1 Kanu-kinia Yesusi ⸤Pulu Yemo popo toko kaloringi⸥ ulka-tembelena ultu pumbá purumu kinia yu lombili andolimanga ye sene yundu nimbale: “Ungu Mane Sili Yemo, tembelemonga ulka lupa lupama kinia, ulkama takoringi kou peanga lupa lupama kanou.” nirimu. 2 ⸤Aku nirimu kinia⸥ Yesusini yundu nimbale: “Ya ⸤tembelemonga⸥ ulka lupa lupa peanga gilimú kanokomelema, pe ⸤walte ya kolea-awili Jerusalleme yomboma mindili nonge walemo wendo ombá kinia⸥ i tembelemonga ulkama pali sikisikuli kouma pali toko mania mundungí.” nirimu.

3 Kanu-kinia yu ma-pangi Unju Ollipi Kaliana ola pumba ⸤Pulu Yemo popo toko kaloringi⸥ ulka-tembelena welkendo mania molorumuna we-yomboma naa molangi ⸤yu lombili andoli ye mare⸥ Pita keme, Jemisi keme, Jono keme, Enderu keme ono ongo, ono onono molkole yundu mangilku pilku ninguli: 4 “Nuni nikinu mele sewale wendo ombáye? Pe nuni i nikinu uluma nondopa wendo ombándo u nambolka unguri sembá kinia olio kanopole ‘Uluma i wendo ombá sepomo.’ nimbu pilimulúye? Olio ningu si.” ningu mangilieringi kinia

5 yuni onondo nimbale:

“⸤Kanu uluma wendo ombámonga ungu mare⸥ yombomane ono kolo toko singí kene kanoko kondoko molangi. 6 Ye awisili ongo na molio mele yu-mele-mele kolo toko ninguli: “⸤Pulu Yemone ‘Nanga yomboma nokopa kondomba ye se lipu mundumbu.’ nimba taltorumu ye nokoli Karasi⸥ akumu na.” ninguli aku siku kolo toko singí kene kanoko kondoko molangi. Yombo awisilini kanu yemanga unguma pilku liku “Sika nikimili.” ningí.

7 “Kolea marenga opa awili seko senge mele pilku, ‘Opali talu opa awili i-sipa i-sipa wendo ombá.’ ningu we ningí kinia pilkuli mini-wale naa mundangi. Opa sengema kinia aku uluma Pulu Yemone ‘U wendo opili. Laye-kolte pe mele ya ma-koleamo pora nimbá.’ nimba, nimba panjerimumunga aku uluma sika wendo ombá-na-kolo aku-kinia mulu matolo u naa pora nimbá. 8 ⸤Mulu ma pora nimbá walemo u wendo naa opili umbuna awili mare wendo ombá.⸥ Yombo talape awili se kinia talape awili se kinia opa seko, ye nokoli kingi marenga talapema kinia marenga talapema kinia opa senge. Ya ma-kolea senga senga ma jimi-jimi sepa, gele lepa, aku sipa sembá. Ambo sene bolango kokele kanopa limbando u bulu-mini topa mindili nolemo mele, mulu ma pora nimbá walemo kokele wendo ombándo umbuna lupa lupa aku sipama u wendo ombá.” ⸤nirimu.⸥

9 “⸤Kanu uluma wendo ombá walemanga⸥ yomboma mimi siku kanangi. Onone ⸤ ‘Na lombili andoli yomboma mindili nongo, kolangi.’ ningu,⸥ ono ⸤mare liku ambolkole⸥ kanjollomanga makumanga mengo pungu kote sendeko, ono ⸤mare⸥ Juda yomboma maku toko Pulu Yemonga ungumu pilielemele ulkamanga liku mengo pungu kopene tongela. Ono nanga yomboma molongemonga ono ⸤mare ka siku⸥ gapomano ye awilima kinia ye nokoli kingima kinia molongena ⸤kote sendengendo⸥ mengo pungíla. Aku siku senge kene ono onono kanoko kondoko molayo. ⸤Aku-sipa na-kolo kote sendenge kinia kotena gilkuli kanu yema kinia kanu yema nokonge ye nokolima kinia⸥ onone ‘Nanga ungumu piliangi.’ ningu ono ningu singí. 10 Semane peangamo ‘Yomboma pali piliangi.’ ningu koleamanga pali andoko u ningu singí ⸤kinia, pe mulu ma pora nimbá walemo kamu wendo ombá⸥. 11 Ono ka siku kote sendenge kinia u ‘Kotena nambolka unguri nimulúnje? Olio ungu se mangilku pilingí kinia nambolka unguri pundu topo nimulúnje?’ ningu mini-wale naa mundangi. Ono ungu ningíma onono pilkuli naa ningí. Mini Kake Sélimuni ononga kerena molopale nimba simba unguma onone anju ningí kene aku senge enamonga ono ungu ningí mele pilkuli aku siku ningí.” ⸤nirimu.⸥

