JONO YOPOKO-SIPAMO
JONOne Wale YOPOKO-SIPA Pepá Topa Sirimu Bokumu
Jonone I Pepá Topa Sirimumunga Ungu-Pulu Mare
Ungu-pulu mare inia yakondo gomo 1179 molemo, aku ungumu kanani.
Jonone ye mare “Karasinga unguma andoko mane siengi pangi.” nimba lipa mundorumu yema Esia poropinji kolea senga Karasinga yombo talapemonga ye sene “Ya naa wangi. Anju paa.” nimba topa makororumu. Kanu yemonga imbimu Diyotepas. Yombo marene Jonone lipa mundorumu-na oringi yemando “Pea peamili wangi.” niringi kinia Diyotepasini kanu yombomando “Karasinga yombo talapena ultu paa.” nimba topa makororumula. Jonone i pepámo ye Gayasi molorumuna topa mundupa nimbale: “Ye mare “Koleamanga andoko mane siengi.” nimbu lipu munduliu yema “Pea peamili wangi. Ononga unguma piliamili.” ningu selenomo paa seko kondoleno.” nimba pepámo topa, “Diyotepasini sepa kinjilimumunga yu ombo kanopole yu tondolo mundupu mane simbú.” nimba pepámo torumula.
Ya ungu-pulumu pora nikimu.

1-15 pali

‘ ‘Sika.’ Nimbu Kuru Mondolemolo Mele Mindi Pilipu Lipu Molamili.’ Ningu Kanoko Kondoko Molko, Semane Peangamonga Opa-Toumane Nilimili Unguma Naa Pilku Bulu Siengi Ungu Se

Pepámo Tombando Pulu Polopa Torumu Ungumu

1 Na ⸤Karasinga yombomanga⸥ tapu-ye-andamone nanga genu peangamo, sika paa konopu mondolio ye Gayasi nu ⸤i pepámo topo sikiru⸥.

2-4

Ye Gayasi Sumbi Sipa Molorumu Mele Pilipale Jono Konopu Sirimu Semanemo

2 Nanga genu peangamo, nane ‘nunga minimu pepa kondolemo aku sipa nuni kongonoma senindu umbuna se wendo naa opili seko kondoko, nu kuru se naa topili molko kondani.’ konopu lekero. 3 Genupili ye mare ongo nando semane toko ninguli: “Nu sika-ungumu paa ambolko kondoko, nuni ungu-sikama paa pilku liku seko moleno.” niringi pilipuli na paa konopu sirindu. 4 Nanga bolangomane ungu-sikama pilku liku seko molemele mele pilipuli konopu siliu mele paa olandopa.

5-8

Ye Gayasini Sepa Kondorumu Semanemo

5 Nanga genu peangamo, ⸤olionga⸥ genupili nunga koleana olemelema sika paa ponenge leko olemele-na-kolo ono paa liku tapondoko nokoko molenomonga paa seko kondoleno. 6 Nuni ono konopu mondoko nokoleno mele onone Karasinga talape- yomboma ningu siringi. Nuni ‘Pulu Yemonga kongonomo sekero.’ konopu leko ‘Aulkana kere-langi nolko pangi.’ ningu liku tapondonu liemu peanga. 7 ‘We ultu molemele yombomane naa liku tapondangi.’ ningu kanu yema ono ‘Yomboma Yesusinga imbi paa piliangi.’ ningu ⸤ononga pulu-koleama munduku kelko⸥ andolemele. 8 Akumunga, olione kanu yema lipu tapondopo kere-langi sipu ‘Ulkamanga peangi.’ nilimulu kinia peanga. Onone ‘Ungu-sikamonga kongono selemelemonga lipu tapondamili.’ nimbu aku samili.

9-11

Ye Diyotepasini Sepa Kinjerimu Semanemo

9 Karasinga yombo talapemo pepá se topo sirindu-na-kolo Diyotepasini yu ‘ononga ye-awilimu molombo.’ konopu lepa molemo yemone olionga unguma naa pilipa limú. 10 Akumunga, na ono molemelena ondu liemu yuni olionga ungu-bulkundu nindilimú mele nimbu para simbú. Akumu mindi mólo. Yuni genupili ponenge leko olemele kinia ‘Okomeleye?’ nimba ki naa lipa “Pea molamili.” naa nimba, yombo-ponenge olemelema “Pea pe-pamili waa.” nilimili kinia yuni “Naa mengo pangi. Mólo!” nimba, Karasinga yombo talape molemele ulkana makoropa pena pena selemo.

11-12

Ye Demitiasini Ulu-Peangama Serimu Semanemo

11 Nanga genu peangamo, ulu-kirima kanoko manda manjiku naa sei. Ulu-peangama mindi kanoko manda manjiku sani. Yombo se ulu-peangama selemo yombomo Pulu Yemonga yombomo molemo. Yombo se ulu-kirima selemo yombomone ‘Pulu Yemo-kinia kopu sepo molambili.’ u naa nimba yu molemo mele kuru naa mondorumu.

12 Yombomane ye Demitias ‘yu ye peangamo’ nilimili. Yuni sepa kondolemo mele ungu-sikamone lipa ora silimúla. Nane kepe ungu-sikama mindi niliu nu pilieleno yemo molio kanumu nane ‘Yu molopa kondolemo.’ niliula.

13-15

Pepá Topa Pora Sipale Ungu Wallo-Kolte Torumu Unguma

13-14 Na ungu awisili pepá topo silka-na-kolo ‘olto paa kamu konopu awili-sepo sipu molambili kene nu molenona ombo mongomone kanopo nu-kinia ungu nimbu sipu molambo.’ nimbu pilipuli pepá naa toli siye kolkoro.

15 Nu konopu pe nipili molani.

Nunga yombo pulu lemomane “Nu molou.” nilimili.

Nuni olionga yombo pulu lemó nu-kinia molemelema yu-mele-mele imbi leko “Olione ‘Ono molaa.’ nikimulu.” nieni.

⸤Aku pea nikiru.⸥