1 Biyukele ambolko angilieringi angellomanga kise pakera sipemone yunge biyukelemo ungu sirimu kinie kombukandipi te mulune mundupe siye kolopa mana manie omba lierimumu kanorundu. Kanu kombukandipimu*Yembo marene pilkulie ‘IKombukandipimu mulu koleana angello te Pulu Yemonga ungumu lipe su sirimu angellomo.’ ningu pilimele; inie 9:11* kananila. mana manie kowa-muru te paa lepa mindi pupe naa pora nilimomonga[b] kerepulu kimu sirimu. 2 Aku kowa murumunge kerepulumu omba ki lsimu kinie kuli tepe nombalie ilie telemo mele murune paa awili tepa ilie wendo ombalie ena kinie mulu kinie pipi sipe sumbulu tondorumu. 3 Kanu iliena suku kuli-kumbe paa awisili wendo wendo ongo ma koleana ongo moloringi. ‘Pilimu kerena tomo pepili yembo nolemo kinie mindili nolemele mele‡Sike pilimu naa nirimu. Mele nirimumu Kewa ungune ‘Sikopiana’ nilimolo akumu yunge alini yemboma tolemo kinie paa mindili awili teko nolemele kepe, walse walse kolemelela. Pikisa ya kanani. aku sipe aku kuli-kumbemanga aline§inie 9:10. tomo pepili yemboma topili.’ nirimu.

4 Kuli-kumbemando nimbendo: “Unjo kepe era kepe mana molemo melemanga gomoma naa nangi. Pulu Yemonga makomo yembo tenga mambele naa molomba yemboma mindi*inie yakondo 7:1-8. nangi.’ nirimu. 5 ‘Yemboma toko kondangi.’ nimbe tondolomo naa sirimu. ‘Nonge kinie oli kise pakera mindili nongo molangi.’ nimbe tondolomo sirimu. Kanu kinie pilimuni yembo tolemo kinie mindili nolemele mele kuli-kumbemane yembo toringi kinie yemboma aku siku mindili awili teko nongo moloringi. Nalo pilimuni nolemo kinie mindili nolemele akumu laye teko nolemele. Ne kuli-kumbemane noringi kinie paa mindili awili teko noringi. 6 Aku ulumu wendo ombá kinie mindili nonge yembomane “Paa kolamiliya!” ninge nalo kololi ulu pulumu kowa pumbe naa kolonge. Mindili nongo mindi molonge.

7 Kuli-kumbema kanorundu kinie ami yema opa tengendo kongi otena pulimele kongi ote none telime kanorundu. Kuli-kumbemanga pengena kou-gollone teli ye nomi kingime pakolemele wanie mele pakoko, enonga kumbikerema yembo kumbikere none terimu. 8 Enonga penge indime paa sulu pupe,†Giriki ungune “Ambomanga penge-lapise mele tepa”. enonga ungúme lopa-posi llayono ungú none terimu. 9 Ami yema opa tengendo wale-pakoli kapane telime luwine pakolemele mele kanu kumbemanga olona aku sipe none tepa, opa tengendo kongi otene karo kundupe lkisipe omba pulimo kinie ungu nilimo mele aku sipe enonga poume ungu nirimu. 10 Kanu kuli-kumbemanga aline kale-nili mele angilipe yembomanga kangine tonge kinie tomomo aline pepalie kangine sukundu pumbe kinie oli kise pakera mindili nongo molonge tomomo sirimu. 11 Kuli-kumbema nokorumu ye nomi kingimu kowa-muru lepa mindi pupe pora naa nilimo murumu‡Yando 9:1 nilimo mele akumu angello te liemo iangellomo lupenje? nokolemo angello kerimu, kanumunge imbimu Ipuru ungune ‘Apadono’ ningu, Giriki ungune ‘Apolliono’ nilimele. ⸤Aku unguselonga pulumu ‘Melema Pali Topa Kondolimu’.⸥

12 ⸤Kera iliakamone “Umbune yepoko wendo ombá.” nirimumunge⸥§inie yakondo 8:13, anjokondo 11:14. umbune te ipora nirimu. Talo we perimuselo pe wendo ombá terimu.

13 Biyukele ambolko angilieringi angellomanga talo pakera sipemone yunge biyukelemo ungu sirimu kinie ungu te wendo orumu pilierindu. Paura-keku mune tolime kaloringi polo kou-gollone telimu Pulu Yemonga kumbikerena lierimu akune ola kongi kao ungú mele kise teko mimi teko anjeringi*inie yakondo 8:3, anjokondo 14:18. akune kanu ungumu wendo orumu pilierindu. 14 Akumuni angello biyukele ambolorumumundu nimbendo: “Angello kise no awili Yuperetisi ka siku panjeringi akume wendo liku mundou.” nirimu. 15 Kanu kinie ‘Ponie imunge, oli imunge, wale imu kinie, ena mongo imunge yemboma owe toko yepoko teko, owe te toko kondangi.’ nimbe mako topa ka sipe panjerimu angelloma wendo lipe mundorumu. 16 Ami ye kongi ote bulu mingine ola moloringimenga kambumu pilierindu mele isipe: tu anderete milliono.

17 Kongi otema kinie otemanga bulu mingine moloringi yema kinie kanorundu mele isipe: ‘Luwine mera naa molopili.’ ningu wale-pakoli kapane telime pakoringi akume mare kondolime pakoko, mare mukume pakoko, mare kanie telime pakoringi. Kongi otemanga pengema lopa-posi llayono pengema none tepa, tepe kinie ilie kinie kou-sallapa tepene noli kinie†We-iliemo kumu tolemo. Kou-sallapa akumunge iliemo mongona paa pupe, nomi paa lipe mundumongona pulimo. Kou-sallapa ungu mare anjokondo 14:10, 19:20, 20:10, 21:8 molemo. akume enonga keremanga wendo orumu. 18 Yemboma owe toko yepoko tekolie, kongi otemanga kerena umbune sili mele yepoko wendo orumumene owe tenga yemboma toko kondoringi.‡Itemanemonga pali “owe topa yepoko tepa, owe tenga umbune wendo orumu.” nilimo kanumu koleamanga palindu waka-maka nilimo. Papua Niu Gini kepe owe topa yepoko tepa owe te, yembo kondolimenga koleama akula tepa, kolea Aperika keme, Amerika keme, Yuropo keme, Rasia keme akula temba. 19 Kanu kongi otemanga engema enonga kerena kinie aline kinie perimu. Enonga alime yembo nomba kondoli kongi ka wambiye mele, akumenga pengemane yemboma toko mindili siringi.

20 Umbune wendo orumumene toko naa kondoringi we moloringi yemboma aku umbunema wendo orumu kinie kepe kini teko kenjeringi ulume kanoko keri naa kanoko konopu alowa naa teringi. Kurume popo toko, kou-gollo kinie kou-sillipa kinie kou-barase kinie kou kinie unjo kinie akumene melema kini teko mimi teko anjiku, kanu mele mongone naa kanoko ungu manda naa ningu aulke manda naaandoringi akume ‘Olionga pulu yema’ ningu popo toringi melema munduku siye naa koloringi.§Konana 115:4-7, 135:15-17. 21 Yembo toko kondoko, tomo ambolko, meambu liku, wa ulu kerinele teko, melema wa nongo, aku ulu teko kenjeringime kepe pali*Gallesia 5:19-21. munduku siye kolko konopu alowa naa lateringi.

<- LIPE ORA SIRIMU 8LIPE ORA SIRIMU 10 ->