Roma 3

Leo mae hatahori Yahudir raena haak fo simbo pusaka numa Manetualain hehelu-bartaan mai, naa oo ta tao nasoi-nasoda sara boe

1 Mete ma talo naa, dadi miu hatahori Yahudi mana sunat naa, nanalan hata? Fama te ei duꞌa mae, hatahori Yahudi hambu noꞌun lenak ma neulaun lenak numa hatahori ta Yahudi mai, hetu? 2 Tebe! Dadi teu hatahori Yahudir, hambu nanalak nai matak noꞌuk ka. Kaesan, nahuu Manetualain fee hatahori Yahudir ues fo surak ma ranea ratalolole Ndia Dedeꞌa-kokolan. 3 De talo bee? Fama te ei duꞌa mae, Manetualain ta bisa tao tungga hata fo Ana kokolak, nahuu hatahori Yahudi ketuk ta ramahere neu Ndia, do? 4 Ta bisa dadi! Leo mae basa hatahorir marai dae-bafok ia mana pepeko-lelekok, tehuu Manetualain mesa kana ndia kokolak ndoos nakandoo! Masanedak, neni surak nai Susura Malalaok laꞌe-neu Manetualain aon nae,

“Hambu hatahori fo ndae salak rae,

Ana ta naketu dedeꞌak no ta mbeu seserik.

Tehuu neu ko ara bubuluk rae,

hata fo Ana kokolak naa, memak tetebes.

Ana senggi,

nahuu ta bisa dadi Ana kokolak sala.”✡

5 Mete ma ita tao salak, naa ndia natudu no manggaledon lenak neu basa hatahorir nae, hata fo Manetualain taok naa, memak tetebes. Mete ma talo naa, na, ita tae kokolak hata? Sangga tae, Manetualain mbeu seserik mete ma Ana hukun ita, do? (Te hambu hatahori ketuk kokolak talo naa na.) 6 Ta bisa dadi! Manetualain ta sala, mete ma Ana huku-doki ita. Huu Ana naena haak fo fee hukun neu hatahori fo mana tao salak nai dae-bafok ia.

7 Mete ma au ombo koson, naa natudu nae, Manetualain huku-dokin naa, tetebes. Mete ma au atudu Ndia ta neni babanggan talo naa ena, tao hata de Ana parisa au leleo-lalaꞌong, boe ma Ana naketu au dedeꞌang nae, hata fo au taok naa, sala? 8 Boso talo naa! Mete ma tungga duduꞌak talo naa, ei tungga hatahori fo mana nae, “Naa fo ita tao manggarauk noꞌun lenak, mita fo hata fo neulauk oo tamba namanoꞌu boe!” Hatahori fo mana kokolak talo naa, nandaa hambu huku-dokik. Hambu hatahori ketuk kokolak rakalulutu au nadeng rae, au anori hatahori talo naa.

Ta hambu hatahori esa boe na, dalen ndoos tetebes, huu basa sara tao salak

9 Dadi talo bee? Ei duꞌa mae, ita hatahori Yahudir neulaun lenak numa hatahori ta Yahudir mai, do? Ta bisa dadi! Au atudu neu ei ena ae, basa hatahorir tuda salak, leo mae ndia hatahori Yahudi do, hatahori ta Yahudi. 10 Sama leo neni surak nai Manetualain Susura Malalaon nae,

“Ta hambu hatahori fo leo-laꞌo ndoos seku neu.

Ta hambu esa boe na!

11 Ta hambu hatahori mana bubuluk tebe-tebe laꞌe-neu Manetualain.

Ta hambu esa boe na, fo sangga nalela Manetualain.

12 Basa sara sio laꞌo ela eno-dala masoda ndoos ena.

Boe ma basa sara ta neni pakek kara ena.

Ta hambu hatahori fo natudu dale susuek.

Ta hambu esa boe na!✡

13 Kokolan nara raboo mburu,

nok bali rates fo hatahori suu falik kana ena.

Bafan nara ralela kada kokolak pepeko-lelekok.

Dedeꞌa-kokolan fo mana kalua numa bafan nara mai,

nok bali mengge rason.✡

14 Bafan nara ralela kada oꞌole-aꞌali hatahori,

ma kokolak manggarauk fo kada rakahehedik hatahorir dalen nara,

te naa ndia kalua numa dale kaboo mburun nara mai na.✡

15 Ara ta ramataꞌu rakanisa hatahori.

16 Ara bee reu, na,

ara soa tao nemue-anggik nai naa,

ma tao susa-sonak mata-matak kara neu hatahori.

