2 Pulu Yemo kinie paa alieli ungu ningu siye naa kolko, ⸤Pulu Yemo kinie ungu ningendo⸥ umbu-konopu pepili ⸤Pulu Yemo kinie ungu ningu⸥,*Ungu wale talo pala ⸤ ⸥ akune sukundu molemo mele sikenje? Pisini ungune aku sipe molemo. Giriki ungune ungu ponjipe “Mimi siku kanoko molangi.” molo “Mimi siku pilku molangi.” molo “Umbu-konopu pepili molangi.” nimbe aku sipe mindi molemo akumu nambolkamondo nimbe nikimunje? Ya molemo mele nimbendo nikimunje, molo “Setene ombá . Mimi siku kanaa.” nimbendo nikimunje, molo nambolka nimbendo nikimunje? Pilipe konginjeli yembomane kepe mimi siku naa pilku kerepale ningu molemele. Ungu pulu te Mateyu 26:41 molemonje? Paa kana. Pulu Yemo kinie “Ange” ningu molangi. 3 Pulu Yemo kinie ungu ningu molkolie olionga kepe mawa tendekolie, “Olio yunge temane peangamo andopo topo siemili aulke te akisindepili.” niengi. Aku temanemo Kirasinge temanemo, akumu ou lopi tepa perimu kanumu. Aku temanemo topo siliomonga na ka ulkena pelio.†Epesasi 6:19-20; ungu pulu te Epesasi 1:9*. 4 Pulu Yemo kinie nanga mawa tendekolie “Kirasinge temane lopi tepa perimumu yemboma paa sumbi siku piliengi nimbu para sipu kondambo.” niengi. ‘Na aku sipu kongono teambo.’ nimbe Pulu Yemone sirimu ⸤kene aku tendangi⸥.

5 Kirasinge yembo talapena naa molko ulsukundu molemele yemboma eno Kirasinge yembo molemelemane kanoko kondoko aulke andoko, Kirasinge ungumu kanu yemboma ningu singendo aulkemo mimi siku kanoko, aulke te mona lemba kinie kanokolie ungumu eno piliengi sumbi siku ningu siengi. 6 Eno ungu ningu singema alieli api mele songo tepili. Waka kolko ‘Paa piliemiliya.’ ningu komu tendenge ungu peangama niengi. ‘Yembomane walsinge kinie olione ungu peangama topondopo niemili.’ ningu aku siku teangi.

7 Olio paa konopu mondolemolo angenu Tikikasi‡Epesasi 6:21, Lipe Mundorumu Yema 20:4. ⸤ombá kinie⸥ na molio mele pali eno temane topa simbe. Yu Awilimunge§bokumunge alsena anjokondo “6. Bikpela”. kongono paa tendepa siye naa kolopa, olio kinie pea tapu topo telemolo yemo. 8 Yu aku sipe olio kinie pea tapu topo kongono telemolomonga ‘Olio molemolo mele eno piliengi! ‘Eno konopu tondolo pupe pe nipili molangi.’ nipili.’ nimbu nane yu eno molemelena lipu mundukuru. 9 Eno Kollosi yembomanga ye Onesimasi, olionga konopu mondolemolo angenumu kongono paa tepa kondopa siye naa kolemo yemo, yu Tikikasi kinie pea lipu mundukuru. Ya olio molemolona ulu wendo olemoma pali eno ningu singele.

10 Na pea ka ulkena pelembolo ye Arisitakasini “Eno manda molemeleye?” nimbe, nimbe mundukumu. Banapasinge pelepa*Mako sike Banapasinge pelepa, molo angenunje, naa pilimolo. Mako ⸤ya tapu topo molemolo yemone⸥ “Eno manda molemeleye?” nimbe, nimbe mundukumula. (Mako-kinie eno tenge mele ou nimbu mundorundu†Sike Pollone kanu ungumu ⸤pep topa⸥ nimbe mundorumunje, molo nawene nirimunje, naa pilimolo. kanumu. Eno molongena omu liemo “Pea molamili ou.” niengi.) 11 ⸤Ye te, yunge imbi⸥ Yesusi, aku yemo yunge imbi te “Jasitasi” nilimele, aku yemone “Eno manda molemeleye?” nimbe mundukumula. Pulu Yemo ye nomi kingi molopa melema nokombamonga‡bokumunge alsena anjokondo “20. kingdom”. nimbu silio kongonomo na liku tapondoko pea telemele yembomanga aku yema mindi Juda yema.§bokumunge alsena anjokondo “18. katim skin”. Kanu yemane ‘kongono tondolo mundupu teambo.’ ningu paa liku tapondolemele.

12 Epaparasi, eno Kollosi yembomanga ye te, yuni kepe “Eno manda molemeleye?” nimbe, nimbe mundukumu. Yu Kirasi Yesusinge kongono tendeli ye te molopa, Pulu Yemo kinie ungu nimbéndo siye naa kolopa alieli enonga nimbe tondolo mundupe mawa tendepalie “Eno Kirasinge yembo yume molko, ‘Sike.’ ningu tondolo munduku pilku molemele mele konopu alowa malowa naa teko Pulu Yemo kanopa peanga kanomba ulu “Teaa.” nilimoma pilku liku tengendo tondolo munduku teko molangi.” nilimo. 13 Yuni enonga kepe, LLadosia taono yembomanga kepe Irapollisi taono yembomanga kepe, ‘Eno lipu tapondambo.’ nimbe paa kongono mindili sipe telemo ‘akumu eno paa piliengi!’ nimbu nikiru.

14 Olionga konopu mondolemolo ye doketa LLukuni “Eno manda molemeleye?” nikimula. Ye Dimasini aku sipe nikimula.

15 Olionga angenu LLadosia taonona molemelema kinie ambo Nimba kinie Kirasinge yembo talape[i] yunge ulkena maku toko molemele yemboma kinie “Eno manda molemeleye?” nindengi.

16 Eno Kollosi yemboma ipepámo piliengi kambu tondoko pora singe kinie ‘Kirasinge yembo talape LLadosia taono molemelema kanoko piliengi!’ ningu liku mundengi. LLadosia yemboma pepá topo sindumu ‘Olio kanamili yando siengi.’ niengila.

17 Akipasindu i siku ningu siengi: “Nu Awilimunge kongono ‘Tendei.’ ningu siringimu ‘Paa pali tepo pora siembo.’ ningu tondolo munduku tei.” niengi.

18 Na Pollo nanu ipepámo topo “Eno manda molemeleye?” nikiru.

Na ka ulkena we pelio mele komu naa sindengi.

⸤Pulu Yemone⸥ eno we kondo kolopa molopili molangi.

⸤Aku pea nikiru.⸥

<- KOLLOSI 3