POLLONE PEPÁ TOPA MUNDORUMUMA
(Romo, U-Korini, Pe-Korini, Gallesia, Epesasi, Pillipai, Kollosi, U-Tesallonaika, Pe-Tesallonaika, U-Timoti, Pe-Timoti, Taitasi, Pillimono)
Pollone Pepá Topa Mundorumumanga Ungu-Pulu Se
‘Pollo molopa serimu mele piliambo.’ ninguli Pillipai 3:3-11, Pe-Korini 11:22-29, 12:1-10, Gallesia 1:13-24, U-Timoti 1:12-16, Lipa Mundorumu Yema 22:1-21, 26:1-23 kanani. Yuni ‘Pulu Yemonga kongonomo sambo.’ nimba Karasinga yomboma u mindili silipa andorumu (Lipa Mundorumu Yema 7:58, 8:1,3, 9:1-2,13-14). Pe konopu topele topa Yesusi omba molorumu mele kepe, olionga nimba senderimu mele kepe, kiniá olio nokolemo mele kepe “Sika.” nimba kuru mondopa Karasinga yemo molopa, yunga kongonomo andopa serimu semanemo Lipa Mundorumu Yema 9:1 pulu polopa molemo. Pe yu Yesusinga ungumu andopa nimba, “Yesusi yu sika Pulu Yemonga Malo, yu ye nokoli Karasimu. Yu-mambele Pulu Yemone olio kanopa peanga pilimba aulkamo. Mosisini sirimu ungu-manemane unguri naa sembá.” nirimu kinia yu mindili siringila (akumunga ungu mare Lipa Mundorumu Yema 9:16,22-25,28-30, 14:19-20).
Yesusini lipa mundorumu ye wemane Karasinga Juda yomboma mindi nokoko unguma ningu siringi-na-kolo Pollo koleamanga pali andopa Karasinga ungumu Juda yombo naa molko yombo-lupa moloringi yomboma nimba sirimu (Lipa Mundorumu Yema 9:13-14, 18:6, 22:21, Gallesia 1:15-17, 2:2,8). Aku serimumunga Juda ye marene yu-kinia mumindili kolkole toko kondonge seringi kinia Romo ami-yemane yu Jerusalleme ka siku panjikuli, pe Sisaria mengo pungu panjiku, pe kamu Romo mengo pungu ka siringi (Lipa Mundorumu Yema 21:27—28:16,30). ‘Kolea-awili Romo kalia-ingi talo molopale, kelepa ka-ulkana ultu pumba Romo mundupa kelepa kolea marenga kalia-ingi mare kelepa andopa semane peangamo topa sirimula (Kiriti kepe, Girisi kepe, Sipéne kepe purumu.’ ningu pilielemele; Taitasi 1:5, 3:12, Romo 15:24,28).
U pumba ungumu nimba sirimu kinia konopu topele toko Karasinga yomboma moloringima pe walte walte pepá topa mundorumu. Pepá topa sirimu mare mania purumunje, kiniá naa lemó. Mare mania naa purumuma i boku UNGU-KONDEMOnga sukundu molemo. Pepá se topa simbando alieli u kumbi lepa yunga imbi topa yombo talapemanga imbi torumu, bokumanga yu-mele-mele kolomongo-awili wane, kolomongo-kanga wane (1:1) kanani. Bokumanga yu-mele-mele pulu polopa torumumanga kumbi lepa ungu-pulumu torumulu molemo, akuma kananila.
Pollone pepáma torumumanga ungu-pulu mare ya pora nikimu.
ROMO Pollone ROMO Yomboma Pepá Topa Mundorumu Bokumu I Pepá Topa Mundorumumunga Ungu-Pulu Mare Pollo yuyu kinia yuni pepá topa sirimumanga ungu-pulu mare inia yakondo nondopa gomo 676 molemo. Pollo yuni i bokumu pepá topa Romo yomboma sipa mundorumu akumu Romo 1:1,7 nimba silimú. Romo akumu kolea Italli kolea-awilimu, ya Papua Nu Gini sukundu kolea-awili Mosipi mele. Romo yemane andoko yombo talape lupa lupamanga kolea awisili toko kalkole koleama kinia yomboma kinia tondolo munduku nokoringi. Pe Yesusi kinia Pollotolo moloringili kinia Romo-gapomanomone aku-sipa Mediterenia Nomu winju mendo anju yando koleama pali nokorumu. Kanu walemanga kolea-awili Romo kanu koleamanga pali kolea-awilimu. Pollone pepámo torumumunga ungu-pulu se i-sipa: Yu u Romo naa pupili yuni ‘Romo paa pambo.’ nimba molopale i pepámo topa sirimu (Romo 1:8-15, 15:22-29). Ungu-pulu se: Yesusini “Nanga kongonomo sende-paa.” nimba lipa mundorumu ye se u Romo pumba Karasinga yomboma Karasi yunga ungumanga pulumu u naa ningu siringimunga Pollone pepá topa nimba sirimu, akumunga i bokuna sukundu olio Karasinga yomboma sumbi sipu molomolo mele ungu tondolo peangama molemo. Ungu-pulu se: Juda yomboma kinia kepe, Juda yomboma naa moloringi yomboma kinia kepe, Pulu Yemone ‘Yomboma nokomba ye se lipu mundumbu.’ nimba, nimba taltorumu ye nokoli Karasi akumu Juda yombomanga mindi nimba naa lipa tapondorumu. Ultukundu yombomanga mindi nimba naala lipa tapondorumu. Juda yombomane u pilku seringi mele manda naa lipa tapondorumu. Ono pali ulu-pulu-kiri konopuna peli yomboma. Yesusi Karasi yu-mambele ononga pali Pulu Yemone yomboma sumbi siku molonge kanomba aulkamo (Romo inia 1:14-17, 3:21-24,27-30, 6:23, 14:1-8,17-18). Pulu Yemone yomboma aku-sipa lipa tapondorumumunga ono seko molonge mele nimba sirimula (12:1—15:13). Ungu-pulu mare boku ambolkonomonga pealemekondo i-siku kanani: “8. bilip”, “45. stretpela man”, “18. katim skin”, “2. arapela lain” . Ya ungu-pulumu pora nikimu.
1Kolomongo-Awili 1-4 Pulu Yemo Kinia Malotolo “Sika” Nimbu Kuru Mondolemolo Aku Ulumuni Mindi Pulu Yemone Olio Kanopa ‘Yombo Sumbi Nilima’ Nimba Kanolemo Aulkamo Akisindilimú Ungu Se 1:1-7 Yesusini “Kongono Sende-Paa.” Nimba Lipa Mundorumumunga Pollone Aku Kongonomo Serimu Mele Nimba Sirimu Ungu Se 1 Na Pollo, Karasi Yesusinga kongonomo sendeli kendemande-yemo, yuni ‘Nanga kongonomo sende-pu.’ nimba na lipa mundupa, ‘Pulu Yemonga semane peangamo ningu siliku andou.’ nimba taltorumu yemo molopole ⸤ono Romo yomboma⸥ i pepámo topo sikiru, 2 kanu semane peangamo koronga-u ⸤Yesusi mana naa opili⸥ Pulu Yemone ‘wendo ombá’ nimba, nimba panjipa, yunga ungu-umbu tondorumuma pilku yomboma ningu siringi yemane ‘bokuna molopili tangi.’ nirimu kinia yunga boku kake sélimu toringi molemo semane peangamo. 3 Kanu semane peangamo Pulu Yemo yunga Malo, olionga Ye-Awili Yesusi Karasimunga semanemo. Yu ye nokoli kingi Depitini kalopa liltimu yombomane meringi yemo. 4 ‘ ‘Yu Pulu Yemonga ye kake sélimu.’ ningu kanangi.’ nimba yu toringi kolorumu kinia Pulu Yemo yunga tondolomone yu yombo-óno-koleana topa makisinderimu-na lomboropa ola molorumu aku tondolomone yu Pulu Yemonga Malo molorumu mele ‘kanangi.’ nimba Pulu Yemone lipa ora sirimula. 5 Yesusi Karasini serimumunga Pulu Yemone ‘Yesusinga imbi ola molopili.’ nimba olio we kondo kolopa olio ‘yunga kongonomo sende-paa.’ nimba lipa mundorumu kongonomo semolo tondolomo sirimu. Aku kongonomo i-sipa: Koleamanga pali yombomane ⸤ ‘Yesusi sika Pulu Yemonga Malo. Sika olio lipa tapondomba.’ ningu⸥ kuru mondokole yuni “Saa.” nilimú unguma pilku liku senge kongonomo andopo semolo. 6 ‘Koleamanga pali yomboma’ nikiru akumu ⸤ono Romo yomboma i pepámo topo sikirumu⸥ onondo pea nikiru. Ono pea Pulu Yemone nimba taltopa ‘Yesusi Karasinga yomboma molangi waa.’ nirimu yomboma.7 Ono Romo yomboma Pulu Yemone konopu mondopa, ono nimba taltopa ‘Yunga yombo kake selima molangi waa.’ nirimu yomboma nane i pepámo ono topo sikiru.