12 “⸤Aku walemanga⸥ genuni yunga kandi genu ⸤nanga yombo molombamonga⸥ ‘Kolopili toko kondangi.’ nimba kote sendemba. Lapane yunga kandi bolangoma akula sembá. Bolangomane kepe ononga kandi anupili lapali-kinia mumindili kolko kotena mengo pungu “Toko kondangi.” ningíla. 13 Nanga yomboma molongemonga yombomane pali ono-kinia konopu kiri panjingí, aku-na-kolo na munduku naa kelko walema pora naa nipili tondolo munduku molonge yomboma Pulu Yemone lipa tapondopa ‘Mindili nonge koleana naa pungu pea molopo kondopo mindi pamili.’ nimbá.” ⸤nirimu.⸥

14 (⸤Na i bokumu tokoro yemone⸥ ono bokumu kanokomele yombomando ungu se niembo: ‘⸤Yesusini nirimu⸥ ungumu inia maniakondo molemo akumu ono imbi kanokomele yombomane ungu-pulumu paa pilku kondangi.’ ⸤nikiru. Yesusini nimbale:⸥)

“⸤Yombo⸥ sepa pipili kondoli méle paa kirimu ⸤ulka-tembelena sukundu Pulu Yemonga Ulka Suluminia Kake Sélina Pulu Yemone⸥ “We-yomboma naa pangi!” nimba mi tolemo-na yu manda naa pumba gilimba, na-kolo walte akuna gilipale kolea akumu paa sepa kalaro mondomba. Aku mélemo akuna ⸤wendo omba⸥ gilimba kanokole ⸤ ‘Umbuna awilima wendo ombá sekemo.’ ningu pilku⸥ kolea Judia poropinji koleamanga molonge yomboma ⸤ononga koleama munduku kelko⸥ ma-pangi lembamanga kowa pangi. 15 Yombo se ulka imuna ola molopili ⸤aku sipa ulu se wendo ombá kinia kanopale kowa pumbándo⸥ mania omba ‘Mélema lipu membo pambo.’ nimba ulkana sukundu naa pupili. 16 Yombo se kaliana molopale ⸤ ‘Kowa pambo.’ nimba⸥ kelepa ulkando pumba yunga ali-wale sulumu naa lipili. ⸤Sumbi siku kowa mindi pangi.⸥ 17 Aku sipa wendo ombá walemonga ambo bolango mondongema kinia, ambo bolango ame singíma kinia, ⸤ono manda lisiku kowa naa pungímunga⸥ ono-kinia paa umbuna wendo ombámonga ono kondo sekemo.

18 “Pulu Yemondo mawa sekole, ‘Ali selemo olimanga kanu umbunama wendo naa opili.’ nieyo. 19 Kanu walemanga umbuna paa awilima wendo ombá, Pulu Yemone u mulu ma pulu polopa serimu kinia kepe, yandopa kiniá kepe umbuna aku sipa se wendo naa orumu. Pe kepe aku sipa umbuna awilima naa wendo ombála. Akumunga aku siku Pulu Yemo kinia mawa sangi. 20 ⸤Kanu umbunama wendo ombá kinia⸥ Ye-Awili ⸤Pulu Yemo⸥ne ‘Nondopa pora nipili.’ nimba u naa nimba panjilkanje yomboma pali kololemolá. Aku-na-kolo Pulu Yemone nimba taltopa ‘Nanga yomboma molangi.’ nirimu yomboma ‘Naa kolangi.’ nimba ‘Umbuna wale akuma nondopa pora nipili.’ nimba, nimba panjerimu.

