2
2:1-13
Pulu Yemonga Mini Kake Sélimu Mania Orumu Semanemo
1 ⸤Yesusi kolorumu koro yopoko-pakara omba purumu kinia⸥ Juda yomboma ningu taltoko Pulu Yemo kinia ungu se seringi wale ‘Pendikosi’ nílimu wendo orumu. Aku walemonga Yesusi lombili andoli yomboma kolea seluna maku toko moloringi.
2 Waltikele ungu se, poporome awili ungu nilimú mele, muluna ola mania orumu, kanu mélemo ulkana moloringi yombomane pali pilieringi.
3 Mélema, sepe alimbolo mele, wendo orumu kanoringi, aku mélema pumba yombomanga pali ⸤pengena⸥ selu selu nimba pumba molorumu.
4 Kanu-kinia Mini Kake Sélimu Yesusi lombili andoli yombomanga konopumanga sukundu omba molopa manda serimu. Kanu-kinia Minimuni ono yu-mele-mele ‘Umbu-ungu lupa lupa kerena niengi.’ nimba konopuma sumbi sirimu kinia ono umbu-ungu u naa niringi lupa lupama pulu polko ningí niringi.
5 Juda yombo mare u ongo kolea-awili Jerusalleme maku toko moloringi kinia aku ulumu wendo orumu. Ono Pulu Yemonga ungu pilieli yomboma. Ono ma-koleana yombo lupa lupama pea pali molkole kanu yomboma munduku kelko Jerusalleme sukundu oringi. 6 Kanu poporome awili mele ungumu pilkuli kanu yomboma maku tokole ononga umbu-ungu lupa lupama Yesusi lombili andolimane niringi pilkuli ono konopu awisili liku mundoringi. 7 Ono mini-wale munduku konopu awisili leko ninguli:
“A, i yomboma umbu-ungu lupa lupa nikimilima ono kolea Gallilli disiriki yomboma mindinje? ⸤Gallilli yombomane ungu selumu mindi nilimili kanumu.⸥
8 Pe kiniá olionga ya yu-mele-mele umbu-ungu lupa lupa nilimuluma nambi seko pilkuli nikimili-na olio pilkimuluye?
9-11 Olio kolea Patia kinia, kolea Midia kinia, kolea Illame kinia, kolea Mesepotemia kinia, kolea Judia kinia, kolea Kapadosia kinia, kolea Pondasi kinia, kolea Esia kinia, kolea Pirisia kinia, kolea Pambillia kinia, kolea Isipi kinia, kolea LLipia sukundu Sairini nondopa lemó koleama kinia, kolea-awili Romo kinia, kolea Kiriti kinia, kolea Arepia kinia, aku kolea lupa lupamanga pali molopo omulu yomboma molemolo. Olio Juda yomboma kinia yombo-lupa molopo Juda yombomanga ulu-pulu topele topo selemolo yomboma kinia, olio yu-mele-mele olionga umbu-ungumane Pulu Yemone ulu-tondoloma selemo ulumando nikimili pilkimulu.” niringi.
12 Ono pungu-pungu ninguli ‘Pilipu sundukumulunje?’ ningu pilkuli, anju yando angelema ninguli “Imunga ulu-pulumu nambolkamoye?” niringi. 13 Aku-na-kolo yombo marene ungu-taka tondoko ninguli: “I yema no-tondolo nongole amu tokomele.” niringi.
2:14-36
Pitane Yomboma Ungu Nimba Sirimu Semanemo
14 Kanu-kinia Pita, ⸤Yesusini lipa mundorumu ye⸥ rureponga yopoko wema kinia pea ola gilkuli yombomando tondolo mundupa nimbale: “Olionga Judia yomboma kinia, ono Jerusalleme molemele yomboma kinia, i wendo okomo sekemolo ulumunga pulumu ono nimbu siembo, mimi siku komu sendeko piliangi.” nirimu. 15 “ ‘Olio amu tokomolo.’ ningu pilkimili akumu mólo. Kiniá orili-u nani killoko mindi, aku-kinia yomboma no naa nolemele kanumu. 16 Kiniá wendo okomo ulumundu Pulu Yemone ungu-umbu tondorumuma pilipa yomboma nimba sirimu ye Joelene pe wendo ombá mele u nirimu. Yuni nirimu mele i-sipa:
17 “Pulu Yemone nimbale:
“Kolea pora nimbá walema wendo ombá kinia
nane nanga Minimu yomboma pali simbú.
Kanu-kinia ononga lemenali marenalini
nanga ungu-umbu tondomboma pilku
yomboma ningu siku,
ononga ye-andamane uru-kaima seko,
ononga ye-kangomane
mongo-indi kaima mele seko kanonge.
18 Nanga kendemande ambo yema kepe
nanga Minimu simbú kinia nanga ungu-umbu
tondomboma pilku yomboma ningu singí.
