1 Mu obo, mumõ mu bangye-yulu nsaama ba bákwara mandoŋo nsaama áyabili ya me ya ályele ti: «Gya, me sa nsuo we masyeme ma oobagha mukaha nga-a-esighi ki elagha, wu aabwi nsini ŋa yulu a madza ma manene.» 2 Mikogho mi nsie miibvughu mbughu yi esighi ya nde, ya bviini li esighi e nde liikolo baara ba nsie. 3 Ngye-yulu ábiri me mu Mufulu ku syehe.

Me áamono mukaha mutsyini wu áabwi nsini ŋa yulu a nyama wu abie. Nyama munde áli alwulu mu mankwumu ma maakatsaala Nzaami. Nde áli a mitswi nsaama ya mansieme kwumu. 4 Mukaha munde álaha binkuru bibi mungala ya bi bibie, ya milwuu mimi mu oore, mimi mameẽ mama ntala, ya nsia yi a ntala. Nde ákwara ku kwogho e nde ndoŋo yii mu oore, yi alwulu mu mandagha ma maluru bubi ya mama mubviini a esighi e nde. 5 Ŋa yulu a mbwii a nde básono nkwumu yiili mbaala ensweghe. Yi me mbaala a kwumu me: «Babilone li Linene, ngughu a bakaha banga-a-esighi ya mandagha ma nsie ma mabvulu bubi.» 6 Me áamono mukaha me ákolo mu makili ma ba bangili ya mu makili ma bampughulu ba Yiisu. Ŋa ámono me nde, me áankiŋimi ku olagha.

7 Ngye-yulu ályele kundaa me ti: «Mu ema we kiŋimi? Me sa ndyele we mbaala ma mansweghe mama mukaha ya mama nyama wu li mu okabulubiri nde, wu li a mitswi nsaama ya mansieme kwumu.»

8 «Nyama wu aamono we áli, lo nde ka aafirisyili o. Nde sa apala kunsa mbie yi nda ya nsihi, sa agye ku opfighili. Baara ba nsie baala mankwumu ma bo ka básono mo mu mukaana wu bumweẽ o, sa bakiŋimi ŋa akala baamono bo nyama, mukaana me áli obaana ku ebaana e nsie. Bo sa bákiŋimi mu kuulu nde áli, nde ka aafirisyili o, lo nde sa afirigya. 9 Ma me matala mama okala a mayele mama ya bunsughu.»

«Mitswi nsaama mimye me minguo nsaama miili ŋa yulu a mye mukaha ábwi nsini. Mye mili si mikogho nsaama. 10 Mu mikogho nsaama mi mye, mitaana miibwi, mumõ li, wu muke nkini ka aagyi o. Lo ŋa akala aagya nde, nde yini a mu mana matala aakala. 11 Nyama wu áali ya wuulu ka aafirisyili o, li ndeme mukogho wu a mpuomo. Nde li si ti anga mikogho nsaama ya li mu ogye ku opfighili.»

12 «Mansieme kwumu ma áamono we mali mikogho kwumu miili nkini miibagha empu o. Lo mye sa migyagha litumu lii otumu kundaa nyama mu tala litsyini. 13 Mye mili a etsimi emõ ya miikagwa lileene ya litumu li bo kundaa nyama. 14 Bo sa badzwana mvulu ya Mwana a endoomo, ya Mwana a endoomo sa alughulu ŋa nkulu a bo, mu kuulu nde li Mfumu a bamfumu ya Mukogho a mikogho. Ya emõ ya nde, babo ba báti mbili, ba básuolo, ya babo ba baakakebe mukihi wu bálaba, sa balughulu si.»

15 Ngye-yulu ályele kundaa me ti: «Madza ma áamono we maala ŋa yulu a mo mukaha nga-a-esighi aabwi nsini, me baara bwohono, mampwumu, bikaana byehene ya mandiŋi. 16 Mansieme kwumu ma aamono we ya nyama sa makabele mukaha nga-a-esighi. Bo sa bagwohono nde byehene bi ali a bye, sa batwulu nde mpene, sa badza misunu mi nde ya sa batsughu nde ndehene mu mbaa. 17 Mu kuulu, Nzaami aatwulu mu mikolo mi bo etsimi kii osalala bitsimi bi nde. Bo bwohono sa bagwihini mu ogyaha litumu li empu e bo kundaa nyama, tee ŋa ookeele mandagha ma ólyele Nzaami. 18 Ya mukaha wu aamono we, me bvulu li linene li lili a empu ŋa yulu a mikogho mi nsie.»

<- APOKALIPESE LI DZÃ 16APOKALIPESE LI DZÃ 18 ->