1 Li joꞌoxuc li coꞌol quichꞌojtic ta mucꞌ li Cajvaltique, ti cꞌuxoxuc ta coꞌone, mu me xachꞌunic cꞌusiuc noꞌox chaꞌalbatique. Aꞌiic lec baꞌi mi jmoj schiꞌuc scꞌop Dios li cꞌusi ta xalique. Yuꞌun oy ep jloꞌlovanejetic liꞌ ta balumile ti scꞌop Dios chalic spꞌisoj sbaique. 2 Ta sventa li cꞌusi chalique, jaꞌ ta xvinaj o mi jaꞌ yichꞌojic li Chꞌul Espíritu ti junic schiꞌuc li Diose. Mi jamal chalic ti iꞌay ta balumil li Jesucristoe, ti iyichꞌ sbecꞌtal jech chac cꞌu chaꞌal li joꞌotique, jaꞌ yichꞌojic li Chꞌul Espíritu ti junic schiꞌuc li Diose. 3 Yan mi mu jamaluc chalic ti iꞌay ta balumil li Jesucristoe, ti iyichꞌ sbecꞌtal jech chac cꞌu chaꞌal li joꞌotique, muc bu yichꞌojic li Chꞌul Espíritu ti junic schiꞌuc li Diose. Jaꞌ coꞌol yoꞌonic yaꞌel schiꞌuc li yajcontra li Cristoe. Avaꞌiojic ti ta onoꞌox xtal li yajcontra li Cristoe. Oy xa liꞌ ta balumil li avie li buchꞌu jech yoꞌonic jech chac cꞌu chaꞌal li yajcontra Cristoe.

4 Quitsꞌinab, joꞌotique snichꞌnabutic xa li Diose, jaꞌ yuꞌun jpasojtic xa ta canal li jloꞌlovanejetique. Yuꞌun scotol xuꞌ yuꞌun li Dios ti liꞌ oy ta coꞌontique. Yan li pucuj li te oy ta yoꞌon li buchꞌutic muc bu yichꞌojic ta mucꞌ li Diose, mu xuꞌ yuꞌun. 5 Li scꞌop Dios ti chalic ti yalojique yuꞌun stuc noꞌox snopojic. Scꞌop noꞌox crixchano li ta xalique. Li crixchanoetique jaꞌ lec chaꞌiic li cꞌustic ch‐albatique yuꞌun sventa noꞌox osil balumil. 6 Yan li joꞌoncutique acꞌbil cabtelcutic yuꞌun Dios, jaꞌ yuꞌun jaꞌ scꞌop Dios li chcalcutique. Li buchꞌutic xojtaquinic xa li Diose chaqꞌuic ta venta li jcꞌopcutique. Yan li buchꞌutic mu xojtaquinic li Diose mu xaqꞌuic ta venta li jcꞌopcutique. Jaꞌ yuꞌun ta xcojtaquintic o li buchꞌutic ta melel jaꞌ scꞌop Dios ti chalique. Ta xcojtaquintic o nojtoc li buchꞌutic jloꞌlovanejetique.

7 Li joꞌoxuc li coꞌol quichꞌojtic ta mucꞌ li Cajvaltique, ti cꞌuxoxuc ta coꞌone, acꞌo me jcꞌuxubinan jbatic. Li Diose chiscoltautic ti acꞌo jcꞌuxubinan jbatique. Mi chijcꞌuxubinvanutique, yuꞌun snichꞌnabutic xa li Diose, xcojtaquintic xa. 8 Yan mi mu xijcꞌuxubinvanutique, yuꞌun mu to xcojtaquintic Dios yaꞌel, yuꞌun stalel onoꞌox li Dios ti chcꞌuxubinvane. 9 Li Diose laj yacꞌ quiltic ti chiscꞌuxubinutique yuꞌun la stac talel ta balumil li Snichꞌone. Pero cꞌajomal jun Snichꞌon oy. Ti la stac talele, jaꞌ sventa chijcuxiutic o sbatel osil. 10 Jaꞌ iyacꞌ ta ilel li cꞌu sba ta jcꞌuxubinan jbatique. Yuꞌun mu joꞌcuticuc baꞌi oy ta coꞌontic li Diose; joꞌotic baꞌi cꞌuxutic ta yoꞌon. Jaꞌ yuꞌun la stac talel li Snichꞌone, a stojbutic jmultic.

11 Joꞌoxuc ti cꞌuxoxuc ta coꞌone, ti cꞌuxutic ta yoꞌon li Diose, jech me acꞌo jcꞌuxubinan jbatic eꞌuc. 12 Acꞌo mi mu xquiltic li Diose, pero mi ta jcꞌuxubinan jbatique, liꞌ oy ta coꞌontic li Diose. Jaꞌ yuꞌun xuꞌ cuꞌuntic chijcꞌuxubinvanutic jech chac cꞌu chaꞌal chcꞌuxubinvan li Diose. 13 Ti ta jnaꞌtic o ti oyutic ta scꞌob li Diose, schiꞌuc ti ta jnaꞌtic o ti liꞌ oy ta coꞌontique, jaꞌ ta sventa li Chꞌul Espíritu li yacꞌojbutique ti junic schiꞌuc li Diose. 14 Li joꞌoncutique iquilcutic, jnaꞌcutic ti ta melel la stac talel ta balumil li Snichꞌon li Jtotic Diose. Jaꞌ Jcoltavanej ta sventa scotol crixchanoetic. 15 Li buchꞌu jamal chal ti jaꞌ Snichꞌon Dios li Jesuse, yuꞌun te oy ta yoꞌon li Diose. Ta scꞌob Dios oy.

16 Jnaꞌojtic xa, jchꞌunojtic ti cꞌuxutic ta yoꞌon li Diose. Li Diose stalel onoꞌox ti chcꞌuxubinvane. Mi chijcꞌuxubinvan eꞌuque, yuꞌun oyutic ta scꞌob. Liꞌ oy ta coꞌontique. 17 Jech xuꞌ cuꞌuntic ta jcꞌuxubinan jbatic. Jaꞌ yuꞌun mu xijxiꞌ li cꞌalal ta xcꞌot scꞌacꞌalil ta xꞌichꞌbat scꞌop scotol li crixchanoetique, yuꞌun cꞌalal liꞌ oyutic ta balumile, jech coꞌontic jech chac cꞌu chaꞌal yoꞌon li Diose. 18 Li buchꞌu ta schꞌun ti cꞌuxubinbil o yuꞌun li Diose, muc bu ta xiꞌ. Ta xcom yuꞌun li xiꞌele yuꞌun snaꞌoj ti cꞌanbil oe. Yan li buchꞌu ta to xiꞌe, yuꞌun ta to snop ti ch‐acꞌbat yichꞌ vocol yuꞌun li Diose. Yuꞌun mu schꞌun ti cꞌanbil oe.

19 Ti oy xa ta coꞌontic li Diose, yuꞌun jaꞌ baꞌi cꞌuxutic ta yoꞌon. 20 Mi chcaltic ti oy ta coꞌontic li Diose, pero mi chopol chquiltic li jchiꞌiltique, jutcꞌoputic. Yuꞌun mi mu jcꞌuxubintic li jchiꞌiltic ti liꞌ jqꞌuelojtique, ¡mi la jaꞌ xa oy ta coꞌontic li Diose ti muc bu liꞌ jqꞌuelojtique! 21 Li smantal li Dios li albilutic comele jech chal: “Oyuc me ta avoꞌonic li Diose, cꞌuxubinic nojtoc la achiꞌiltaquique”, xi.

<- 1 JUAN 31 JUAN 5 ->