IPURU IPURU Yomboma Pepá Topa Sirimu bokumu I Bokumunga Ungu-Pulu Mare Isirele yomboma nga anda-kolepa Jekopo, yunga imbi se ‘Isirele’ niringi, akumuni yandopa Yesusi molopili kalopa liltimu yombomando ‘Isirele yomboma’ niringi; ‘Juda yomboma’ niringila; ‘Ipuru yomboma’ niringila. U-pulu-pulu ‘Ipuru yomboma’ niringi ungumu Wendo Oringi 1:22 molemo. Aku-na-kolo i pepá topa sirimu Ipuru yombo akuma Juda yombo konopu topele toko ‘Yesusi yu sika Pulu Yemonga Malo. Yu sika Pulu Yemone “Ono nokopa kondomba ye se lipu mundumbu.” u nimba, nimba taltorumu ye nokoli Karasimu.’ ningu kuru mondoringi yomboma. Kanu Ipuru yomboma u Mosisini sirimu ungu-manema pilku liku Pulu Yemo popo tongendo kongima toko kalko kongimanga memema Pulu Yemo siringi yomboma moloringi-kulu pilipale pepámo torumu yombomone kanu Ipuru yomboma Karasinga unguma mane simbando “Mosisi kinia, kongi toko Pulu Yemo siringi kongima kinia kongimanga memema kinia, Pulu Yemo popo toringi ulka-tembelemo kinia, Pulu Yemo popo tondoli yema kinia kanu yemanga ye awili olandopamo kinia, kanuma paa maniandopa.” nimba, “Yesusi kinia Yesusinga mememo kinia Yesusi yuyu kepe paa olandopa.” nirimu. ‘Yu munduku kelko u pilku seko moloringi mele kelko naa sangi.’ nimba i pepámo topa sirimu. Ungu-pulu mare boku pealemekondo molemo akuma i-sipa: “32.2. Pikinini Bilong God”, “26. lo”, “34. pris”, “34.3. het pris”. I pepámo topa sirimu yemo nawenje, naa pilielemolo. Marene ‘Pollone torumu’ konopu lemele. Aku-na-kolo Matini LLuta kinia yombo marene ‘Pollo mólo. Ye sene lupa torumu.’ niringi. Yombo marene Lipa Mundorumu Yema 18:24-28 kanokole ‘Aku ye Apollosini torumu.’ konopu lemele. Marene aku semanemo kanoko ninguli: “Ambo Pirisillane torumunje.” nilimili. Koronga-u ye pilipa kondoli ye sene “Banapasini torumunje.” nirimu. Lipa Mundorumu Yema 4:36, 13:1-4 kanopale aku sipa pilierimunje. “Mólo, LLukuni torumunje. Molo ye sene lupa torumunje.” nilimili. Aku-sipa na-kolo i pepá torumu yombomonga imbimu unguri mólo. Pulu Yemonga Mini Kake Sélimuni ‘Pulu Yemonga ungumu tondopili.’ nirimu kinia pilipale yombo sene torumu, akumunga i bokuna molemo ungumu sika Pulu Yemonga ungumu. Ya ungu-pulumu pora nikimu.
11:1—10:18 I Pepámo Topa Sirimu Yemone Mane Sirimu Unguma Kolomongo-Awili 1-2 Mulu-Koleana Angelloma Maniandopa, Yesusi Olandopamonga Ungumu 1:1-3 Kiniá Pulu Yemonga Malone Olio Pulu Yemonga Unguma Nimba Silimú Ungu Se 1 Paa u Pulu Yemone alieli olio Ipuru yombomanga anda- kolepalimando ‘Nanga unguma piliangi.’ nimba yunga ungumu pilku yando ningu siringi yema yuni ungu-umbu tondorumuma pilkuli olionga anda-kolepalima ningu siringi. ‘Yomboma paa piliangi.’ nimba lipa tapondorumu kinia kanu yemane ulu awisili liku ora siku seko ungu awisili ningu siringi. 2 Aku-sipa na-kolo pe kiniá ‘Yunga Malone olio yunga unguma nimba sindepili.’ nimba Pulu Yemone yu mana maniando lipa mundorumu. Kanu kangomo Pulu Yemone ‘Nanga mélema kamu yu simbú, lipa taltopa molomba.’ nirimu kangomo. Kanu kangomo yu Pulu Yemone u mulu ma mélema “Sambo.” nirimu mélema pali serimu yemola. 