3
Ja' smelol ti ja' ch‑ich'at ta muc' li Jesuse, ja' mu x'ich'at ta muc' li Moisese
1 Quermanotac, co'ol xa lecubtasbilutic yu'un li Diose, co'ol sc'oplal chijyic'utic batel ta vinajel. Jech nopilan ava'yic c'u x'elan li Jesús ti jch'unojtic ti itacat tal yu'un Dios yu'un tal yalbutic c'u x'elan chijcole, xchi'uc ti i'och ta banquilal pale cu'untique. 2 Jun yo'nton ta stojol li Dios ti ja' i'ac'bat yabtele jech chac c'u cha'al jun yo'nton ta stojol Dios ec li Moisés ti i'ac'bat sventain yu'un Dios scotol li jmoltotactic ta vo'one ti co'ol t'ujbilic yu'un Diose. 3 Pero li Jesuse ja' ch‑ich'at ta muc'; ja' mu x'ich'at ta muc' li Moisese. Jech chac c'u cha'al ja' ich'bil ta muc' li jpasnae; yan li nae mu x'ich'at ta muc'. 4 Yu'un li jujubej nae persa oy boch'o tspas ti jech tsmeltsaje. Ja' no'ox jech li c'usitic oye ja' spasben Dios scotol. 5 Li Moisese jun yo'nton la sventain li jmoltotactic ta vo'one ti co'ol t'ujbilic yu'un Diose. Ti c'u x'elan yabtele ja' senyail ti chtal li mero banquilal cu'untique, ja' li Cristoe. Yu'un li Moisese yajtunel Dios no'ox. 6 Yan li Cristoe ja' Xnich'on Dios. Jech jun yo'nton tsventainbe li yan xnich'nab Stote. Li yan xnich'nab Stote ja' vu'utic ti me jun co'ntontic o ta stojol c'alal to ta slajebal c'ac'ale, xchi'uc me xcuxet no'ox co'ntontic ta jmalatic chtal yic'utique.
Ja' smelol ti tsc'an mu jtsatsubtas co'ntontique
7-8 Yu'un ja' más tsots yabtel laj yich' li Xnich'on Diose, jech tsc'an ti mu xatsatsubtas avo'ntonic jech chac c'u cha'al ts'ibabil ta sc'op Diose. Yu'un jech chayalboxuc ec li Ch'ul Espíritu li' ta orae:
Me laj ava'yic la sc'opanoxuc Dios li' ta orae,
mu me xatsatsubtas avo'ntonic jech chac c'u cha'al la spasic tey ta xocol banamil li amoltot ayame'ic ta vo'one ti c'alal iq'uelbat yo'ntonic yu'un Diose.
Muc xch'unic li c'usi i'albatique.
9 Ac'o me laj yilic c'usi la spas Dios ta stojolic cha'vinic jabil,
pero ep ta velta ijelovic ta stojol.
10 Jech li Diose i'ilin ta stojolic ta sventa ti jech la spasique.
Jech laj yal: “Jech yo'ntonic o ti mu sc'an xch'unic c'usi ta xcalbeique.
Mu sc'an xtalic ta lequil be cu'un.
11 Jech chi'ilin yu'unic.
Ta xcal ti j'ech'el mu x'ochic o ti bu caloj chcux yo'ntonique”,
xi li Diose, xi li Ch'ul Espíritue.
12 Quermanotac, q'uelo me abaic. Mu me oyuc tsots avo'ntonic yu'un jech mu xa xach'unic ti ja' chascoltaoxuc li bats'i cuxul Diose. Yu'un me jech avo'ntonique, xu' chacomtsanic o li Diose. 13 Jech tsc'an ti scotol c'ac'al chatsatsubtasbe aba avo'ntonic ti c'alal yorail to oy coltaele, yu'un naca me tsatsubuc avo'ntonic ta sventa ti chalo'laatic to yu'un c'usitic chopole. 14 Yu'un me jun co'nton jch'unojtic o c'alal to ta slajebal c'ac'al jech chac c'u cha'al lic jch'untique, co'ol chijcuxiutic o sbatel osil jchi'uctic li Cristoe.
15 Ja' yu'un jech chal li Ch'ul Espíritue:
Me laj ava'yic la sc'opanoxuc Dios li' ta orae,
mu me xatsatsubtas avo'ntonic jech chac c'u cha'al la spasic ta vo'one ti muc xch'unic c'usi i'albatic yu'un Diose,
xi. 16 ¿Boch'o sc'oplalic ti jech muc xch'unic c'usi i'albatic yu'un Diose? Ja' sc'oplalic scotol li jmoltotactic ta vo'one ti iloq'uesatic tal ta mozoil ta Egipto yu'un Moisese. 17 ¿Boch'o sc'oplalic ti i'ilintaatic yu'un Dios cha'vinic jabile? Ja' noxtoc li jmoltotactic ta vo'one ti chopol c'usi la spasique jech tey ichamic ta xocol banamil. 18 ¿Boch'o sc'oplalic noxtoc ti i'albatic yu'un Dios ti j'ech'el mu x'ochic o ti bu yaloj chcux yo'ntonique? Ja' noxtoc li jmoltotactique yu'un muc xch'unic ti chcoltaatic yu'un Diose. 19 Jech chquiltic ti ja' ta sventa muc xch'unic ti jech muc x'ochic o ti bu sc'oplal chcux yo'ntonique.
Ja' smelol ti ja' ch‑ochic ti bu chcux yo'ntonic li boch'otic ta xch'unic ti ja' chcoltaatic yu'un Diose