LIꞌI JAꞌ SVUN TI APOXTOL PABLOE TI ISTSꞌIBABE TI MUCHꞌUTIC XCHꞌUNOJIC SCꞌOP RIOX TA ESTADO GALACIAE

1 Voꞌon Pabloon, yajꞌapoxtolon ti Cajvaltic Jesuse. Maꞌuc crixchano ti listac ta yalel aꞌyuc li scꞌop Rioxe. Jaꞌ listac ta yalel aꞌyuc ti Jesucristoe xchiꞌuc ti Jtotic Riox ta vinajele ti ixchaꞌcuxes loqꞌuel ta smuquenal ti Jesucristoe. 2 Chajcꞌoponticotic tal ta vun ti jayvoꞌoticotic liꞌi, voꞌoxuc ti achꞌunojic xa li scꞌop Rioxe ti butic jteclumal nacaloxuc ta estado Galaciae. 3 Acꞌu yacꞌboxuc crasia ti Jtotic Riox ta vinajele xchiꞌuc ti Cajvaltic Jesucristoe. Junuc me avoꞌonic, mu me cꞌusi xal avoꞌonic. 4 Ti Cajvaltic Jesucristoe iyacꞌ sba ta milel ta scoj jmultic yoꞌ xcom o cuꞌuntic li cꞌusitic chopol liꞌ ta sba balamile. Yuꞌun jaꞌ yech iscꞌan ti Jtotic Riox ta vinajele. 5 Yechꞌo ti jaꞌ chquichꞌtic ta mucꞌ ta sbatel osile. Toj lec ti jaꞌ yech chcꞌote.

Jaꞌ liꞌ yaloj ti mu cꞌusi yan ti xuꞌ chicuxiotic o ta sbatel osile, jaꞌ noꞌox ti Jesucristoe

6 Toj chꞌayel o coꞌon avuꞌunic ti oy jayvoꞌoxuc ti ora avicta abaic ta yichꞌel ta mucꞌ ti Rioxe. Ti istoj amulic ti Cristoe, jaꞌ yoꞌ xacuxiic o ta sbatel osile, yechꞌo ti layiqꞌuic ti Rioxe. Lavie yan xa o cꞌusi chachꞌunic ti chacuxiic o ta sbatel osil ti avalojique. 7 Mu cꞌusi yan ti chicuxiotic o ta sbatel osile, jaꞌ noꞌox li cꞌusi lacalbeique. Li cꞌusi noꞌoxe, yuꞌun oy muchꞌutic chayalbeic ti maꞌuc yech ta chꞌunele, yechꞌo ti oy chavicta abaique. Yuꞌun mu jamluc chalic ti jaꞌ noꞌox chacꞌ cuxlicotic ta sbatel osil ti Cristoe. 8 Pero mi oy muchꞌu chtal yalboxuc scꞌop Riox ti mu xcoꞌolaj chac cꞌu chaꞌal lacalbeique, acꞌu acꞌbatuc castico yuꞌun ti Rioxe, muc ta alel muchꞌuuc, acꞌu mi voꞌoticoticuc, acꞌu mi anjel ta vinajel. 9 Li cꞌusi lacalbeique, chacalbeic to otro jꞌechꞌel. Mi oy muchꞌu chayalbeic scꞌop Riox ti mu xcoꞌolaj chac cꞌu chaꞌal achꞌunojique, acꞌu acꞌbatuc castico yuꞌun ti Rioxe.

10 Ti jaꞌuc ta jcꞌan ti lec chiyil li crixchanoetique, maꞌuc yech lacalbeic ti yechuque. Ti jaꞌuc ta jcꞌane cheꞌe, yuꞌun mu jchꞌun cꞌusi chiyalbe ti Jesucristoe. Lavie jaꞌ ta jcꞌan ti lec chiyil ti Rioxe, yechꞌo ti jaꞌ yech lacalbeique.