17 Ara leo-laꞌo ta no mole-damek,

ma ta nau leo-laꞌo no dale lino-lendek.✡

18 Ara ta rakatataka rala aon nara,

nahuu ta rameda bibii-nemetaꞌuk faa boe na neu Manetualain.”✡

19 Ita bubuluk tae, Manetualain fee Ndia Hohoro-lalanen neu hatahori fo muste tao tungga Hohoro-lalanek kara raa. No dalak naa, ara ta bisa rasalaꞌe aon nara fo rae sira ta tao salak bali. Neu ko basa hatahorir marai dae-bafok ia muste rataa mbali Manetualain, fo Ana naketu-naladi sira dedeꞌan nae, sira sala, do taa. 20 Huu naa de ta hambu hatahori esa boe na bisa kokolak nae, “Manetualain henggenee nala au nae, hatahori dale ndoos, nahuu au tao tungga basa Ndia Hohoro-lalanen lalaꞌen.” Ta bisa! Huu Manetualain Hohoro-lalanen ndia natudu nae, ita basa ngga tao salak.✡Sosoda Kokoa-kikiok kara 143:2; Galatia 2:16

Ita muste tamahere neu Lamatuak Yesus takahuluk, dei fo Manetualain henggenee nala ita dadi teu hatahori dale ndoos

21 Boso panggananaa laꞌe-neu Manetualain nanaen fo natudu dalak soa-neu ita bisa malole fali to Ndia. Ndondoon ndia, ita bisa malole fali to Ndia, ta huu ita tungga Ndia Hohoro-lalanen. Ndia Hohoro-lalanen mesa kana ndia surak talo naa, ma Ndia mana toꞌu dedeꞌan lele uluk kara oo rafada talo naa nai Manetualain Susura Malalaon dale boe. 22 Manetualain henggenee nala ita dadi teu hatahori dale ndoos fo mana malole to Ndia, neu ita tamahere neu Yesus Karistus. Ana ta memete matak, te Ana tao talo naa soa-neu basa hatahorir fo mana ramahere neu Yesus.✡

23 Manetualain naa, malalaok. Ma Manetualain dudu-furan, ndia ita oo muste malalaok boe, dei fo Ana bisa simbo nala ita. Tehuu basa hatahorir tao salak. Huu naa de leo mae basa hatahorir soba-soba tao aon nara malole ro Manetualain, tehuu ita ta bisa nduku losa nai Manetualain dudu-furan fo demak mateꞌen naa. 24 Leo mae talo naa, tehuu Manetualain mesa kana ndia natudu Ndia dale susuen ma naketu-naladi nae, ita ta sala ena. Ana simbok nala ita talo naa, nahuu Yesus Karistus tefa-soi nala ita numa ita sala-singgon nara mai ena.

25-26 Manetualain henggenee nala Yesus ena fo dadi neu tunu-hotuk tatana mamaek, fo koka heni ita sala-singgon nara. Tehuu ita muste tamahere neun tae, Ana simbo nala ita huku-dokin. Dadi Ana fee daan titi, ma mate nggati ita. No dalak naa, Manetualain natudu nae, hata fo Ana naketu-naladi nalak naa, tetebes. Fai bakahulun, Ndia dalen loan seli, de Ana naketu fo lilii heni basa sala-singgok kara fo hatahorir taok ndia fai uluk. Tehuu mete ma Ana ta hukun hatahori kasalak, na, Ndia mbeu seserik. Dadi Ana soi dalak, mita fo Yesus Karistus bisa lemba-nasaa ita hatahori kasalak kara huku-dokin. Hatematak ia Ana natudu neu basa hatahorir nae, Ndia tao malole nakandoo. De basa hatahori kasalak kara, fo mana ramahere neu Yesus, Ana naketu fo henggenee nala sara sama leo hatahori dale ndoos.

27 Dadi talo bee? Fama te ei duꞌa mae, ei bisa kokolak maloloa bafam, nahuu Manetualain simbok nala ei ena, do? Ta bisa! Sangga matudu Hohoro-lalanek esa fo tao nala ei malole mia Manetualain, do? Ei duꞌa mae Manetualain simbok ei, nahuu ei tao hata fo neulauk, do? Ta bisa! Manetualain simbok ita, nahuu ita tamahere neu Yesus! Talo kada naa!

28 Huu naa de hatematak ia ita bubuluk ena talo ia: hatahorir bisa malole ro Manetualain, nahuu ramahere neun, ta huu ara tao tungga kada Ndia Hohoro-lalanen.

29 Dadi au ae atane talo ia: Manetualain simbok kada hatahori Yahudi do, Ana oo simbok hatahori laen boe? Tebe! Ana simbok basa sara!

30 Manetualain naa, kada esak ka. Ma hambu kada dalak esa ndia Ana simbon fo ita hatahori dae-bafok bisa malole toon. Ndia ita tamahere neu Karistus. Dalak naa soa-neu hatahori Yahudi ma hatahori ta Yahudi boe.✡Tui Seluk laꞌe-neu Dala Masodak 6:4; Galatia 3:20

31 Dadi au ae atane talo ia: mete ma ita tamahere neu Manetualain, na, naa koka heni Ndia Hohoro-lalanen, do? Taa! Ndondoon ndia, naa tao natetu Ndia Hohoro-lalanen.

<- Roma 2 Roma 4 ->