1 Baara bali mu okabulubili mu bibini byehene ti ŋa kara li be oli a enkwunu, enkwunu kiili kaala nkini ka bámaamono kye kundaa baala ka baakasa kana mu Nzaami o. Mu kuulu mumõ ŋa kara li be aato mu eteese kii okabvughu mbughu ya mukala a taara a nde! 2 Lo be liilwulu mu mubili a nyuru! Ali ofaana ti be likala kunsa minyoõ tee mu matala ma baamaha wu aagyighili ndagha yi obo ŋa kara li be. 3 Me ngu wuulu, ngu okala ti me ka ndi emõ ya be mu musunu o, lo mu mufulu me ndi emõ ya be, ya me maandamana mbwuru wu aagyighili ndagha yi obo, ti anga me ndi ŋa kara li be. 4 Ŋa akala liibvuŋunu be mu nkwumu a Mfumu a bihi Yiisu, mehe si sa nkala ya be mu mufulu ya mu lileene li Mfumu a bihi Yiisu. 5 Lityeghe mbwuru wu obo ŋa myaã mi Satana mu kuulu nyuru a nde yipfighili, mpaala mufulu a nde abvwughu mu etsughu e Mfumu.

6 Ka oli a ndagha yi liikala a be mubili a nyuru o! Be ka lisoolo o ti ndaama a pfini yiikasa ti nkpaŋa a mampa yohono yifuulu? 7 Limaha pfini li likulu mpaala be likala nkpaŋa a mampa yi nyaghara. Mu engaŋma be lili ba bagwene a pfini. Mu kuulu Kriste, mwana a endoomo e bihi kii Paake, bágwi nde ti anga mukaba. 8 Mu obo, litswe lisa kyiri kii gwene a pfini li likulu, ngu okala pfini lili mandagha ma mabi ya mukolo mubi, lo ya mampa ma magwene a pfini, mu bitsimi bi bitsyeme ya mu engaŋma.

9 Me aansono be mu mukaana a me ti be ka lifaana okala a endughu ya baara banga-a-enkwunu o. 10 Me bu mbili obo, ka mu nkooro a baara bwohono banga-a-enkwunu ba bali mu nsie yi o, bwunu we banga a ntono a nzi, ba baakagwohono bilogho bi baara, ya ba baakasamana banzaami baba mpya. Kala ti áli obo, nkini be lifaana opala mu nsie. 11 Mu matala ma, me aansono be mpaala be linyaã okala emõ ya mbwuru wu liita be ti ndughu mu kana, lo nde li nga-a-enkwunu, bwunu we li a ntono a nzi, aakasamana banzaami baba mpya, aakatughu baara, li enkolo-mala, aakagwohono bilogho bi baara. Mbwuru wu obo, be ka lifaana si odza emõ ya nde o. 12 Mu kuulu, ngu me mfaana olamana baara baala ka bali mu libwunu o? Ya baara ba bali mu libwunu, ka be lifaana olamana bo o? 13 Baara ba bali ku mbala a libwunu me Nzaami akala aalamana bo. «Libyi wu mubi ŋa kara li be.»

<- 1 KORENTE 41 KORENTE 6 ->