MUKAANA A POOLE WU A NSOMO KUNDAA BASI

TESALONIKE
OSOMO
Wu me mukaana wu a nsomo wu ósono Poole kundaa bakriste ba báli ku Tesalonike. Poole áli agyene oko ya áluo bo Nsia yi Mbwe yi a Yiisu-Kriste (Big 17.1-10). Baara baba oko bánama nzili a Kriste. Lo ŋa mbihi a mana matala, ndaama ba-Dzwife ba báli oko bátihi baara mpaala bo batemene a Poole nsumu ya ndughu a nde. Bakriste básweghe Poole ya bandughu ba nde. Mu mpyibi, bo bápala a bo ku mbala a bvulu ya Poole ágyene ku Bere ya bandughu ba nde.
Ŋa mbihi a bamvulu buolo, Poole ágweghe Timote mu oyimono bu óli bakriste baba ku Tesalonike. Timote bu agyene ya bu ayabvughuru, nde ályele kundaa Poole ti bo báli nkini mu okanama nzili a Kriste, lo baara bana ŋa kara li bo bákabihi osala buulu babagha bi babuŋunu manyuru ma bo. Bo bákalyele ti edzi-dzighi Yiisu sa ayabvughuru, ya kala ti bo basala, esala e bo sa ekala kii bwunu. Baara babake ka báli a edzuunu o, mu kuulu balagha mu badzighi ba bo ya bandughu ba bo báakpi, ya Yiisu ka ákayabvughuru o. Me mu obo Poole ásono bo mukaana mu ogwa bo mpama ya mu osuo bo bunu obvughuru o Yiisu ookala, ya nde nki ndagha aagyighili kundaa babo ba baakasa kana mu nde. Mu obo, bo bákughu okasa emiini ti bo sa bakala matala mwohono ya Mfumu.

Bu me bu baakakaba mukaana wu:
- Mboro (1.1)
- Bunu-abo basi Tesalonike baasi kana (1.2–3.13)
- Bumweẽ bu buukagwa Nzaami esee (4.1-12)
- Emiini mu obvughuru o Yiisu (4.13–5.11)
- Luo ya mboro yi masini (5.12-28)

Mamboro

1 Me Poole, emõ ya Silibvĩ ya Timote, lisono mukaana wu kundaa libwunu li Nzaami li lili mu bvulu lili Tesalonike, libwunu li Nzaami Taara ya lili Mfumu Yiisu Kriste: Nyaã bwehe ya edzuunu bikala ya be!

Bumweẽ ya kana li basi Tesalonike

2 Mu nswe matala, bihi liikabvurulu matuono kundaa Nzaami mu be bwohono. Ya bihi liikasamana mu be. 3 Ŋa mihi mi Nzaami Taara a bihi, bihi liikalibili mweẽ mu bigyighili bi kana li be, bisala bi liikasala be mu dzyi, ya mukama a be mu emiini mu Mfumu a bihi Yiisu-Kriste. 4 Bandughu ba me mu kana, be ba ookadzyi Nzaami, bihi lisoolo ti Nzaami ásuolo be mu okala baba ndaa nde. 5 Mu kuulu, ka yini a mu mbiili bihi líluo be Nsia yi Mbwe o, lo si mu lileene, mu libaha li Mufulu a Ngili ya mu kana. Be lisoolo bu líli bihi ŋa kara li be, mu nkooro a bubwe bu be.

6 Ya beme si liinama efaana e bihi ya kii Mfumu, bu liigyagha Ndagha kunsa mpara yi alagha, mu esee ki ookagwa Mufulu a Ngili. 7 Mu obo, be ayi bifaana kundaa baara bwohono ba baakasa kana ba bali ku bitsulu bi mansie bibi Masedwane ya Akayi. 8 Mu kuulu, Ndagha a Mfumu yiifi kundaa be ya baagyughu yo tee ku Masedwane ya ku Akayi. Nsia a kana li be mu Nzaami yiitsaŋama mu bibini byehene ya bihi ka lifirisyili a nzala a obili mu lo o. 9 Mu kuulu baara bwohono bali mu okabulubili mu mbwa-mbwana yi liibwana a be bihi ya bu liityeghe be banzaami baba bityeghe mbihi mu osalala Nzaami wu a mweẽ ya wu a ngaŋma, 10 ya mu okebe Mwana a nde wu aafa ku mayulu, Yiisu wu aasiili nde ŋa kara li ba bákpi. Me mwana munde aakwulu bihi-a-be mu masyeme ma Nzaami ma maagya.

BASI TESALONIKE 2 ->