Mukaana a Poole Kundaa basi

Efedze
OSOMO
Wu me mukaana wu ósono Poole kundaa bangaa a kana ba bali ku Efedze. Lo nde ka ásono mukaana wu yini a mu nkooro a bo o, mu kuulu, mu mikaana milagha mi mikulu, ka básono kwumu yi a «Efedze» mu etsulu kii nsomo o. Odzyi osuo ti Poole ásono mukaana wu kundaa banga-a-kana baba mabvulu malagha mama ku etsulu e nsie kii Adzi, mpaala bo bamana otaŋa nde, bagwa nde kundaa banganda. Nde ásono mukaana wu mu matala ma áli nde mu boloko ku Rome.
Efedze líli bvulu li libvulu mupfunu ŋa kara li mabvulu mwohono mama empu kii Rome ma máli ku Adzi. Baara balagha ŋa kara li baara ba bákakala oko báli minta-nkaala. Bo bátwu nzaami a bo wu a nkwumu Aretemise nzo yi a nkara bubwe. Basi-Rome baakata nde mu nkwumu yi a Dyane. Aretemise áli etyeghe mu efaana kii mukaha. Bo bákagye mu nzo yi a nkara mbwe oyo mu okayisamana kye. Baara bwohono baba oko bákasa kana mu etyeghe ekye, maha ba-Dzwife ya bakriste. Mu matala ma obvughuru Poole ku Efedze mu midzye mi nde mimi myele, nde áluo ba-Dzwife baba oko mu etsughu kii Sabate. Ŋa mbihi, nde abvughuru mu kuulu nde ka ákughu ogyili oko o, lo nde ályele bo ti nde faana obvughuru. Mu matala ma abvughuru nde mu midzye mimi mitere, nde ási bamvulu batere mu okaluo baara matala mwohono (Big 19–20).
Mandagha ma me ma ookasuo Poole munsa mukaana wu: Nzaami aasuo bihi mandagha ma básweghe ma akuru nde mu bubwe bu nde. Mbaala ti, nde sa abvughu bilogho byehene bibi ku mayulu, ya bi bili ŋa nsie mpaala Yiisu akala Mfumu. Nde ábwehe ti bakriste bafaana ogwihini ya okala ti anga bandughu mu kana. Ka bafaana olyele o ti wu mu-Dzwife, wunii ka li mu-Dzwife o. Mutaara a bo li yini a mumõ, me Satana. Mu obo, bo bafaana okasamana ŋa emõ mpaala Satana anyaã okala a litumu ŋa yulu a bo. Poole áfirilyele bunu a bo baghala afaana okala ya mukala a nde, bunu a bo baana bafaana ogwolo bataara ba bo, bunu a bo bankana bafaana okagwolo bamfumu ba bo. Nde ályele ti banga-a-kana bafaana okala bumõ ya Kriste.

Bu me bu baakakaba mukaana wu:
1) Mamboro (1.1-2)
2) Kriste seme bihi ya Mufulu a Ngili (1.3–3.21)
3) Litswe likala a bumweẽ bu bunyaghara emõ ya Kriste (4.1–6.20)
4) Mamboro mama masini (6.21-24).

Mamboro

1 Me Poole, ntumu a Yiisu-Kriste mu waa li Nzaami, nsono mukaana wu kundaa baba ngili ba bali ku bvulu lili Efedze, ba baakasa kana mu Yiisu-Kriste: 2 Nyaã bwehe ya edzuunu bi bifi kundaa Nzaami Taara a bihi ya kundaa Mfumu Yiisu-Kriste bikala ya be!

Liseme lili mukughu mu Kriste

3 Masyighi kundaa Nzaami, Taara a Mfumu a bihi Yiisu-Kriste, nde wu aaseme bihi mu Kriste mu liseme lwohono lili mufulu mu mayulu. 4 Mu nde, Nzaami ásuolo bihi nsomo nde agyighili nsie, mpaala bihi likala baba ngili, ba bagwene a epfwumu ŋa busu bu nde. Mu dzyi li nde, Nzaami 5 átswamagwolo munkaana mu osa ti bihi likala baana ba nde mu Yiisu-Kriste, ti bwunu a bu oli waa li nde li libwe, 6 mu kuulu bihi lisyighi nsia a bwehe bu nde, bwehe bu aapfwaha nde bihi mu mwana a nde wu a dzyi.

7 Mu makili ma Yiisu, Nzaami aakwulu bihi, nde aasi masumu ma bihi kolokolo, ti bwunu a bu oli busini bu bwehe bu nde. 8 Nzaami aapfwaha bihi bo kunsa bunsughu bwohono ya mayele mwohono. 9 Nde aasuo bihi mansweghe ma waa li nde, bitsimi bi bibwe bi átswama okuru nde mu Kriste, 10 mu okuhu bye ŋa ookughu matala mpaala abvughu byehene kunsa litumu li Kriste, byehene bi bili mu mayulu ya bi bili ŋa nsie.

11 Mu Kriste bihi si liibagha kaba lili pfa, bihi ba básuolo nsomo ti bwunu a bu oli bitsimi bi ókuru munde wu aakagyighili mandagha mwohono ti bwunu a bu oli munkaana a waa li nde, 12 mpaala lisyighi nsia a nde, bihi ba lítswama osa emiini e bihi mu Kriste.

13 Mu nde, behe si bu ligyughu mandagha mama ngaŋma, nsia yi mbwe yi a obvwughu o be, mu nde si be liisi kana ya baasi be elyimi kii Mufulu a Ngili wu básiini a be. 14 Mufulu munde li kaba lili nsomo mu pfa li liibagha bihi. Bihi sa libagha lo mu matala ma baakwulu bihi kuu mukughu, mpaala bihi lisyighi nsia a nde.

Osamana o Poole

15 Me mu obo mehe-si, bu aangyughu bu bali mu okabili mu kana li be mu Mfumu Yiisu ya mu dzyi li lili a be mu baba ngili bwohono, 16 me ndi mu okabvurulu matuono mu be matala mwohono. Ya me aakansamana mu be. 17 Nyaã Nzaami a Mfumu a bihi Yiisu-Kriste, Taara wu a nsia, agwa be mufulu wu a bunsughu ya wu aakasuo mandagha mama ensweghe, wu aasa ti be lisoolo nde. 18 Nyaã Nzaami abaha mikolo mi be mu obaghala ya osoolo nki emiini ki bákuru mu mbili yi áti nde be, nki busini bubu nsia a pfa li nde ŋa kara li baba ngili, 19 ya nki bunene bu lileene nde aasuo kundaa bihi ba liikasa kana, lileene lilo li aasuo nde ya mpini yohono.

20 Nde aasuo lileene lilo bu aasiili Kriste ŋa kara li ba bákpi ya aabwihi nde nsini ŋa kwogho-a-kwogho e nde mu mayulu. 21 Mu obo, Kriste li ŋa yulu a bimfumu byehene, litumu lwohono, lileene lwohono, empu kyehene ya nswe nkwumu yi bakughu otaŋana, ka yini a mu matala ma o, lo ya mu matala ma maagya si. 22 Nzaami aasuhu byehene ku nsie a myili mi Kriste, ya nde aatwulu nde mu okala mutswi ŋa yulu a byehene, mutswi a libwunu li Nzaami, 23 li lili nyuru a nde, mukughu wu a munde wu aakaluhu byehene mu baara bwohono.

EFEDZE 2 ->