1 Quermanotac, ti mi oy buchꞌu tey ta atojolic ti laj sta smule, ti voꞌoxuc ti ventainbiloxuc yuꞌun ti Chꞌul Espíritue, coltaic me, yoꞌ jech ta xchaꞌtam ti coltaele. Pero ta slequilaluc avoꞌntonic pasic. Bijanic me, naca mi jech cꞌotuc ta atojolic ec. 2 Cuchbo abaic ti avocolic ta jujun tale. Ti mi jech ta xapasique, jaꞌ ta xapasbeic smantal ti Cristoe. 3 Ti mi oy buchꞌu xuꞌ yuꞌun xaꞌi sbae ti cꞌalal mu jechuque, jaꞌ noꞌox ta sloꞌla sba stuc. 4 Ta jujun tal, acꞌo sqꞌuel sba ti cꞌu sꞌelan ta spase. Mi ta xil ti lec ti cꞌusi ta spase, xmuyubaj ti yoꞌntone. Mu jaꞌuc noꞌox ta sbis sba ta stojol ti yane. 5 Yuꞌun ti cꞌusi ta jpastique, ta xcom ta jbatic.
6 Ti buchꞌu ta xichꞌic chanubtasel ta sventa ti lequil achꞌ cꞌope, ti cꞌusi oy yuꞌunique, acꞌo xchꞌaquic yoꞌ ta scoltaic ti yajchanubtasvanejique. 7 Mu xaloꞌla abaic. Yuꞌun mu stacꞌ xichꞌ labanel ti Diose. Ti cꞌusi ta stsꞌun ti vinique, jaꞌ jech ta stsob sutel. 8 Ti mi oy buchꞌu ta spas ti cꞌusi lec ta xaꞌi ti yoꞌntone, ti jech ta spas taje, jaꞌ ta sta ti ta xchame. Yan ti buchꞌu ta spas ti cꞌusi ta scꞌan ti Chꞌul Espíritue, jaꞌ jech xtoc umbi, ta sta batel scuxlejal ti ta xꞌacꞌbat yuꞌun ti Chꞌul Espíritue. 9 Jech o xal un, mu me xijlubtsajotic ta spasel ti leque. Yuꞌun mi mu xchibaj ti coꞌntontique, ta sta scꞌacꞌalil ti ta jtsobbetic ti sate. 10 Jech o xal un, cacꞌtic batel persa ta spasel ti cꞌusi lec ta stojol scotolique. Pero jaꞌ más tsots scꞌoplal ti acꞌo jpastic lec ta stojol ti quermanotique.
Slajeb chabanuc schiꞌuc ti bijubtasel
11 Qꞌuel avil smucꞌtiquil ti jletra ti ta jtsꞌibaboxuc ta jcꞌob jtuque. 12 Ti buchꞌutic ti ta sujoxuc ta yichꞌel ti circuncisione, jaꞌ noꞌox ta spasic yoꞌ jech lec scꞌoplalic yuꞌun ti cristianoetique. Yuꞌun mu scꞌanic ilbajinel ti jech jamal ta xalic ti icham ta cruz ti Cristoe. 13 Ti buchꞌutic ta xalic scꞌoplal ti circuncisione, mi jaꞌuc ta spasic scotol ti cꞌusi ta xal ti mantale. Pero ti stuquique ta scꞌanic ti acꞌo avichꞌic ti circuncisione, yoꞌ jech cajal ta xaꞌi sbaic ti laj sujoxuc ta yichꞌel smarcail ti abecꞌtalique. 14 Yan ti vuꞌune jaꞌ noꞌox tsots scꞌoplal ta xcaꞌi ti icham ta cruz ti Cajvaltic Jesucristoe. Ti jech icham ta cruz ti Cristoe, jech o xal un, laj scꞌoplal ta coꞌnton ta xcaꞌi ti sba banomile. Jaꞌ jech xtoc mu xa xitun ta xiꞌilat yuꞌun ti sba banomile. 15 Ti mi junotic schiꞌuc ti Cristo Jesuse, coꞌol noꞌox sba mi quichꞌojtic o mi muꞌyuc quichꞌojtic ti circuncisione. Ti tsots scꞌoplale, jaꞌuc ti pascutic ta achꞌ cristianoe. 16 Scotol ti buchꞌutic ti jech ta xichꞌ ta mucꞌ ti vaꞌi sꞌelan laj cale, ti buchꞌutic ta melel yalab snichꞌnab ti Diose, acꞌo yichꞌic ti spatobil yoꞌntonique, ti cꞌuxubinele.
17 Avi tana un, liꞌ ta xlic batel ti mu jcꞌan ti oy buchꞌu ta saꞌbun ti jmule. Yuꞌun ti jech oy señail ti syayijemal ta jbecꞌtale, jaꞌ svinajeb ti yajtunelun ti Cajvaltic Jesucristoe.
18 Acꞌo yacꞌboxuc bendición ti Cajvaltic Jesucristo acotolique, Quermanotac. Jechuc.
