1 Bandughu ba me mu kana, kala ti basyimi mbwuru mu okasa bubi, be ba lili a Mufulu a Nzaami libvurulu nde mu edzuunu mu nzili yi a nsumu. Lo weme si, sa mayele, mpaala we nyaã obwa mu mwere munde. 2 Beme-a-beme, liikabaha babamõ ba bali mu mpara, me obo be liikuhu Mikyene mi Kriste. 3 Buulu, nswe munde wu aakatsimi ti nde li mbwuru wu bvulu mupfunu, nde wuulu li mbwuru wu a bwunu, lo nde li mu okapfiri nyuru a ndeme. 4 Nswe mbwuru agyighili okehene bigyighili bi nde. Kala ti bye bili bibwe, nyaã nde ndeme amono esee, lo ka mu bigyili bi mbwuru mukimi o. 5 Mu kuulu, nswe mbwuru sa abiri leme li nde ndeme.

6 Nswe munde wu baaluo Ndagha a Nzaami, agwa kaba lili bilogho bi nde byehene kundaa munde wu li mu okaluo nde. 7 Ka ligwuŋumu o, ka baakasebe Nzaami o. Nswe mbwuru aakatolo bimburu bi aakakunu nde. 8 Munde wu aakunu mu okuhu gwaa li nyuru a ndeme, sa atolo bi ookaburu nyuru, ngu lipfu. Munde wu aakunu mu Mufulu, sa atolo bi ookaburu Mufulu, me laama lili mibvu ya mibvu. 9 Litswe likasa bubwe ku ogwene a okolo, buulu ŋa ookughu matala, kala ti ka likwono o, bihi-a-be litolo bimburu. 10 Me mu obo, bu lili a matala, litswe likagyighili mandagha ma mabwe kundaa baara bwohono. Nsomo a nsomo kundaa bandughu mu kana.

11 Limono bunu-a-bo me aansono be mu kwogho e me bisono bi binene bi! 12 Baara bwohono ba badzyi omoŋono ti bali ba babwe mu embwuru, me bo badzyi osohobo be nzo a mbaa mu nko. Bitsimi bi bo bili ti, banyaã omwehẽ bo kimini mu nkooro a lipfu li Kriste ŋa kuruwa. 13 Mu kuulu, bomo ba baakasomo nzo a mbaa ka baakasalala Mikyene o, lo bo badzyi ti be lisomo nzo a mbaa, mpaala basa mutwunu mu manyuru ma be.

14 Si okala ka bunu, me ngu wuulu ka nkughu okala a mutwunu mu ndagha nkimi o, kala ti ka yini a mu lipfu li Mfumu a bihi-a-be Yiisu-Kriste ŋa kuruwa o. Mu lo, ayi bákomo nsie nsyini ŋa kuruwa mu nkooro a me, ti bwunu a bu bákomo me ŋa kuruwa mu nkooro a bigyighili bi baara ba nsie. 15 Mu kuulu, ndagha yi mupfunu ka oli osomo nzo a mbaa o, bwunu we ogwene osomo nzo a mbaa, lo okala mbwuru wu munyaghara. 16 Nyaã edzuunu ya nyiĩ bikala ya babo ba akala baanama maluo ma, ya bikala si mu Isarayele li Nzaami.

17 Obaana lolo, mbwuru si mumõ anyaã ofirimwehẽ me mpara, mu kuulu me ndi a bigwa ya bikili bi mabogho ma Yiisu mu nyuru a me.

18 Bandughu mu kana, nyaã bwehe bu Mfumu a bihi-a-be Yiisu-Kriste bukala ya mufulu a be! Aamene.

<- NGALATE 5