Jaꞌ liꞌ yaloj ti tꞌujbil ti Pabloe ti chalbe scꞌop Riox ti muchꞌutic maꞌuc xchiꞌil ta jurioale

11 Voꞌotic ti jchiꞌil jbatic ta xchꞌunel li scꞌop Rioxe, ti ay cal avaꞌiic ti jaꞌ noꞌox chacꞌ jcuxlejaltic ta sbatel osil ti Jesucristoe, maꞌuc crixchano isnop. 12 Maꞌuc crixchano liyalbe lixchanubtas. Jaꞌ liyalbe ti Jesucristoe.

13 Avaꞌyojic xa ti cꞌusi ijpas ti cꞌalal jaꞌ toꞌox yech jchꞌunoj chac cꞌu chaꞌal xchꞌunojic li jchiꞌiltac ta jurioale ti cꞌalal mu toꞌox ta jchꞌun ti jaꞌ chacꞌ jcuxlejaltic ta sbatel osil ti Cristoe. Iquilbajin tajmec li muchꞌutic xchꞌunojic li scꞌop Rioxe. Yuꞌun ta jchꞌaybe scꞌoplal ti caloje. 14 Li cꞌusitic jchꞌunoj toꞌox xchiꞌuc li jchiꞌiltaque, voꞌon más jnaꞌbe smelol. Jaꞌ mu masuc snaꞌbeic smelol li jchiꞌiltac ta chꞌiele. Ti caloje, mu jcꞌan ti ta xchꞌay ti cꞌusitic ixchꞌunic ti jtot jmeꞌticotic ti ta más voꞌnee yuꞌun sjunul toꞌox coꞌon jchꞌunoj uc. 15 Pero ti Rioxe listꞌuj ti cꞌalal mu toꞌox chiꞌayane. Yuꞌun lec yoꞌon, yechꞌo ti liyiqꞌue. 16 Ti cꞌalal liyiqꞌue, iyacꞌ cojtiquinbe ti Xchꞌamale yoꞌ xacalbe o avaꞌiic voꞌoxuc ti maꞌuc juriooxuque, ti jaꞌ chacꞌ jcuxlejaltic ta sbatel osil ti Xchꞌamale. Ti cꞌalal liyiqꞌue, muc muchꞌu ijacꞌbe ti cꞌusi ta jpase. 17 Muc bu ay jacꞌbe ta Jerusalén ti muchꞌutic baꞌyi iꞌochic ta yalel aꞌyuc li scꞌop Rioxe. Ora libat ta Arabia. Tsꞌacal to lisut ta jteclum Damasco.

18 Jaꞌto libat ta Jerusalén ti cꞌalal ilocꞌ oxib jabile. Jaꞌ ba jvulaꞌan li Pedroe. Tey ijchiꞌin voꞌlajuneb cꞌacꞌal. 19 Muc bu iquil li yan xchiꞌiltac ta yalel aꞌyuc li scꞌop Rioxe, stuc noꞌox iquil li Jacoboe, li yitsꞌin Cajvaltic Jesuse. 20 Ti Rioxe yiloj ti yech li cꞌusi chajtsꞌibabeique, muc bu ta jnop.

21 Tsꞌacal to libat ta estado Siria xchiꞌuc ta estado Cilicia. 22 Li muchꞌutic yichꞌojic ta mucꞌ Cristo ta estado Judeae, mu toꞌox xiyojtiquinic. 23 Jaꞌ noꞌox yaꞌyojic jcꞌoplal: “Ti muchꞌu liyilbajinotic toꞌoxe, ti taꞌox xchꞌaybe scꞌoplal li scꞌop Rioxe, lavie chal xa ti jaꞌ chacꞌ jcuxlejaltic ta sbatel osil ti Jesucristoe”, xi ti loꞌil iyaꞌiique. 24 “Colaval”, xutic ti Rioxe ti iquichꞌ xa ta mucꞌ ti Jesucristoe.

GALATAS 2 ->