JAꞌ LI SBA SCARTA PEDROE

1-2 Joꞌon Pedroun, joꞌon ta xcal batel li scꞌop li Jesucristoe, chajcꞌoponic ta carta liꞌi, joꞌoxuc li butic noꞌox nacaloxuc ta Ponto balumil schiꞌuc ta Galacia balumile, schiꞌuc ta Capadocia balumile, schiꞌuc ta Asia balumile, schiꞌuc ta Bitinia balumile. Yuꞌun tꞌujbiloxuc onoꞌox yuꞌun li Jtotic Diose ti te chabatic eꞌuc ta vinajele. Voꞌone onoꞌox jech snopoj li Jtotic Diose. Jaꞌ yuꞌun laj xa stuqꞌuibtasoxuc li Chꞌul Espíritue yoꞌ acꞌo xapasic li cꞌusi ta scꞌan li Diose. Jaꞌ yuꞌun chꞌaybil xa amulic ta schꞌichꞌel li Jesucristoe. Acꞌo yacꞌboxuc ep slequilal yutsilal li Diose. Acꞌo spasboxuc ta jun avoꞌonic li jujunoxuque.

3 Acꞌo quichꞌtic ta mucꞌ li Diose, jaꞌ li Dios yuꞌun li Cajvaltic Jesucristoe, jaꞌ li Stote, yuꞌun toj ep iyacꞌ slequilal yutsilal ta jtojoltic jech snichꞌonutic xa o. Jaꞌ yuꞌun jnaꞌojtic xa ti chijcuxiutic sbatel osile yuꞌun ichaꞌcuxi loqꞌuel ta smuquenal li Jesucristoe. 4 Li jcuxlejaltic ti chijyacꞌbutique muꞌyuc slajeb, te oy sbatel osil te ta vinajel ti bu mu xa cꞌusi chopol chcaꞌitique. 5 Yuꞌun jchꞌunojtic ti chiscoltautic li Diose, chischabiutic o cꞌalal to chcꞌot scꞌacꞌalil ti chijcolutique. Yuꞌun oy schꞌultsatsal, xuꞌ yuꞌun chischabiutic. Yaloj ti chijcolutique. Ta xquiltic li cꞌalal poꞌot xa slajeb cꞌacꞌale.

6 Ta sventa ti achꞌunojic ti chacolique, xamuybajic noꞌox manchuc mi yan sba chavichꞌic vocol mi tscꞌan Dios jeche. Pero mu jaluc ta xquichꞌtic li vocole, yuꞌun mu jaluc cuxulutic liꞌ ta balumile. 7 Yuꞌun cꞌalal ta xquichꞌtic li vocole, jaꞌ to te chvinaj mi ta melel jchꞌunojtic ti jaꞌ Cajcoltavanejtic li Cristoe. Jech chac cꞌu chaꞌal li cꞌanal taqꞌuin ti cꞌalal ta xtiqꞌue ta cꞌoqꞌue, ti jaꞌ to te chvinaj mi ta melel ti jaꞌ cꞌanal taqꞌuine. Li cꞌanal taqꞌuine toj lec pero snaꞌ xlaj. Yan ti jchꞌunojtic ti jaꞌ Cajcoltavanejtic li Cristoe, muꞌyuc slajeb sbatel osil. Cꞌalal ta xchaꞌsut talel li Jesucristoe, mi icuch cuꞌuntic vocol ta sventa ti la jchꞌuntic ti chiscoltautique, xmuybaj noꞌox cuꞌuntic, schiꞌuc lec chijyilutic. Chijyacꞌutic ta ichꞌel ta mucꞌ.

8 Acꞌo mi muc bu avilojic li Jesucristoe, pero oy ta avoꞌonic. Acꞌo mi mu xavilic li avie, pero achꞌunojic xa ti jaꞌ Avajcoltavanejique. Jaꞌ yuꞌun xamuybajic o. Mu xlaj ta alel yuꞌun toj echꞌem schꞌulequil. 9 Yuꞌun xanaꞌic ti chacolic sbatel osil ta sventa ti achꞌunojic xa ti jaꞌ Avajcoltavanejic li Jesucristoe.