21 “Kanu umbuna omba pemba walemanga yombo marene ninguli: “Kanaa! Pulu Yemone ‘Olio nokopa kondomba ye se lipu mundumbu.’ u nimba taltorumu ye nokoli Karasimu ya omba molemo.” ningí molo “Nena omba molemo.” ningí kinia ononga unguma naa pilku, ‘Sika nikimili.’ ningu kuru naa mondangi! 22 Ye mare ongo kolo toko ninguli: “Pulu Yemone nimba taltorumu ye nokoli Karasimu na.” ningí, molo kolo tokole “Pulu Yemone ungu-umbu tondomuma pilipuli ombo nimbu sikimulu.” ningí. ‘Yomboma pali, Pulu Yemone ‘Nanga yomboma molangi.’ nimba, nimba taltorumu yombomane kepe lipu peke tondopo, nikimulu mele ‘Sika.’ ningu kuru mondangi!’ ningu Pulu Yemone mindi ulu-tondolo manda selemoma mele manda manjiku ulu-tondolo lupa lupama senge. Aku-sipa na-kolo Pulu Yemonga yomboma aku siku kondi tonge kinia ononga unguma naa pilku, mokoli senge. 23 Akumunga, pe ulu akuma wendo ombá mele ‘Ono u piliangi.’ nimbu ya nimbu sikiru mele pilkuli kanoko kondoko molaa!” ⸤nirimu.⸥

24 “Kanu walemanga aku mindili nonge nikiru uluma wendo ombá kinia pe ⸤ulu lupa lupa mare wendo ombála. Aku uluma i-sipa:⸥

28 “Unju pikimuni selemo aku sipa ungu-iku mele pelemo kene pilkuli ungu-pulumu piliaa. Unju piki kolamanga kirikiri sepa gomo tolemo kinia kanokole ‘Kiniá ena sembá walemo wendo ombá sekemo lémo.’ ningu pilielemele. 29 Aku sipala, i ulu “Wendo ombá.” nikiruma sika wendo ombá kinia kanokole ningímuni ‘Yu paa sika nondopa ombá sekemo. Yu paa kamu okomo.’ ningu pilingí.

30 “Nane onondo paa sika nimbu sikirumu: “Kiniá molemele yomboma u naa kolangi i “Wendo ombá.” nikiru uluma pali wendo ombá.” nikiru. 31 Mulu matolo pora nimbá-na-kolo nanga ungu niliuma paa pora naa nimbá. ⸤Niliu mele pali paa sika wendo ombá.⸥” ⸤nirimu.⸥

32 “⸤Mania Omba Mana-Ye Au Lierimu Yemo paa sika ombá⸥-na-kolo yu ombá walemo naa pilielemolo. Ipulieli ombáne, tangoli ombáne naa pilielemolo. Mulu-koleana angelloma kepe naa pilielemelela. Pulu Yemonga Malo kepe naala pilielemo. Tata yuyu mindi ⸤aku walemo⸥ pilipa molemo. 33 Yu kelepa ombá walemo ono naa pilielemele kene ‘Yu ombá.’ ningu kanoko kondoko, uru naa peko (Pulu Yemo kinia ungu ningu) molayo. 34 Yu ombá walemo i-sipa: Ye se kolea marenga wale mare molomba pumbá selemo kinia yunga koleamo mundupa kelembando yunga kendemande-yombomando “Nanga koleamo nokondaa.” nimbale yunga kongonomo sendenge mele ono yu-mele-mele moke sepa sipa ulka-kerepulu nokolemo yemondo “Na walte ombó kene kanoko molou.” nimbale pulimú.

35 “Ulka pulu yemo sika ombá-na-kolo yu ombá walemo naa pilielemele kene ‘Yu ombá.’ ningu kanoko molayo. Ipupini ombá, molo awi-amburumi ombá, molo kolea tangombando kera gulta ko tolemo kinia ombá, molo ipulieli-u ombánje, ono naa pilielemele kene 36 ‘ ‘Na uru peambo waltikele yu lipa sinjipa omba na kanomba.’ ningu, kanoko molangi.’ nimbu nikiru.

37 “Onondo i nikiru mele yombomando pali nikirula, ‘⸤ ‘Ombá.’ ningu⸥ kanoko molangi.’ nimbu nikiru.” nirimu.

<- MAKO 12MAKO 14 ->