12
Kolomongo-Awili 12
Olio Karasinga Yomboma Kangi Selumu Molemolomonga Kimbu Kima Mele Pulu Yemonga Minimuni Olio Moke Sepa Silimúmunga Ungu Se
12:1-11
Pulu Yemonga Minimuni ‘Pulu Yemonga Uluma Olio Lupa Lupa Samili.’ Nimba Tondoloma Yu-Mele-Mele Moke Sepa Silimú Ungu Se
1 ⸤Manda,⸥ ango-keme, Pulu Yemonga Mini Kake Sélimuni Karasinga yomboma tondoloma moke sepa silimúmunga ⸤pepá toko siringi pepána mangilku pilieringimunga kiniá ungu se pundu topo ‘Mini Kake Sélimuni silimú tondoloma⸥ mimi siku piliangi.’ nimbu akuma ono nimbu siembo.
2 Ono u Karasinga yombo talapena ultu moloringi kinia ⸤ye marene⸥ ono kolo toko mane siringi kinia ‘Sika.’ ningu kuru mondokole onone lawa seko, méle ungu naa nili we-mélemando ‘Ima olio nokolemele pulu yomboma.’ ningu mélema popo toko kalko, ulu akuma u seringi mele pilielemele.
3 Akumunga, ono ungu se paa piliangi, nimbu siembo: Pulu Yemonga Minimuni ambololemo yombo sene “Yesusi molopa kinjepili.” paa manda naa nimbá. “Yesusi yu Ye-Awilimu.” nilimili akumu we naa nilimilila. Mini Kake Sélimuni ambololemo yombomane mindi “Yesusi yu Ye-Awilimu” nilimili. Akumu piliaa!
4 Minimunga we silimú tondolo lupa lupama pelemo-na-kolo silimú Mini selumu mindi. 5 Ye-Awilimunga kongono olione sendelemolo kongono lupa lupama pelemo-na-kolo ⸤ “Kongono saa.” ⸥ nilimú Ye-Awili selumu mindi molemo. 6 Kongono selemolo tondolo lupa lupama pelemo-na-kolo aku tondoloma pali yomboma silimú Pulu Yemo selu mindi molemo.
7 ⸤Karasinga yomboma pali⸥ ‘Anju yando liku tapondangi.’ nimba Minimuni olio tondoloma yu-mele-mele moke sepa silimú. We naa silimú. 8 ⸤Akumu i-sipa mele:⸥
Unguma apurupa sumbi sipa nimba kondoli tondolomo
Minimuni yombo se silimú.
Pulu Yemonga ulumanga puluma pilipa kondoli tondolomo
aku Mini selumuni mindi yombo sela silimú.
9 ‘Pulu Yemo mawa sembó mele paa sika sembá.’ nimba
kuru mondoli tondolomo Mini selumunila yombo se silimú.
Kuru tomba yomboma sepa peanga sindeli tondolomo
Mini selumunila yombo se silimú.
10 Ulu-tondoloma seli tondolomo yombo se sipa,
Pulu Yemone ungu-umbu tondolemoma pilipa yomboma nimba sili tondolomo yombo se sipa,
Minimunga unguma kinia uluma kinia,
kurumanga unguma kinia uluma kinia,
pilipa mimi sipa apuroli tondolomo yombo se sipa,
umbu-ungu lupa lupama naa pilipa we walu lieli tondolomo
yombo se sipa,
kanu umbu-ungu lupa lupa we walu lieli unguma pilipa
⸤ ‘Yomboma piliangi.’ nimba⸥ topele topa nimba sindeli
tondolomo yombo se sipa,
⸤aku sipa tondolo lupa lupama Mini selumuni moke sepa⸥ silimú. 11 Aku tondoloma awisili na-kolo Mini selumu. Aku tondoloma pali Mini selumuni mindi sendelemo. Yu yuyu konopumuni pilipa tondoloma moke sepa yomboma yu-mele-mele silimú.