Olionga Lapa Pulu Yemo kinia Ye-Awili Yesusi Karasitolone ono we kondo kolko, ‘Ono konopu pe nipili taka leko molangi.’ niengili. 1:8-15 Pollone ‘Romo Yomboma Kano-Pamboa!’ Nirimu Ungumu 8 U nane onondo nikiru: Ono Yesusi Karasi ‘Sika.’ ningu kuru mondolemele mele ma-kolea pali yombomane semane toko silimilimunga nane Yesusi Karasinga imbi mangilipu nanga Pulu Yemo kinia “Ange.” nikiru. 9-10 Nane Pulu Yemo kinia ungu niliu kinia alieli nane ono nimbu pilipuli ono kepe ⸤ ‘tondolo pupili molangi.’ nimbu⸥ Pulu Yemo mawa sepo nimbu molio mele nanga tondolomane pali yunga kongonomo mindi tondolo mundupu sepo yunga Malonga semane peangamo andopo topo siliu aku Pulu Yemo mangilkuli “Sika Pollone nu-kinia olionga nimba mawa sendelemonje?” ningu mangilielemolánje yuni “Sika aku sendelemo.” nilka. ‘Na ono molemelena wambo.’ nimbu ‘Pulu Yemone aulka se lipa sipili.’ nimbu alieli tondolo mundupu yu mawa sepo moliola.11 ‘Ono ⸤ ‘Karasi sika.’ ningu pilielemele yomboma⸥ kamu kuru mondoko konopu tondolo pupili molangi kene Mini Kake Sélimuni ono sewi anjipa molko kondonge ulu-pulu mare sipili kene ono lipu tapondambo pea molamili wamboa!’ nimbu aku sipu mawa sepo molio. 12 ‘Nane kuru mondolio ulumuni ono lipu tapondambo. Onone kuru mondolemele ulumuni na liku tapondangi. Aku semolo kinia na kepe ono kepe olio pea kuru mondolemolo mele paa tondolo pupili.’ nimbu pilipuli ‘Paa wamboa!’ nimbu molio. 13 Ango-keme, nane wale awisili ‘ono molemelena kanambo wamboa!’ konopu lelio-na-kolo u aulka se naa lepa ulu wendo olemomane na pipi silimú, aku konopu lepo molio mele ‘kiniá paa piliangi.’ nimbu ono nimbu sikiru. Na kolea lupamanga andopo yomboma ‘Pulu Yemonga bolangoma molangi.’ nimbu lipu tapondolio mele ‘aku sipu ono kepe molemele mele tondolo pupili lipu tapondambo.’ nimbu ‘paa wamboa!’ nimbu molio.
14 Giriki yomboma kinia we-yombo-lupama kepe, pilipa kondoli pelemo yomboma kinia we-umbu-konopu pelemo yomboma kepe, akupokonga pali kongono sendeli kendemande-yemo Pulu Yemone ‘molani.’ nirimu-na naa sembó kinia manda naa sembá. 15 Akumunga ono Romo yomboma kepe ‘semane peangamo topo siembo.’ nimbu tondolo mundupu pilipu molio.
1:16-17 Semane Peangamo Pulu Yemone Yomboma Lipa Tapondolemo Tondolomonga Ungu Se 16 Aku semane peangamonga Pulu Yemone yomboma lipa tapondopa mindili nolemolá aulkana wendo lipa yu-kinia pea molko kondonge aulkana lipa mondolemo tondolomo pelemomonga na semane peangamo topo simbundu pipili naa kololio. Juda yomboma kumbi lepa, we-yombo-lupama kinia pea, akumanga yomboma ⸤ ‘semane peangamo sika’ ningu⸥ kuru mondolemele yomboma pali i semane peangamone lipa tapondolemo. 17 Pulu Yemone yomboma kanopa ‘Yombo sumbi nilima.’ nimba kanolemo mele aku semane peangamone lipa ora silimú kanumu. Olio alieli ‘Sika.’ nimbu kuru mondolemolo kanu ulumuni mindi Pulu Yemone olio ‘yombo sumbi nilima’ nimba kanolemo. Pulu Yemonga bokuna ungu se molemo akumuni aku sipa nilimúla. Akumu i-sipa: ‘Yombo sene ‘sika’ nimba kuru mondomba yombomo Pulu Yemone kanopa ‘yombo sumbi nílimu’ nimba kanomba yombomo mindi konde molopa kondopa mindi pumbá.’ nilimú. 1:18-32 Pulu Yemone Yomboma Kinia Pali Mumindili Kololemomonga Ungu Se 1:18-23 Yombomane Pali Pulu Yemo Bulu Siringimunga Ungu Se 18-19 Pulu Yemo yu molemo mele yuyu ono lipa ora silimú-na yombomane manda mona kanonge akumunga yuni mulu-koleana kanopa molopale yu bulu siku ulu-pulu-kiri selemele yomboma aku selemelemonga ono kanopa kiri pilipa ono umbuna simba selemo mele lipa ora silimú. Aku selemelemonga onone ungu-sikamo toko mania mundulimili. 20 Pulu Yemone mulu matolo serimu kinia kepe yandopa yandopa méle serimuma pali yombomane kanolemele akumunga yunga alieli pepa mindi pulimú tondolomo kinia yu yuyu ulu-pulumu pelemo mele kinia mongomane naa kanolemele uluma kanokole pilielemele. Yuni serimu mélemane lipa ora silimú kanolemele akumunga yuni ‘ono mongo liltingi kene mindili nangi.’ nimbá kinia onone ‘naa pilierimulu.’ manda naa ningí.21 ‘Pulu Yemo sika molemo.’ sika niringi-na-kolo ‘Yu Pulu Yemo’ ningu yunga imbi ambolko paka tondoko kape ningu yu-kinia “Ange.” naa niringi, ono konopu naa pepa amu mele toko konopuma simbulu topili moloringi. 22 ‘Olio pilipa kondoli paa pelemo.’ sika nilimili-na-kolo ono konopu naa peli yomboma molko, 23 Pulu Ye alieli molopa mindi púlimu popo naa toko, munduku kelko, kolali seko mana-yomboma kinia kera kinia wambiye kinia we-méle-takara mélemanga pali none selima manda manjiku seko anjiku ‘Olio nokolemele pulu yema’ ningu popo toko kape niringi.
1:24-32 Yombomane Ulu-Pulu-Kiri Lupa Lupa Awisili Seringimunga Ungu Se (1:18-32 pali) 24 Aku siku Pulu Yemo kinia seko kinjeringimunga yuni nimbale: “Manda, ono konopu kirimane kundupa memba purumu kinia ulu-pulu-kiri awisili seko wa ulu-kirinale kinia ononga kangima onono seko kinjiku, aku selemele mele we yakala kolko seko molangi.” nimba siye kolorumu. 25 Pulu Yemonga ungu-sikamo munduku kelko kolali seko kolo toli ungumu konopu mondoko ‘piliamili.’ ningu, Pulu Yemone serimu mélema liku anjiku ‘aku mélemane olio nokolemele pulu yema’ kolo toko ningu popo toko kape ningu, mélema pali serimu Pulu Ye sikamo, yunga imbi alieli ambolko paka tondolemolánje papu, aku Pulu Yemo munduku kelieringi. Mélema pali serimu Pulu Yemonga imbi paa sika ‘alieli ola mindi molopili.’ nimbu ambolopo paka tondamili.26 Aku seringimunga Pulu Yemone ‘ono ulu kirima we yakala kolko seko molangi.’ nimba ono siye kolorumu. ⸤Akumunga⸥ ambomane yema-kinia selemolá mele naa seko ambomane amboma-kinia onono seringi. 27 Aku sipa mele yemane kepe amboma-kinia konopu mondoko selemolá mele munduku kelko, yema-kinia onono konopu mondoko seringi. Yemane yema-kinia pipili seli ulu kirima seringimunga ononga ulu seko kinjeringimanga méle kalolima lingí.
28 Ulu seringimunga ungu se pelemóla, akumu niembo: ‘Pulu Yemo sika molemo mele naa pilipu molomolo kinia unguri mólo.’ niringi akumunga Pulu Yemone ‘Ulu paa kirima konopuni pilingí konopuma mindi pepili yombomane manda naa pilku selemolá mele we seko molangi.’ nimba siye kolorumu.
