1 Pero li vo'ote ja' no'ox me xaval c'usi lec ti xco'laj xchi'uc sc'op Diose. 2 Li moletique albo ya'yic ti mu me xyacubique, ti ja' ac'o yaq'uic ta ilel c'usi lec ta pasele, ti ac'o snopic lec c'usi ta spasique, ti ja' ac'o xch'unic li sc'op Dios ti ja' melele, ti ac'o c'uxubinvanicuque. Ac'o oyuc lec stsatsal yo'ntonic yu'un jech chcuch yu'unic li c'usitic ta xtal ta stojolique. 3 Albo ya'yic noxtoc li me'eletique ti ja' ac'o spasic c'usitic leque, ti oyuc lec smelol c'usi chalique, ti mu me snopbeic smul xchi'iltaquique, ti mu me xyacubique. Ac'o yaq'uic ta ilel c'usi lec ta pasel. 4 Ja' no'ox jech xu' ta xchanic ec li tsebetique. Ac'o yalbeic ti ac'o sc'an lec smalalique xchi'uc ti ac'o xc'uxubin lec yolique. 5 Ac'o yalbeic ti ac'o snopic lec c'usitic tspasique, ti mu me ja'uc snopic li c'usitic chopole. Ac'o xchanubtasic c'usi stac' pasel tey ta yut snaic yu'un jech ta xbijubic o li tsebetique. Ac'o yalbeic ti lecuc no'ox yo'ntonique, ti ac'o xch'unbe smantal smalalique. Me jech ta spasique, mu'yuc boch'o xu' chopol ta xc'opoj ta sventa li sc'op Dios jch'unojtique.

6 Albo lec mantal noxtoc li queremetique ac'o snopic lec li c'usitic tspasique. 7 Ac'bo yilic li c'usi lec ta pasele yu'un jech ta xchanic. Lecuc me xachanubtasvan, oyuc me lec smelol c'usi chaval. 8 Me lec scotol c'usi chavale xchi'uc c'usi chachanubtasvane, jech mu'yuc boch'o xu' ta sta amul. Me jech ta jpastique, tey ta xq'uexov stuquic li boch'otic chiscontrainutique.

9 Albo c'usi lec ta pasel noxtoc li boch'otic chonbilic ta mozoile ti ac'o xch'unbeic smantal yajvalique. Albo ti ac'o xch'unic c'usi ch‑albatique, ti mu me staq'uilanique. 10 Xchi'uc ti mu me xelc'anbeic c'usitic oy yu'un yajvalique. Ac'o yaq'uic ta ilel ti tuc' yo'ntonique jech ta x'ich'at ta muc' Dios ta sventaic, ja' li Jcoltavanej cu'untique.

11 Ja' jech tsc'an ta jpastic yu'un laj xa yac' ta ilel ti ep sc'anojutic li Diose, yu'un laj yac' Xnich'on yu'un jech ac'o coluc scotol cristianoetic. 12 Yu'un ep sc'anojutic li Diose, jech tsc'an ac'o jcomtsantic li c'usitic chopole xchi'uc li c'usitic tsc'an jbec'taltic ti ja' sventa no'ox banamile. Tsc'an ac'o jnoptic lec li c'usitic ta jpastique. Tsc'an ti tuc' co'ntontique, ti jun co'ntontic ac'o jpastic c'usi tsc'an Dios ti jayib c'ac'al cuxulutic li' ta banamile. 13 Jech jun co'ntontic ta jmalatic c'usi ora chtal li Dios cu'untique, ja' li Jesucristo ti la scoltautique. Toj ech'em xojobal ti c'alal ta xtale. Jech xcuxet no'ox co'ntontic yu'un ta xcotquintic. 14 Ja' ti laj yac' sba ta milel ta jcojtic yu'un jech mu xistsalutic li c'usi chopole. La slecubtasbutic co'ntontic jech xnich'nabutic xa lijc'ot o, yu'un jech scotol co'ntontic ac'o jpastic li c'usitic leque.

15 Ja' tsc'an ti jech chachanubtase, ti jech chatsatsubtasbe yo'ntonique. Me oy boch'o mu sc'an xch'un li c'usi chavale, tsots xavalbe mantal yu'un ac'bilot avabtel yu'un Dios ti xu' chaval mantale. Ac'o sna' scotolic ti jech tsc'an Dios li c'usi chavalbee.

<- TITO 1TITO 3 ->