1 Yiisu ályele kundaa binduono bi nde ti: «Mikolo mi be ka mikala maã-maã o. Lisa kana mu Nzaami, lisa si kana mu me. 2 Mu nzo a Taara a me oli a bibini bilagha. Kala pele, me ka aakandyele be ti me sa yingyighili be ebini o. 3 Me yingyighili be ebini, me sa yamvughuru mu ogwolo be, mpaala ŋa ebini ki akala aankala me, behe si likala oŋo. 4 Oko ku ndi mu ogye me, be lisoolo nzili yi baakagye oko.»

5 Toma ályele nde ti: «Mfumu, bihi ka lisoolo ku li mu ogye we o, lo bunu bihi liisoolo nzili yi baakagye oko?» 6 Yiisu ályele nde ti: «Me ndi nzili, engaŋma ya laama. Ka oli a mbwuru wu kughu ogye kundaa Taara o kala ti nde ka luru mu me o. 7 Kala ti be liisoolo me, be liikaasoolo si Taara a me. Ya mu matala ma, be liisoolo nde ya be liimono nde.»

8 Filipe ályele nde ti: «Mfumu, suo bihi Taara, ya obo okughu mu bihi.» 9 Yiisu ábvuhulu ti: «Filipe, edzighi e lagha me ndi ya be, lo we ka soolo me! Munde wu mono me, Taara amono. Mu emakye we lyele ti: “Suo bihi Taara?” 10 We ka li a kana o ti me ndi mu Taara ya Taara li mu me? Mandagha ma aakandyele me be, ka meme aakambagha mo o, lo Taara wu li mu me, aakakuhu bigyighili bi nde ndeme. 11 Lisa kana mu me, ti me ndi mu Taara ya Taara li mu me. Kala pele, lisa kana yini mu nkooro a bigyighili bi.»

12 «Mu engaŋma, me ndyele be: Munde wu aasa kana mu me, ndehe si sa asa bigyighili bi aakangyighili me. Nde sa asa bi bibvulu bunene ya bi aansi me, mu kuulu me ndi mu ogye kundaa Taara. 13 Mandagha mwohono ma akala liiluomo be mu nkwumu a me, me sa ngyighili mo, mpaala Taara abagha nsia mu Mwana. 14 Kala ti be liluomo elogho mu nkwumu a me, me sa ngyighili obo.»

15 «Kala ti be lidzyi me, likebe Mikyene mi me. 16 Me sa nduomo kundaa Taara agweghe be Mubaha mukimi wu àayakala ya be mu matala mwohono. 17 Nde me Mufulu wu engaŋma, munde wuulu baara ba nsie ka bakughu okihi o, mu kuulu bo ka bakughu omono ya ka bakughu osoolo nde o. Lo be, be lisoolo nde, mu kuulu nde li ŋa kara li be, ya nde sa akala mu be. 18 Me akala ka ansihi be bisyana o, me sa yambvughuru kundaa be. 19 Matala masala masyili, nsie ka yifirimono me o. Lo be sa limono me, mu kuulu me ndi mweẽ, ya behe si sa likala mweẽ. 20 Mu etsughu me ekye, be sa libaghala ti, me ndi mu Taara a me, anga bu lili be mu me, ya me ndi mu be. 21 Munde wu dzyi me, me munde wu li a Mikyene mi me ya wu aakanama mye. Mu obo munde wu dzyi me, Taara a me sa adzyi nde, mehe si sa ndzyi nde ya sa me moŋono kundaa nde.»

22 Mu obo, Yuda wuulu ka wu a musi Isikaryote o, áfwulu nde ndiri: «Mfumu, mu emakye we akala aamoŋono yina kundaa bihi, lo ka kundaa basi nsie o?» 23 Yiisu ábvuhulu nde ti: «Kala ti mbwuru dzyi me, nde sa anama mandagha ma me, ya Taara a me sa adzyi nde. Mu obo, bihi sa ligya kundaa nde ya sa likala mu nde. 24 Munde wu gwene dzyi me, ka aakanama mandagha ma me o. Ndagha yi lili mu okagyughu be, yo ka yifi kundaa me o, lo kundaa Taara wu aagweghe me. 25 Me aandyele be mandagha ma mu matala ma ndi me nkini ŋa kara li be. 26 Lo me Mukala, Mufulu a Ngili wu akala oogweghe Taara mu nkwumu a me, sa aluo be mandagha mwohono ya sa alibili be mweẽ mu mandagha mwohono ma ándyele me be.»

27 «Me nsihi be edzuunu, me ngwi be edzuunu e me. Me ka ngwi be kye ti anga bu ookagwa baara ba nsie o. Mikolo mi be minyaã okala maã-maã ya minyaã okala a nzalamweẽ. 28 Be áli liigyughu ti me áandyele be ndiri: “Me ndi mu ogye, ya me sa yamvughuru kundaa be”. Kala ti be áli liikadzyi me, be likaakala mu esee mu ogye o me kundaa Taara, mu kuulu Taara bvulu me mupfunu. 29 Me ndyele be mandagha mamo mu matala ma, nsomo mo mabwa, mu kuulu ŋa akala maabwa mo, be lisa kana. 30 Me ka afirimbili ku olagha ya be o, mu kuulu mfumu a nsie yi li mu ogya. Nde ka li a litumu ŋa yulu a me o. 31 Lo baara ba nsie bafaana osoolo ti me ndzyi Taara ya me aakansa mandagha ma aakatumu nde me. Litemene, litswe limara ŋa ebini ki!»

<- DZÃ 13DZÃ 15 ->