Roma 9

Manetualain here nala hatahori Israꞌel asa

1 Ita fo mana takaesa to Karistus, kokolak hata fo ndoos. De au ta kokolak ombo koson neu ei. Au dale kuru-erong oo nafada au boe nae, Manetualain Dula-dalen koladu au daleng. 2-3 Au afada talo ia: au daleng sona. Au ameda berak leo naak, nahuu asaneda au hatahori heli-heling nggara. Huu au nau fo au hatahori Yahuding nggara oo* rakaesa ro Karistus boe, tehuu noꞌuk ka ta ramahere neun. Mete ma au bisa soi dalak fee sara, au sadia oke fo Manetualain hukun au, nggati sara. Ma au oo sadia oke fo Manetualain nabinggak au numa Karistus mai boe, mita fo au hatahoring nggara bisa rakaesa ro Karistus. 4 Naa te sira iar, hatahori Israꞌel, ndia hatahori nusak esa fo naua nalan seli. Manetualain soꞌuk nala sara dadi reu Ndia anan nara numa lele uluk mai ena. Ana natudu Ndia koasan ta neni babanggak neu sara. Ana ndara fangga hehelu-bartaak mata-matak kara no sara. Ana fee Ndia Hohoro-lalanen neu sara. Sira ndia bubuluk talo bee fo rakaluku-rakatele ma raono-lalau neu Ndia. Ana helu-bartaa nae natudu Ndia dale susuen neu sara ena.✡ 5 Ara dadi ruma ita bei-baꞌin nara mai, ndia: baꞌi Abraham, baꞌi Isak, ma baꞌi Yakob (hatahori roke nadek ‘Israꞌel’ numa ndia mai). Ma Karistus fo Manetualain helu-bartaa memak kana fo nae nadenun mai ndia lele uluk naa oo, dadi numa ita hatahori Yahudin bei-baꞌin nara mai boe. Karistus naa oo ndia Manetualain fo mana parenda basa-basan boe. Dadi nandaa mete ma hatahori soꞌuk kokoa-kikiok soa-neun losa doon naa neu. Tebe!✡

6 Leo mae hatahori Israꞌel noꞌuk ka bei ta simbok Karistus, tehuu hatahorir ta bisa kokolak rae, Manetualain hehelu-bartaan naa ta dadi. Boso duꞌa mae, basa hatahorir fo mana dadi numa Israꞌel bei-baꞌin nara mai naa, dadi reu hatahori Israꞌel fo Manetualain here nala sara, dadi reu Ndia hatahorin. 7 Haꞌi netuduk leo hatahori noꞌuk ka dadi ruma ita baꞌin, baꞌi Abraham mai. Tehuu sira basa sara ta Abraham tititi-nonosin fo Manetualain here nala sara. Sama leo Manetualain nafada Abraham ena nae, “O tititi-nonosim fo Au alelak, kada mana dadi numa o anam Isak mesa kana mai.”✡Tutui Makasososak 21:12

8 Naa sosoa-ndandaan nae, numa lele uluk mai losa hatematak ia, ta basa tititi-nonosik kara maruma ai hatahori Yahudir baꞌin Abraham mai, dadi miu Manetualain anan nara. Kada tititi-nonosik manuma Manetualain hehelu-bartaan neu Abraham mesa kana mai, ndia Manetualain reke sara dadi reu Ndia ana teteben nara. 9 Manetualain ndara fangga hehelu-bartaak no Abraham nae, “Nai rarain, teuk esa bali, Au fali mai. Faik naa, o saom Sara bonggi nala ana tou anak esa ena.”✡Tutui Makasososak 18:10

10 Ta talo kada naa. Te ita baꞌin Isak no saon Ribka bonggi rala ana duak. 11-12 Neu Ribka bei ta bonggi nala sara, ara bei ta tao hata fo neulauk do manggarauk. Leo mae talo naa oo, tehuu Manetualain nafada memak Ribka ena boe, laꞌe-neu ana duak kara fo mana kalua nakahuluk nae, “Neu ko kaꞌak naue-osa fee fadin.” Manetualain nafada talo naa, fo natudu nae, mete ma Ndia here nala hatahori esa ena, na, Ana bubuluk nae pake hatahori naa talo bee ena. De Manetualain here nala fadik naa, fo dadi neu Ndia hatahorin. Ana hae nahani fo mete sudik fadik naa tao talo bee, nahuu Manetualain bubuluk memak kana ena.✡Tutui Makasososak 25:23 13 Sama leo Manetualain kokolak nai Ndia Susura Malalaon laꞌe-neu ana duak kara raa nae,