19-20 Ye-Awilimunga wale awilimu u wendo naa opili
nane mulúna ola kinia mana mania kinia
⸤walema pora nimbá⸥ lipa ora simba ulu-tondoloma
‘Ono kanangi.’ nimbu sembó.
‘Mana meme kinia sepe kinia ilia awili kinia,
aku ulu-tondoloma sepili.’ nimbú.
‘Muluna enamo simbulu topa
olimu meme sepili.’ nimbúla.
21 Kanu-kinia Ye-Awilimunga wale awilimu
kamu wendo ombá kinia yombomane iseli-u
Ye-Awilimunga imbi leko mangilingí yomboma
nane lipu tapondopo
mindili nolemolá aulkana wendo lipu
na-kinia molko kondonge aulkana
lipu mondombo.” nimba
Pulu Yemone nimu.”
nimba Joelene nirimu.
22 “Ono Isirele yomboma, ono i ungu nimbú sekeromo piliayo. ‘Kolea Nasarete ye Yesusi ‘Yu sika Pulu Yemone nimba taltopa lipa mundorumu.’ ningu kanangi.’ nimba Pulu Yemone yu lipa tapondorumu kinia ono moloringina yomboma lipa ora sirimu ulu-tondoloma serimu. Akumu ono kanoko pilieringi. 23 Onone kanu yemo kinia pe senge mele Pulu Yemone u pilipa molorumu. Pulu Yemone ‘I-sipa wendo opili.’ nimba pilipale i yemo ono Juda yomboma sirimu kinia ‘Seko kinjeringi yombomane olio liku tapondoko yu toko kondangi.’ ningu ono siringi, onone ‘Yu kolopili.’ ningu unju-perana pirimuni toko uku toko panjeringi kolorumu. 24 ⸤Aku seringi⸥-na-kolo Pulu Yemone ‘Yu kamu mana mania naa pepili.’ nimba topa makisinderimu. Kololi ulu-pulumuni yu ka sipa kamu manda naa ambolombamonga mindili nongo kololemele mindilimanga pali Pulu Yemo yuni yu lipa tapondopa wendo linderimu.
25 “Depiti yuni kepe yu i yemo pe sembá mele u ungu se nirimu mele i-sipa:
“Ye-Awilimu nanga kumbikerena
alieli molorumu kanorundu.
Yu na lipa tapondombando
nanga ki-lomekondo molemomonga
mélsene umbuna na manda naa simba.
26-27 Akumunga na kamelé akopo molopo,
nanga kerena konopu sipu unguma niliu.
Nuni nanga minimu yombo kolko pulimili koleana
munduku naa kelko,
nunga Ye Kake Sélimunga ónomo
‘We puropili.’ naa nini akumunga pilipuli,
‘Nanga kangimu kinia minimu kinia
na méle peangamo limbu.’ nimbu nokopo molio.
28 Nuni na konde molopo mindi pumbú aulkamo
liku ora sirinu,
nu na-kinia kopu seko molonimunga
na konopu awisili simbú.”
nimba Depitini aku sipa nirimu.
29 “Ango-keme, i ungumu sika nikiru. Olionga anda-kolepa Depiti koronga-u kolorumu óno seringi, yunga óno-koleamo olionga koleana lierimu lemó. Aku liemu yuni ‘Nunga Ye Kake Sélimunga ónomo ‘We puropili.’ ni naa nini.’ nirimumu yu yuyundu naa nirimu lémo. 30 Aku-na-kolo yu Pulu Yemone ungu-umbu tondorumuma pilipa yomboma nimba sirimu yemo molopale, Pulu Yemone “Nuni kalko lini ye se nu kolali sepa ye nokoli kingimu molomba.” nimbale “Paa sika aku sembó.” nimba tondolo mundupa nirimu mele pilierimu. 31 Depiti ⸤yu Pulu Yemone ungu-umbu tondorumuma pilipa yomboma nimba sirimu yemo molopa⸥ pe wendo ombá mele u pilipa nimbale:
‘Pulu Yemone yunga minimu
yombo kolko pulimili koleana
mundupa naa kelepa,
yunga ónomo naa purumba.’
nirimu akumu Pulu Yemone nimba taltopa lipa mundorumu ye nokoli Karasimu kolopale kelepa lomboropa ola molombamondo nirimu.
32 Pulu Yemone i ye Yesusi sika topa makisinderimu, akumu olio kanorumulu mele nikimulu.
33 “Topa makisindipale yunga ki-lomekondo lipa mondorumu. Akuna molopale Lapane u “Simbu.” nirimu Mini Kake Sélimu yu sirimu, lipale, kiniá yando sikimu. Kiniá kanoko pilkimilimu yuni sikimumu kanoko pilkimili. 34-35 Depiti mulu-koleana olando naa purumu-na-kolo yuni nimbale:
“Ye-Awili ⸤Pulu Ye Yawene⸥
nanga Ye-Awilimundu nimbale:
“ ‘Nunga opa-touma nuni nokani.’ nimbu,
pe ono topo mania mundundumbu kene
iseli-u nu ⸤na kinia pea kopu sepo
ye nokolitolo molopo mélema nokambili⸥
nanga ki-lomekondo ongo molani.” nirimu.”
nimba Depitini nirimu.