29 Ononga konopumanga ulu-pulu-kiri lupa-lupa awisili perimumunga onone ulu kirima seko, méle awisili taltolemelema kanoko yakala kolko ‘Liemboa!’ konopu leko, yombo mare-kinia wa ulu-kirinale seko, aku uluma mindi seko molemele. Yombo se méle awisili taltolemomo kanoko kiri pilku, yomboma toko kondoko, ‘Yomboma-kinia taka lepo molamili.’ naa ningu irinale seko, kolo toli uluma seko, yomboma-kinia konopu kiri panjiku seko kinjiku, aku uluma sengendo mindi konopu kimbu siku molemele. Onone yombomanga ungu-bulkundu nindiku, 30 “Yombo sene ungu se i-sipa nimu.” ningu kolo toko, Pulu Yemo kinia konopu kiri panjiku, yombomando ungu kiri awisili ningu, mongo kondoko, ononga imbima ambolko paka toko, kála seko, ulu-pulu-kiri mare konde toko sengendo konopumane pilku ‘i-sipu samili.’ ningu seko, anupili lapalini ungu nilimilima naa pilku liku seko ononga unguma pilku mokoli seko, 31 ononga konopu peanga se naa pepili molko, ulu se ‘aku sipu samili.’ ningu panjikuli naa seko, ononga genupili lapali yomboma konopu naa mondoko, we-yomboma kondo naa kolko seko kinjiku, aku selemele. 32 Pulu Yemonga ungu-mane sumbi nílimuni ‘Yombomane aku uluma selemelema paa kolonge.’ nimba molemo ungu-manemo sika pilielemele-na-kolo onone ta ningu ulu-pulu-kiri akuma we seko molemele. Akumu mindi mólo. Yombo aku ulu-pulu-kirima seko molemele yombomanga imbima ambolko paka tondoko kape nilimilila.
ROMO 2 ->
7 Ono Romo yomboma Pulu Yemone konopu mondopa, ono nimba taltopa ‘Yunga yombo kake selima molangi waa.’ nirimu yomboma nane i pepámo ono topo sikiru.
11 ‘Ono ⸤ ‘Karasi sika.’ ningu pilielemele yomboma⸥ kamu kuru mondoko konopu tondolo pupili molangi kene Mini Kake Sélimuni ono sewi anjipa molko kondonge ulu-pulu mare sipili kene ono lipu tapondambo pea molamili wamboa!’ nimbu aku sipu mawa sepo molio. 12 ‘Nane kuru mondolio ulumuni ono lipu tapondambo. Onone kuru mondolemele ulumuni na liku tapondangi. Aku semolo kinia na kepe ono kepe olio pea kuru mondolemolo mele paa tondolo pupili.’ nimbu pilipuli ‘Paa wamboa!’ nimbu molio. 13 Ango-keme, nane wale awisili ‘ono molemelena kanambo wamboa!’ konopu lelio-na-kolo u aulka se naa lepa ulu wendo olemomane na pipi silimú, aku konopu lepo molio mele ‘kiniá paa piliangi.’ nimbu ono nimbu sikiru. Na kolea lupamanga andopo yomboma ‘Pulu Yemonga bolangoma molangi.’ nimbu lipu tapondolio mele ‘aku sipu ono kepe molemele mele tondolo pupili lipu tapondambo.’ nimbu ‘paa wamboa!’ nimbu molio.
14 Giriki yomboma kinia we-yombo-lupama kepe, pilipa kondoli pelemo yomboma kinia we-umbu-konopu pelemo yomboma kepe, akupokonga pali kongono sendeli kendemande-yemo Pulu Yemone ‘molani.’ nirimu-na naa sembó kinia manda naa sembá. 15 Akumunga ono Romo yomboma kepe ‘semane peangamo topo siembo.’ nimbu tondolo mundupu pilipu molio.
21 ‘Pulu Yemo sika molemo.’ sika niringi-na-kolo ‘Yu Pulu Yemo’ ningu yunga imbi ambolko paka tondoko kape ningu yu-kinia “Ange.” naa niringi, ono konopu naa pepa amu mele toko konopuma simbulu topili moloringi. 22 ‘Olio pilipa kondoli paa pelemo.’ sika nilimili-na-kolo ono konopu naa peli yomboma molko, 23 Pulu Ye alieli molopa mindi púlimu popo naa toko, munduku kelko, kolali seko mana-yomboma kinia kera kinia wambiye kinia we-méle-takara mélemanga pali none selima manda manjiku seko anjiku ‘Olio nokolemele pulu yema’ ningu popo toko kape niringi.
26 Aku seringimunga Pulu Yemone ‘ono ulu kirima we yakala kolko seko molangi.’ nimba ono siye kolorumu. ⸤Akumunga⸥ ambomane yema-kinia selemolá mele naa seko ambomane amboma-kinia onono seringi. 27 Aku sipa mele yemane kepe amboma-kinia konopu mondoko selemolá mele munduku kelko, yema-kinia onono konopu mondoko seringi. Yemane yema-kinia pipili seli ulu kirima seringimunga ononga ulu seko kinjeringimanga méle kalolima lingí.
28 Ulu seringimunga ungu se pelemóla, akumu niembo: ‘Pulu Yemo sika molemo mele naa pilipu molomolo kinia unguri mólo.’ niringi akumunga Pulu Yemone ‘Ulu paa kirima konopuni pilingí konopuma mindi pepili yombomane manda naa pilku selemolá mele we seko molangi.’ nimba siye kolorumu.