“Au here ala Yakob,

tehuu Au timba heni Esau.”✡

14 Dadi ita tae kokolak hata bali? Fama te ketuk kokolak rae, “Manetualain naketu-naladi dedeꞌak no mbeu seserik, do?” Ta bisa dadi! 15 Lele uluk Manetualain nafada baꞌi Musa nae,

“Au atudu dale kasian neu hatahori fo Au mesa ngga here alak.

Ma Au fee dale susueng neu hatahori fo Au mesa ngga dudu alak.”✡

16 Dadi hatahori naa ta nameda Manetualain dale kasian, ta huu ndia mesa kana hihii-nanaun, do, ta huu ndia mesa kana tataon. Tehuu no Manetualain mesa kana hihii-nanaun fo nau natudu Ndia dale kasian neu hatahori naa. 17 Ita bubuluk ia nai Susura Malalaok, Lamatuak kokolak no manek Masir nae, “Au soꞌuk ala o dadi muu manek, nahuu Au ae pake o fo matudu Au koasang neu hatahori noꞌuk kara. No dalak naa, hatahorir marai dae-bafok ia katematuan bisa soꞌu botik Au nadeng.”✡Kalua numa Masir mai 9:16

18 Dadi mete ma Manetualain nae natudu Ndia dale kasian neu hatahori esa, na, kada Ana taon leo. Mete ma nae tao hatahori esa dalen natea, na, kada Ana taon leo.✡Tui Seluk laꞌe-neu Dala Masodak 7:7-9

Manetualain bisa natudu Ndia dale kasian, tehuu Ana oo ta simbok manggarauk boe

19 Dadi boso losak hambu hatahorir rasabara au rae, “Mete ma Manetualain here nala hatahori esa, ta tungga hatahori naa tatao-nonoꞌin, tehuu tungga kada hata fo Manetualain naketu nalak, na, tao hata de Ana nau ndae salak neu ita, tungga ita tatao-nonoꞌin? Naa, mbeu seserik, hetu? Mete ma Manetualain memak naketu basa-basan, na, sosoa-ndandaan ita tatao-nonoꞌin sala oo Ndia naketu nalan ena boe!”

20 Mete ma hambu ketuk duꞌa talo naa, au aselu ae talo ia: “O duꞌa mae, o ia see?! O mae kokolak laban Manetualain, do?” Boso talo naa! Sama leo neni surak nai Manetualain Susura Malalaon dale nae, “Mete ma hatahori tao buas esa, hambu nai bee buas naa natane falik hatahori fo mana taon naa nae, ‘Tao hata de o tao au talo ia!?’ ”✡Yesaya 29:16; 45:9 21 Haꞌi netuduk leo mana tao ure dae. Numa dae manu taꞌik bubuak esa, ana naena haak fo tao nala nggusi manggadilak esa fo hatahori koan. Ana oo naena haak pake dae bubuak naa boe, fo tao nala mamana dafuk esa, tungga kada ndia hihiin.