12:12-31
Kangi Selumunga Kimbu Ki Méle Awisili Gilimú Mele Olio Aku Sipu Molemolo Ungu Se (12:1—13:3,8-9, 14:1 pali)
12 ⸤Minimuni tondolo lupa-lupama yomboma yu-mele-mele moke sepa silimúmunga pulumu i-sipa:⸥ Kangimu kimbu ki méle awisili gilimú-na-kolo kangi selumu. Sika kangimunga kimbu ki méle awisili gilimú-na-kolo aku mélema lipa sere lepa kangi selumu. Karasi yu aku sipala molemo. ⸤Yu kangi selumu na-kolo méle awisili. Yunga kangimunga mélema olio.⸥
13 Olio Juda yomboma kinia, Juda yombo naa molko ultukundu molemele yomboma kinia, méle kaloli naa liku kongono we sendeli kendemande-yomboma kinia, yombo sene naa nokopa ono onono we molemele yomboma kinia, olio pali ‘Ono yombo kangi selumu molangi.’ nimba Mini ⸤Kake Séli⸥ selumuni mindi no linderimu. ⸤Pulu Yemone⸥ ‘No mele nangi.’ nimba sirimu norumulu Mini selumu mindi ⸤olionga pali konopumanga molemo⸥.
14 Olio pilielemolo, kangimu yu méle selumu mindi mólo. Yu méle paa awisili lipa sere lepa kangi selumu. 15 Aku kene kimbumuni nimbale: “Na kimu mólo kene na kangimunga mélse mólo.” nilkanje yu kangina gilimúmunga yu kangimunga mélse we naa gilkaye? ⸤Kimbumuni aku nilkanje kepe yu kangina naa gilimba aulka se wendo naa olka.⸥ 16 ⸤Molo⸥ komumuni nimbale: “Na mongomo mólo kene na kangimunga mélse mólo.” nilkanje yu kangina gilimúmunga yu kangimunga mélse we naa gilkaye? ⸤Komumuni aku nilkanje kepe yu kangina naa gilimba aulka se wendo naa olka.⸥ 17 Kangimu pali mongomo mindinje kangimuni nambi sepa unguma pilkaye? Kangimu pali komumu mindinje kangimuni nambi sepa mélemanga munama pilkaye? 18 Aku-sipa na-kolo ⸤kangimu pali aku sipa mólo.⸥ Pulu Yemone ‘Kangina mélema giliepili.’ nirimuma yuyu ‘I-sipa i-sipa giliepili.’ konopumuni pilierimu mele “Giliepili.” nirimu. ⸤Kangimunga mélema we walu naa gilimú.⸥ 19 Kangimunga méle seluri mindi gilkanje yu sika kangi se mólo. 20 Aku-na-kolo kangimu aku sipa mólo. ⸤Kangina⸥ kimbu ki méle awisili gilimú-na-kolo lipa sere lepa yu kangi selumu.
21 ⸤Akumunga,⸥ mongomone kimundu nimbale: “Nu naa molenanje na nanu molopo kondolka.” manda naa nilka. Pengemone kimbumundu “Nu naa molenanje na nanu manda molka.” manda naala nilka. 22 Aku-na-kolo aku sipa mólo. Kangimunga méle gilimúmanga mare pilipuli ‘Akuma unguri mólo. Akumane kongono tondolo se naa selemo.’ konopu lemolo mélema naa gilkanje kangimu paa manda naa molka. 23 Kangina gilimú méle mare ‘Méle peangama mólo.’ nilimuluma mimi sipu nokolemolo; ‘Kanopo peanga naa pilielemolo mélema.’ nimbu ‘Mona gilkanje olio pipili selka.’ nilimulu mélema mimi sipu aki tolemolo; 24 kangimunga méle mare ‘We gilimba kinia unguri mólo.’ nimbu aki naa topo ‘We liepili.’ nimbu siye kololemolo. ⸤Aku sipu kangimunga mélema yu-mele-mele pilipu apurupu selemolo⸥-na-kolo kangina gilimú mélema pali Pulu Yemone ‘Sere leko giliangi.’ nirimu. Kangina méle mare ‘Imbi naa mololima.’ nilimili akuma Pulu Yemone ‘Paa kumbina molopili.’ nirimu. 25 ‘Kangimunga mélema pulua toko yu-mele-mele opa-tou naa giliepili. Anju yando selu-siku nokoko molangi.’ nimba ⸤Pulu Yemone ‘Kangimunga mélema pali selu-siku giliepili. Se imbi mololi, se imbi naa mololima mólo.’ ⸥ nirimu. 26 Kangimunga mélse umbuna selemo molo mindili nolemo kinia kangimunga mélema pali umbuna sepili mindili nongo molemelela. Kangimunga mélse kape nilimili kinia kangimunga mélema pali kanu mélemo kinia pea konopu siku molemelela.