36 “Akumunga Isirele yomboma ono pali i-siku piliangi: I ye Yesusi onone ⸤ “Kolopili.” ningu⸥ unju-perana uku toko panjeringimu Pulu Yemone “Yu Ye-Awilimu kinia, yu ‘Yomboma nokopa kondomba ye se lipu mundumbu.’ nimbu, nimbu taltorundu ye nokoli Karasimu molopili.” nirimu yemo molemo.” nimba Pitane nirimu.
2:37-42
Yombo Paa Awisili Konopu Topele Toko No Liltingi Semanemo
37 Pitane onone aku siku seringi mele nirimu ungumu pilkuli yomboma mini-wale mundukuli onone Pita kinia Yesusini “Nanga kongonomo sende-paa.” nimba lipa mundorumu ye wema kinia onondo ninguli: “Ango-keme, kiniá olio nambi samiliye?” niringi.
38 Pitane onondo nimbale: “Ono ‘Pulu Yemone olionga ulu-pulu-kirima kanopa siye kolopili.’ ningu seko kinjilimili mele pilku kiri pilku, konopu topele toko, ‘Na Yesusi Karasinga yombomo molambo.’ ningu no liengi. Aku senge kinia Pulu Yemone Mini Kake Sélimu ono we simba lingíla. 39 Pulu Yemone ‘Mini Kake Sélimu simbú.’ nirimu akumu ono kinia onone kalko lingí yomboma kinia yombo kolea sulumanga molemele molongema kinia onondo pali nirimu. Ye-Awilimu olionga Pulu Yemo yuni ‘ ‘Nanga yomboma molangi waa.’ nimbú yomboma pali Mini Kake Sélimu simbú.’ nirimu.” nimba Pitane nirimu.
40 Pitane ungu lupa lupa awisili tondolo mundupa ono liepi-liepi topa nimbale: “Ya mana-yombo molko kinjilimilimanga Pulu Yemone ono umbuna simba sekemo kene yuni ‘Olio umbuna naa sipili.’ ningu, pilku kondoko molaa.” nirimu.
41 Kanu-kinia Pitane nirimu ungumu pilku liltingi yomboma no liltingi. Kanu walemonga Yesusinga ungumu ‘Sika.’ ningu kuru mondoringi yombo talapemonga sukundu yombo tere tausini mele olandopa purumu. 42 Kanu-kinia ungumu pilku liku no liltingi yomboma Yesusini “Nanga kongonomo sende-paa.” nimba lipa mundorumu yemane ungu-mane siringima pilku, genupili kinia seluna konopu seluna pupili sere leko molko, pea kopu seko kere-langi nongo, Pulu Yemo kinia ungu ningu moloringi.
2:43-47
Karasinga Yomboma Konopu Seluna Pupili Sere Leko Manda Moloringi Mele Semanemo
43 Yesusini “Nanga kongonomo sende-paa.” nimba lipa mundorumu yema Pulu Yemone lipa tapondorumu-kulu lipa ora sirimu ulu-tondoloma seringimunga kanokole yomboma pali pipili koloringi.
44 ‘Yesusi yu sika ⸤Pulu Yemone “Yomboma lipa tapondopa nokopa kondomba.” nimba mana lipa mundorumu ye nokoli Karasimu.’ ⸥ ningu kuru mondoringi yomboma pali seluna molko, ononga mélema onono yu-mele-mele naa taltoko, ‘Olionga pea’ ningu taltoko selu siku moloringi.
45 Ononga ma kinia méle taltoringima makete seko kou liku, méle mólo torumu yomboma kou moke seko siringi.
46 Alieli ⸤Pulu Yemo popo toko kaloringi⸥ ulka-tembelena pungu maku toko, ononga ulkamanga pali pea andoko ‘Kere-langi pea namili.’ ningu, konopu peanga pepili konopu siku kere-langi nongo,
47 Pulu Yemo kape ningu imbi ambolko paka tondoko, moloringi. Yombomane pali ono kanoko peanga pilieringi. Ulu-pulu-kiri kanoko kiri pilku konopu topele toko Yesusindu “Mindili nolka aulkana naa pambo kene liku tapondou.” niringi yomboma Ye-Awilimuni ‘Yunga yomboma molangi.’ nimba alieli sukundu sukundu liltimu.
<- Lipa Mundorumu Yema 1Lipa Mundorumu Yema 3 ->
