1 Li boch'otic i'ochic ta banquilal pale yu'un jchi'iltactic ta israelale ja' yabtel ic'opojic ta stojol Dios yu'un li jchi'iltactique. Yu'un ja' laj yaq'uic ta stojol Dios li ch'ich' sventa tspasbatic o perdón yu'un smulic jchi'iltactique. 2 Yu'un cristiano ec li banquilal palee, jech la xc'uxubin li boch'otic mu sna' c'usi lec tspasique xchi'uc li boch'otic chlo'laatic yu'un c'usi chopole. 3 Ta sventa ti cristiano eq'ue jech persa laj yac' ch'ich' ta stojol Dios yu'un jech ipasbat perdón yu'un smul stuc ec, jech chac c'u cha'al la spas ta sventa li jchi'iltactique.
4 Mu'yuc boch'o la stic' sba stuc ta banquilal pale. Persa t'ujbil yu'un Dios li boch'o i'oche jech chac c'u cha'al t'ujbil yu'un Dios li Arone. 5 Ja' no'ox jech ec li Cristoe, muc stucuc la sc'an ti i'och ta banquilal pale cu'untique; ja' t'ujbil yu'un Dios. Yu'un jech ono'ox i'albat yu'un li Stote:
Vo'ot Jnich'onot, ta to xcac' ta ilel ti vo'ot Jnich'onote,
x'utat ono'ox. 6 Jech i'albat noxtoc yu'un li Stote:
Vo'ot cha'och ta banquilal pale sventa sbatel osil.
Chib avabtel chavich' jech chac c'u cha'al chib yabtel laj yich' li Melquisedec ta vo'onee.
I'och ta banquilal pale, i'och ta ajvalilal noxtoc,
x'utat ono'ox. 7 C'alal li' to'ox oy ta banamil li Cristoe, yich'oj sbec'tal jech chac c'u cha'al vu'utic. Jech c'alal po'ot xa ta xchame, ep vocol laj ya'i, ep la sc'opan Dios. C'alal la sc'opan Diose, tsots i'avan xchi'uc i'oc'. La sc'anbe Dios ti xu'uc chcoltaate yu'un jech mu xcham. Ta sventa ti laj yich' ta muc' Diose jech i'a'ibat sc'op, jech muc j'ech'eluc xcham o. 8 Ac'o me Xnich'on Dios pero laj yich' vocol. Ta sventa ti laj yich' vocole, jech laj ya'i c'u x'elan ta ch'unel li c'usi tsc'an Diose. 9 Ta sventa ti ivu' yu'un la spas scotol c'usitic tsc'an Diose, jech xu' yu'un tscolta sbatel osil scotol li boch'otic ta xich'ic ta muq'ue. 10 Yu'un ja' jech yabtel i'ac'bat yu'un Dios jech chac c'u cha'al li Melquisedeque. Ja' i'och ta banquilal pale cu'untic xchi'uc i'och ta ajvalilal cu'untic noxtoc.
Ja' smelol c'alal i'albatic ti ololic to ta stojol Diose
11 Oy to ep c'usi ta jc'an ta xcalboxuc ta sventa li banquilal pale cu'untique, pero vocol ta xcalboxuc yu'un mu xa xac'an xava'yic. 12 Vo'one xa laj ach'unic, jchanubtasvanejoxuc xa ti jechuque. Pero tana tsc'an ta sliqueb chavich'ic chanubtasel ta sc'op Dios yan velta yu'un ilaj stsatsal avo'ntonic. Jech chu'il to chac'anic yu'un mu to xu' avu'unic li stsatsal ve'lile. 13 Li boch'otic chu'il to tsc'anique yu'un ololetic to. Ja' jechoxuc li vo'oxuque yu'un mu to xana'ic c'usi lec ta pasel. 14 Yan li stsatsal ve'lile ja' sventa li boch'otic oy xa stsatsal yo'ntonic ta stojol Diose, yu'un nopen xa xa'yic spasel li c'usitic leque xchi'uc nopen xa xa'yic mu spasic li c'usitic chopole.
<- HEBREOS 4HEBREOS 6 ->