22 Leo naak oo no Manetualain boe. Ana naena haak fo tao tungga Ndia hihii-nanaun. Ana nau natudu neu basa hatahorir nae, Ana namanasa, ma ta simbok hatahori tatao-nonoꞌi manggarauk hata esa boe na. Ana oo nau hatahori bubuluk boe nae, Ndia koasan ta neni babanggak. Fo hatahori bubuluk talo naa, Ana nakatataka aon no hatahori tatao-nonoꞌi manggaraun mata-matak kara. Tehuu hatahori fo mana tao manggarauk, kada rahani fain fo ara rakalulutu heni sara. 23 Ana nadale naruk talo naa, fo nae natudu neu hatahori noꞌuk kara nae, Ana nau natudu dale kasian neu hatahori ketuk. Sira iar, ndia Ana here memak kasa ena, fo nae nakadedemak kasa. No dalak naa, Ana nau hatahori bubuluk nae, Ndia mesa kana ta neni babanggak mateꞌen. 24 Sosoa-ndandaan nae, ita iar ndia Ana here memak kara ena fo dadi teu Ndia hatahorin nara. Ita iar, ketuk ruma hatahori Yahudir mai, ma ketuk ruma hatahori nusa-nusak laen nara mai. 25 Sama leo lele uluk, Manetualain pake Ndia mana toꞌu dedeꞌan Hosea fo surak laꞌe-neu hatahori ta Yahudir nae,

“Hambu hatahori fo lele uluk ta Au hatahoring,

tehuu neu ko Au oke ala sara ae,

‘Eir ia, Au hatahoring.’

Ma hambu hatahori nusa-nusak fo lele uluk Au ta sue sara,

tehuu Au nau oke ala sara ae,

‘Eir ia, hatahori nusa-nusak fo Au suek.’ ”✡

26 Ana oo surak boe nae,

“Numa naa,

nai mamanak fo Manetualain nafada sara ena nae,

‘Eir ia, ta dadi neu Au hatahoring!’

Neu ko Manetualain fo Masodak nau nafada sara nae,

‘Hatematak ia ei dadi miu Au anang nggara ena!’ ”✡

Ana kokolak talo naa, nahuu Ana kasian neu hatahori ta Yahudir.

27 Manetualain mana toꞌu dedeꞌan laen, ndia Yesaya, eki nita laꞌe-neu hatahori nusak Israꞌel nae,

“Leo mae hatahori Israꞌel dadi ramanoꞌu ralan seli,

nok bali sarakaek manai tasi tataik,

tehuu neu ko Manetualain tao nasoi-nasoda kada hatahori baꞌu anak,

numa sira sala-singgon nara mai.

28 Neu ko losa fain,

fo Manetualain naketu-naladi basa hatahorir marai dae-bafok katematuan dedeꞌan,

sama leo Ana nafada memak kana ena.

Ana ta nahani a,

tehuu Ana tao natetu basan no lai-laik!”✡

29 Lele uluk Yesaya oo nafada memak laꞌe-neu hatahori Yahudir boe nae,

“Ita taua,

nahuu Lamatuak mana Koasa Mateꞌen,

fee luas fo ita tititi-nonosin ketuk hambu masodak.

Mete ma ta talo naa, na,

ita ketu-maꞌi ena,

sama leo hatahori kota Sodom ma kota Gomorar.”✡

Hara Lii Malole soa-neu hatahori nusak Israꞌel fo ta mana nau nenene neu Manetualain

30 Dadi ita tae kokolak hata? Kokolak tae, hatahori ta Yahudir ruma sudi bee mai, fo lele uluk ara ta sangga-sangga fo nau malole ro Manetualain, hatematak ia ara malole roon ena, nahuu ara ramahere neu Yesus Karistus. 31 Naa te hatahori Israꞌel asa soba tao tungga Musa hohoro-lalanen ena fo ara bisa malole ro Manetualain, tehuu ta dadi nakandoo boe.

32-33 Tao hata de ara ta bisa malole ro Manetualain? No kada ara nau tao tungga hohoro-lalanek mita fo Ana simbok kasa sama leo hatahori dale ndoos, tehuu ara ta ramahere neu Yesus Karistus. De nok bali ara rakatunu laꞌe “batu neketunuk” esa. Sama leo Manetualain Susura Malalaon nae,

“Mete ia dei!

Au tao Hatahori esa,

neu letek Sion, nai kota Yerusalem ena.

Hatahori naa sama leo batu esa,

fo mana tao hatahori nakatunu.

Tehuu see namahere neu Ndia, na,

hae mae.”

Batu naa, ndia Yesus. Tehuu hatahori Israꞌel asa timba henin. Naa, sama leo ara rakatunu, boe ma ara tuda nahuu batu naa.✡

<- Roma 8 Roma 10 ->