27 Manda, ⸤kangimundu nikirumunga ungu se onondo niembo:⸥ Ono pali Karasinga kangimu; ono yu-mele-mele kanu kangimunga mélema. 28 ‘Karasinga yombo talapemonga kongono sangi.’ nimba Pulu Yemone yomboma tondolo lupa lupama sirimu.
Yesusini “Nanga kongonomo sende-paa.” nimba lipa mundorumu yema Pulu Yemone u kumbi lepa nimba taltopa ‘Aku siku molangi.’ nimba,
talo-sipa yuni ungu-umbu tondolemoma pilku yomboma ningu silimili yomboma nimba taltopa ‘Aku siku molangi.’ nimba,
yopoko-sipa ⸤unguma mimi siku pilku⸥ yomboma mane silimili yomboma nimba taltopa ‘Aku siku molangi.’ nimba,
pe ⸤Pulu Yemone mindi manda selemo mele⸥ ulu-tondoloma selemele yomboma nimba taltopa ‘Aku siku molangi.’ nimba,
kuru tolemo yomboma seko peanga sindilimili yomboma nimba taltopa,
yomboma liku tapondolemele yomboma kinia,
kongono lupa lupama nokoko kondolemele yomboma kinia,
umbu-ungu lupa lupa naa pilielemelema we walu lemele yomboma kinia,
akuma pali nimba taltopa ‘Aku siku molangi.’ nimba ⸤aku siku sumbi siku seko molonge tondoloma ono yu-mele-mele moke sepa sirimu⸥.
29 Aku yomboma pali Yesusini “Nanga kongonomo sende-paa.” nimba lipa mundorumu yema molemeleye?
Molo akuma pali Pulu Yemone ungu-umbu tondolemoma pilku yomboma ningu sili yomboma molemeleye?
Molo akuma pali unguma mane sili yombomaye?
Molo akumane pali ulu-tondoloma selemeleye?
30 Molo aku yomboma pali kuru tolemo yomboma seko peanga sindingí tondolomo pelemoye?
Molo akumane pali umbu-ungu lupa lupa naa pilielemelema manda we walu lemeleye?
Molo aku yombomane pali yombo marene umbu-ungu lupa-lupa we walu nilimili unguma sumbi siku pilku ⸤ ‘Yomboma piliangi.’ ningu⸥ topele toko yomboma ningu silimiliye?
⸤Paa mólo! Yombo selumuni mindi uluma pali manda naa selemo.⸥ 31 Aku-sipa na-kolo ‘⸤Mini Kake Sélimuni⸥ tondolo moke sepa we silimúmanga se liembo.’ konopu lekole ⸤yomboma⸥ olandopa ⸤lipa tapondolemo⸥ tondoloma ono tondolo munduku ‘Paa liemili.’ ningu konopu kimbu siku molangi.
12:31—13:13
Olio ⸤Yomboma⸥ Konopu Mondomolomonga Ungu Se (12:27-31 kinia pea kanou)
⸤ ‘Tondolo olandopa akuma liemili.’ níngi liemu peanga na-kolo⸥ kiniá nane ono ulu paa peanga olandopa seko molonge mele nimbu simbú sekero.
<- U-KORINI 11U-KORINI 13 ->
