea lupe lupe molemelema kinie,*

nunge mememone

Pulu Yemo kinie tapu toko molonge aulkemo

akisinjirinu** akumunge

nuni boku manda liku wakaye lelime wendo lini.

10 Nuni ‘Kanu yamboma olionga Pulu Yemonga

kongonomo tenjengi!’ ningu

‘Pulu Yemonga popo tonjili yambo*

Pulu Yemo enenga ye nomi kingimu molopa

ene nokomba yambo talapemo molangi!’

ningu terinu,** akumunge

ene ye nomi kingime molko

ma koleana melema nokoko molonge.”

niringi.

11 Pe kelepo kanorundu kinie angello paa aisili ungu niringi unguma pilirindu. Angelloma kambu tolemelkanje tausini kelepo olandopa tausini nimbu, milliono kelepo olandopa milliono nilimelka. Akuma ye nomi kingi polomo kinie mele konde mololi kise kinie ye nomi wane paono po* kinie liku makaye teko sukundu munduku moloringi.

12 Aku angellomane tondolo mundukulie ningindu:

“Sipisipi Walo ou toko konjiringimundu

yambomane pali ningindu:

“Yu yamboma nokomba tondolomo kinie

yu kamako molomba mele aisili kinie

pilipe konginjilimu kinie engemo kinie

yu kinie pepa kapola tepa,

yunge imbimu paa ola molopa,

tondolo pa telimu yu kinie pelemo.” ningu

yu ange ningu kapi ningí kinie* papu.”

niringi.

13 Kanu kinie mulu koleana molemele melema kepe, mana molemele melema kepe, mana sukundu molemele melema kepe, nomu kusana molemele melema kepe, koleamanga pali molemele melemane niringi mele pilirindu. Enene ningindu:

“Ye nomi kingi polona molemo yemo kinie

Sipisipi Walomo kinie eltendo:

“ ‘Molko konjengili!’ nimbu alieli kapi nimbu

imbimu paa olandopa molopa,

tondolo pa telimu kinie

yamboma nokomba tondolomo kinie

kamu kamu elte kinie pepa mindi pulimo pumbe.”

nimbu molamili!”

niringi. 14 Aku niringi kinie mele konde mololi kisene ningindu: “Paa aku sipe wendo opili!” niringi. Ye nomi wane paono pone manie molko tamalu peko kapi ningu eltenga imbi ambolko ola linjiringi.

<- LIPE ORA SIRIMU 4 LIPE ORA SIRIMU 6 ->