Filemõ

OSOMO

Wu mukaana wu ósono Poole kundaa ndughu a nde Filemõ. Baghala munde áli musi Kolose, ya nde áli mbwuru wu munene mu bvulu li bo. Nde bu ágyughu Poole mu okaluo Nsia Yi Mbwe, ŋaana oŋo nde ási kana ya ágwi bumweẽ bu nde kundaa Kriste. Ŋa kara li bankana ba nde oli a mbwuru nkwumu Onesime. Nde bu ábulubara kundaa mfumu a nde, ámono Poole wu áali mu boloko. Poole áluo nde Nsia Yi Mbwe, yi a Mfumu Yiisu-Kriste, ya nde si ánama nzili oyo.

Poole ásono mukaana wu kundaa Filemõ, mu olyele nde asa Onesime kolokolo. Me Onesime ndeme àabiri mukaana me. Mu mikyene mimi matala mamo, Filemõ áli akughu osa Onesime nkana a nde bu adzyi nde, bwunu we odzwa nde. Mu mukaana wu, Poole ábuono nde mpaala anyaã ogwolo Onesime ti anga nkana wu áabara. Lo nde ályele nde agyagha nde bubwe, mu kuulu, mu matala ma, bo bali emõ mu Yiisu-Kriste.

Bu me bu bakakaba mukaana wu:

- Mamboro (1-3).

- Poole bvurulu matuono kundaa Nzaami mu nkooro a Filemõ (4-7).

- Poole buono Filemõ mu nkooro a Onesime (8-22).

- Mamboro mama masini (23-25).

1 Me Poole wu ndi mu boloko mu nkooro a Yiisu-Kriste, ya Timote ndughu a me mu kana, lisono mukaana wu kundaa we Filemõ, ndughu a bihi wu a dzyi mu esala. 2 Bihi ligweghe si mukaana wu kundaa nkele a bihi Apya, kundaa Aresyipe ndughu a bihi wu mamvulu, ya kundaa libwunu li Nzaami li lili mu nzo a we. 3 Nyaã bwehe ya edzuunu bi bifi kundaa Nzaami Taara a bihi ya kundaa Mfumu Yiisu-Kriste bikala ya be!

4 Matala mwohono ma aakansamana me mu we, me aakambvurulu matuono kundaa Nzaami a me, 5 mu kuulu me ndi mu okagyughu bu bali mu okabili mu dzyi li li a we mu baana ba Nzaami bwohono ya mu kana li we mu Mfumu Yiisu. 6 Me aakansamana Nzaami ti kana lili a we emõ ya bihi likala a mpini, mpaala we gyighili obaghala mandagha ma mabwe ma lili a mo mu Kriste. 7 Ndughu a me mu kana, dzyi li li a we liigwi me esee ya bukyini, mu kuulu mu we mikolo mi baana ba Nzaami miibagha edzuunu.

8 Me mu obo, ngu okala ti mu Kriste me ndi bunya-nyaã mu otumu we ndagha yifaana ogyighili, 9 lo me nduomo we ndagha mõ mu nkwumu a dzyi li bihi a we, me Poole, eŋmini ya mbwuru a boloko si mu matala ma mu nkooro a Yiisu-Kriste. 10 Me mbuono we mu obwana a Onesime, mwana a me mu matala ma ndi me mu boloko. 11 Mu matala ma maaluru, nde ka ákakala a mupfunu kundaa we o, lo mu matala ma nde li a mupfunu kundaa we ya kundaa me. 12 Me mbvurulu nde kundaa we, nde wu li ti anga mukolo a me.

13 Me áakandzyi ti nde asyili ŋa bele a me, mpaala nde asalala me ŋa ebini e we mu matala mwohono ma aankala me mu boloko mu nkooro a Nsia yi Mbwe. 14 Lo me ka ndzyi ogyighili ndagha si mõ o kala ti we ka gwi me muswa o, mpaala ndagha yi mbwe yi aasa we mu me yinyaã okala yi ti anga yi okwighi, lo yo yikala yi aasa we mu dzyi li weme.

15 Mu kuulu, okughu okala ti Onesime mu mana matala ákaghaba ya we, mpaala we firikala ya nde mu matala mwohono. 16 Mu kuulu mu matala ma, nde ka aafirisyili yini a nkana o, lo nde bvulu nkana mu mupfunu, ti anga ndughu mu kana wu a dzyi. Me ndzyi nde ku olagha, ya we sa bvuludzyi nde ku olagha mu kuulu nde li mbwuru ya ndughu mu kana mu Mfumu. 17 Mu obo, kala we aakamono ti me ndi ndughu a we, bwana a nde ti anga me we li mu okabwana a nde. 18 Kala ti nde aasi we ndagha yimbi, ya kala ti nde li a ebyimi e we, twulu kye mu nkwumu a me. 19 Me Poole nsono ndagha yi mu kwogho e meme: Meme sa mfiri ebyimi e we. Me ka ndi a nzala a olyele o ti wehe si li a ebyimi e me, ebyimi ekye me bumweẽ bu weme. 20 Eẽ, ndughu a me mu kana, gyighili me ndagha oyo mu nkooro a Mfumu, sa kuulu ti mukolo a me akala kunsa edzuunu mu Kriste.

21 Me nsono we mukaana wu mu kuulu me ndi a emiini mu bintamana bi we, bu nsoolo ti we sa gyighili mandagha ma maluru ya ma aantumu me we. 22 Me firinduomo we mu ogyighili me ebini kii ogyoŋomo, mu kuulu me ndi a emiini ti Nzaami sa agwa mvuru mu nsamana a be, ya nde sa abvurulu me kundaa be.

23 Epafarase, ndughu a me wu a boloko mu nkooro a Yiisu-Kriste, gwi we mboro. 24 Bandughu ba me baba esala: Mareke, Arisitareke, Demase ya Luk bagwi we mamboro.

25 Nyaã bwehe bu Mfumu a bihi Yiisu-Kriste bukala ya be!