3 ⸤Enamo pa selemo mele aku sipa⸥ Malo pa selemo akumuni Pulu Yemonga pa tondolo mundupa selemo pa sélimu olio lipa ora silimú. Pulu Yemo molemo mele Malo aku sipa molemo. Malonga ungu tondolomone mélema pali manda molemele. Yuni ‘olionga ulu-pulu-kirima omba mania pupili, olio yombo kalaro naa mololima molangi.’ nimba kongono sepa pora sipale ⸤mélema pali nokombando⸥ mulu-koleana Ye Nokoli Kingi Awili Olandopamonga ki-lomekondo pumba molorumu molemo. 1:4-14 Pulu Yemonga Malo Paa Olandopa Molemo, Angelloma Maniandopa Molemele Akumunga Ungu Se 4 Aku serimu-na yunga imbi lepa ‘Nanga Malo’ nirimu aku imbimu paa olandopa purumu, mulu-koleana angellomando imbi lepa ‘Pulu Yemonga kongono sendeli yema’ nirimu aku imbimu paa maniandopa, aku sipa mele yu yuyu paa olandopa angelloma maniandopa. 5 Pulu Yemone nimbale: “Nu nanga Malo. Kiniá na nunga Lanie.” nirimu mele angello sendo walte aku sipa nirimuye? ⸤Mólo. Yunga Malondo mindi aku sipa nirimu.⸥ Molo yuni nimbale: “Na yunga Lapa molombo, yu nanga Malo molomba.” nirimu akumu angello sendo nirimuye? ⸤Mólola. Malondo mindi aku sipa nirimu.⸥ 6 Yundu ungu se pea nirimula. Yunga kango-komolayemo mana lipa maniando mundupale Pulu Yemone yunga angellomando nimbale: “Kangomo popo toko kape ningu yunga imbi ambolko paka tondaa.” nirimu. Aku unguma pilipuli ‘Malo olandopa angelloma maniandopa.’ nimbu pilielemolo. 7 Angellomando Pulu Yemone nimbale: “Yunga angelloma poporomema mele molko, yunga kongono sendeli yema sepe mele molangi.” nilimú. 8 Aku-sipa na-kolo Pulu Yemone Malondo nimbale: “Pulu Yemo, nu alieli ye nokoli kingimu moleno mele molko mindi puni. Nuni ulu sumbi nilima seko yomboma nokoni. 9 Nuni ulu-pulu sumbi nilima manjiku konopu siku seleno. Ulu-pulu-kirima konopu naa mondoko paa naa seleno, akumunga nunga Pulu Yemone ‘Nu ye nokoli kingimu molko mélema pali nokani.’ nimba, nimba taltopale nunga pulu lemó yombomanga pali namba paa olandopamo nu sirimu. Nu aku sipa sepa kondorumumunga nu kinia nunga pulu lemó yomboma kinia konopu singí.” nirimu.10 Pulu Yemone ⸤Malondo⸥ ungu se pea nimbale:
“Ye-Awilimu, u-pulu-pulu nuni mamo seko, nunga kimuni nunu mulumu seko wamorunu. 11 Aku méletolo pora nimbá, aku-na-kolo nu alieli molko mindi pulinu. Mulu-maminiama pingi pumba sungu nimba kiri lemó mele mulu matolo aku sembá. 12 Yombomane wale-pakoli suluma toko eltongendo kimbulimili mele nuni mulu matolo aku siku kimboni; mulu-maminia se lupa panjingindu topele tolemele mele nuni aku siku aku méletolo topele toni. Aku-sipa na-kolo nu nunu aku siku topele naa toko, moleno mele alieli molko, anda naa leko, alieli molko mindi puni.” nirimu. 13 Pulu Yemone u walte nimbale: “ ‘Nunga opa-touma nuni nokani.’ nimbu pe ono topo mania mundundumbu kene iseli-u nu ⸤na kinia pea kopu sepo ye nokolitolo molopo mélema nokambili⸥ nanga ki-lomekondo ongo molani.” nirimu aku ungumu angellomando nirimuye? 14 ⸤Aku ungumu angellomando naa nirimu liemu⸥ angelloma nameleye? Angelloma mini mele molko Pulu Yemonga kongono sendeli yema molemele. Kanu angello yema Pulu Yemone yombo lipa tapondopa, mindili nolemolá aulkana wendo lipa, yu-kinia pea molko kondonge aulkana lipa mondolemo ulu-pulumu lingí yomboma ‘Liku tapondoko nokangi paa.’ nimba lipa mundulimú yema molemele.
IPURU 2 ->
10 Pulu Yemone ⸤Malondo⸥ ungu se pea nimbale: