1 On gibunai yau ait on anea bat tafanam ususus bat on nan sitatawar, yabat engon bat on imasi sibotanen onai men yabat tani tafanamai, o kamitai, o wengar tani aurin itsisin mes. 2 Ato yau ait anea tani on wera matan emon i’nat, on imanai on God Yayawasin an kufofot ibo i’nat. On fonan aumiet iyor atonio osi anea bat auris, osi on God faiwar ites tafanam a kamit sitikomasen mes. 3 Anea iyau, “Omi men tafanam, kamit o wengar wonikomasen mes, ab ainau wei on God an kufofot On an agirotis unisi wankufofoten weie omi sawar wonikomasen.” 4 Ato yau siyawureu on sabu ato osi iyabon God an kufofot unisi ikufofoten on engon 144,000. Osi on dam auyotoat sasagis ruam Israel emon. 5 Ato sabu engon 12,000 on Judah an dam emon on God an kufofot sibo; sabu engon 12,000 on Reuben an dam emon; sabu engon 12,000 on Gad an dam emon; 6 sabu engon 12,000 on Asher an dam emon; sabu engon 12,000 on Naphtali an dam emon; sabu engon 12,000 on Manassah an dam emon; 7 sabu engon 12,000 on Simeon an dam emon; sabu engon 12,000 on Levi an dam emon; sabu engon 12,000 on Issachar an dam emon; 8 sabu engon 12,000 on Zebulun an dam emon; sabu engon 12,000 on Joseph an dam emon; a sabu engon 12,000 on Benjamin an dam emon. Osi dam sabu engon tutufin on God an kufofot siboen.

9 On gibunai yau matau ait ato sabu kuayo irat kwakwan men iyafan tani on sabu engon tutufin itiyab fofonin on! Osi sabu engon tutufin on usis ta ta emon, dam ta ta emon, tafanam ta ta emon a dura ta ta emon, ato osi on Mamage a Orot Foro Sheep boboun nanai asi beber kakakaiis weromis simonag yasisirai sitawar ato imasi on yafi rorous sibotanen. 10 Osi fonas aumiet bag siyor siyau, “God On iyawasit, On mamageai Orot Foro Sheep boboun rus semama!” 11 Anea engon tutufin, sabu kawian a sawar yayawasis bat on engon mamage sikufifinai sitatawar. Namon osi mamage nanai magis ainau isur sifeu sindas sirou ato God sikwafirai, 12 si’yau, “Dura bag! Baifain baiduduranin, On Wabin Gagamin, gigiboan, baikakaiu, bogagaiin, faiwar a wani, osi engon tutufin on ati God ebinoanai au wantoan au wantoan! Dura bag!”

13 Orot kawian tani itetemiu iyau, “Atonio osi sabu iyabon on beber weromis simonag, osi on men emon ne sinat i?”

14 Yau aiyafotai au, “Bada, yau men asagob.” Ato yau aiyafotai awur au, “Ato om usagob osi men emon sinat.” On iyawureu iyau, “Atonio osi sabu on baikokosar komasin si’boai on yawasis wat sinat sigat. Osi on asi beber weroromis sisouen ato Orot Foro Sheep boboun an taraiai on siyamen sikakai. 15 On fasinai osi on God an mamage nanai setatawar fom a ra On an tafaror goai nan sebiagirai. On Iyafan mamageai emama on arimon osi bisisi nan inama inrufafares. 16 Osi arimon men meyan bayu mes sinarab o sareu mes anjos intein; o osi arimon men wera an forabinai nan usis inraran inforab mes o men sawar forabin tani on iniyamai inarasis mes; 17 yabin Orot Foro Sheep boboun On mamage basunai emama on arimon osi asi Kaifarotin mes inama ato On arimon inbonanawaiis sinan sareu dogu emon egeg yawas ebites on nan singat. Ato God arimon matasi emon maturus engon insafanen.”

<- Revelation 6Revelation 8 ->