10-11 Li buchꞌutic iyalic scꞌop Dios ta voꞌonee, iyalic ti ta onoꞌox xcꞌot scꞌacꞌalil ti ta stac talel li Cajcoltavanejtic li Diose, yuꞌun jech iꞌacꞌbat ta sjol yoꞌonic yuꞌun li Chꞌul Espíritu ti junic schiꞌuc li Cristoe. Cꞌalal iꞌacꞌbat ta sjol yoꞌonique, ta sloqꞌuel yoꞌonic la sjacꞌbeic li Dios ti cꞌu ora chcꞌot ta pasele schiꞌuc ti cꞌu sba chojtaquinique. Yuꞌun cꞌalal iyalic li cꞌu sba chtal yichꞌ vocol ta jcojtic li Cristoe, schiꞌuc ti tsꞌacal to ta xꞌichꞌe ta muqꞌue, ep toꞌox jabil scꞌan xtal ta balumil li Cristoe. 12 Cꞌalal la sjaqꞌuique, iꞌacꞌbat snaꞌic yuꞌun Dios ti mu xa xilic li stuquique yuꞌun joꞌotic chcꞌot ta jtojoltic. Li buchꞌutic laj yalboxuc avaꞌiic ti jaꞌ noꞌox xuꞌ chijcol ta sventa li Cristoe, jaꞌ acꞌbilic ta sjol ta yoꞌonic yuꞌun li Chꞌul Espíritu li tacbil talel ta vinajele. Ta sventa li Chꞌul Espíritue laj yalboxuc ti jaꞌ noꞌox xuꞌ chacolic ta sventa li Cristoe jech chac cꞌu chaꞌal laj yal onoꞌox li buchꞌutic iyalic scꞌop Dios ta voꞌonee. Li yajꞌangeltac li Diose chac yaꞌibeic smelol eꞌuc ti cꞌu chaꞌal laj yichꞌ sbecꞌtal, ti cꞌu chaꞌal la smilic li Cajvaltique.

13 Ti la xa scꞌuxubinoxuc li Diose, jaꞌ yuꞌun scꞌan chanopic lec li cꞌustic chapasique. Junuc avoꞌonic chꞌunic ti ta jꞌechꞌel chatuqꞌuibic o li cꞌalal to chchaꞌtal li Jesucristoe. 14 Yuꞌun snichꞌonoxuc xa li Diose, jaꞌ yuꞌun scꞌan xachꞌunic li cꞌustic chayalbeique. Maꞌuc xa me xapasic li cꞌustic chacꞌan atuquique jech chac cꞌu chaꞌal la apasic ta voꞌonee. 15 Scꞌan ti naca lec tucꞌ li cꞌustic chapasique schiꞌuc li cꞌustic chavalique, yuꞌun tucꞌ yoꞌon li Dios li laj yicꞌoxuque. 16 Yuꞌun jech yaloj li Diose: “Tucꞌuc me avoꞌonic ta jtojol yuꞌun tucꞌ coꞌon li joꞌone”, xi tsꞌibabil.

17 Mi ta melel ti jaꞌ xa atot chavaꞌiic li Dios li parejo tucꞌ chichꞌ jcꞌoptic li cꞌu sba chijꞌechꞌ ta balumile, ichꞌic me ta mucꞌ scotol cꞌacꞌal. Yuꞌun muc to bu cꞌotemoxuc ta mero alumalique, jaꞌ li vinajele. 18 Naꞌic me ti toyol atojolic la stojoxuc li Diose, jaꞌ yuꞌun mu xa me xapasic li cꞌustic laj yalboxuc comel atot ameꞌic li cꞌusi muꞌyuc sbalile. Xanaꞌic ti muꞌyuc slajeb li cꞌusi la stojoxuc o li Diose. Yuꞌun maꞌuc ta taqꞌuin la stojoxuc o. 19 Ta schꞌichꞌel Cristo la stojoxuc. Yuꞌun jaꞌ laj yacꞌ sba ta milel jech chac cꞌu chaꞌal imileic li chexel chijetic ta voꞌonee. Li chexel chijetic li imileic ta voꞌonee toj lequic. Jaꞌ svinajeb li Cristo ti tucꞌ yoꞌon, ti muꞌyuc smule. 20-21 Ti tal yacꞌ sba ta milel ta scoj jmultic li Cristoe, yuꞌun jech onoꞌox snopoj li Dios li cꞌalal muꞌyuc toꞌox li vinajel balumile. Pero muc bu ital ta ora. Jaꞌ to iꞌay li cꞌalal poꞌot xa slajeb balumile. Joꞌotic ta jcojtic li iꞌaye ti acꞌo jchꞌuntic ti ta melel chiscoltautic li Diose. Li Diose la schaꞌcuxes loqꞌuel ta smuquenal li Snichꞌone, ta tsꞌacal laj yicꞌ batel ta stojol. Ti la schaꞌcuxes li Snichꞌon li Diose, jchꞌunojtic ti jaꞌ noꞌox jech chischaꞌcuxesutic eꞌuc li Diose.

22 Ta sventa ti achꞌunojic xa ti melel li cꞌusi yaloj li Diose, tuqꞌuibem xa avoꞌonic, jaꞌ yuꞌun cꞌux ta avoꞌonic scotol li buchꞌutic coꞌol avichꞌojic ta mucꞌ li Cajvaltique. Mu jechuc noꞌox ta xlocꞌ ta aveic ti cꞌux ta avoꞌonique. Jaꞌ yuꞌun ta sloqꞌueluc me avoꞌonic cꞌuxubino me aba acotolic. 23 Yuꞌun chaꞌvoqꞌuemoxuc xa ta achꞌ yaꞌel ta sventa li scꞌop Dios li muꞌyuc slajeb sbatel osile. Mu xcoꞌolaj li cꞌu sba lijvocꞌ ta jtot jmeꞌtic ti ta onoꞌox xijchame. 24 Yuꞌun jech tsꞌibabil ta scꞌop li Diose: