1 O mamanene laꞌe-neu manggarauk mata-matak kara bebeik kara ia, hetu? Boe ma mete te o duꞌa mae, “Awii! Hatahorir raa manggaraun sudi selik kana ena!” Mete ma o duꞌa talo naa ena, na, besa-besa, ee! O mesa ngga oo manggarauk leo naak boe. Huu naa de o ta hambu dalak fo masalaꞌe aom mae, o ia, see. Mete ma o kokolak mae, hatahori laen nara manggarauk, de randaa hambu hukun, boso lilii-ndondou mae, o ndae salak neu o ao heli-helim boe. Huu o tao manggarauk talo naa boe!✡Mateos 7:1; Lukas 6:37 2 Ita bubuluk mete ma Manetualain fee hukun hatahori fo mana tao manggarauk kara, na, Ana naketu dedeꞌan nara no ta mbeu seserik. 3 Do, talo bee? Fama te o duꞌa mae, “Hatahori fo mana tao manggarauk kara, randaa hambu Manetualain huku-dokin.” Naa te o tao manggarauk sama leo sara. Tehuu nai o duduꞌam, o ta hambu Manetualain huku-dokin. Naa, ndia huun hata?

4 Manetualain natudu dale susuen neu o ena. Ma Ndia dalen loan seli laꞌe-neu o tatao-nonoꞌim. Tehuu tao hata de o ta hosek neu sana? Fama te o ta bubuluk mae, Ana natudu dale susuen neu o, mita fo o laꞌo ela o sala-singgom mara fo fali muni Ndia muu.

5 Tehuu o ia, langga batuk ma ta nau nenene! Ma o ta nau laꞌo ela o sala-singgom faa boe na! Dadi o tao mala o huku-dokim tamba nambera bali. Neu ko mete ma dae-bafok fai mateꞌen ena, na, Manetualain nae timba-tai basa hatahorir leleo-lalaꞌon nara. Neu ko basa hatahorir bubuluk rae, Manetualain naketu hatahorir dedeꞌan no ndoos. Faik naa, Ana hukun berak neu o, nahuu Ana ta simbok o tatao-nonoꞌin nara. 6 O leleo-lalaꞌom talo bee, na, neu ko Manetualain bala tungga hata fo o taok.✡Sosoda Kokoa-kikiok kara 62:12; Dedeꞌa Lasik 24:12

7 Hatahorir fo mana tao hata fo neulauk nakandoo, neu ko Ana fee sara masodak tetebes ta mana ketuk. Ara hambu hada-horomatak, nade malole, ma rasoda rakandoo ro Ndia. 8 Tehuu Manetualain ta simbok hatahori fo mana tao manggarauk. Ana namanasa sara tebe-tebe, huu ara ralela kada laban a mesan. Ara ta tao tungga hata fo ndoos, huu ara kada tao tungga hata fo manggarauk a mesan.

9 Basa hatahorir fo mana tao manggarauk kara, neu ko hambu susa-sonak ma sosoek. Leo mae hatahori Yahudi do, hatahori ta Yahudi, laꞌe basa sara.*Susura Malalaok dedeꞌa Yunani surak nae, “fee hatahori Yahudi dei, ma fee hatahori ta Yahudi boe.” Nai lanek ka-9 nae, “Neu ko basan hambu susa-sonak, lena-lenak hatahori Yahudi, tehuu hatahori ta Yahudi boe.” Nai lanek ka-10 nae, “Neu ko Lamatuak nakadedemak basa mana tao dedeꞌa neulauk, lena-lenak hatahori Yahudi, tehuu hatahori ta Yahudi boe.” 10 Tehuu basa hatahorir fo mana tao hata fo neulauk, neu ko Manetualain nakadedemak kasa, ma fee sara hada-horomatak fo ara leo-laꞌo no lino-lendek ma mole-damek. Leo mae hatahori Yahudi do, hatahori ta Yahudi, basa sara hambu. 11 Te Manetualain ta memete matak na!✡Tui Seluk laꞌe-neu Dala Masodak 10:17

12 Manetualain Hohoro-lalanen naa, tuda laꞌe basa hatahorir. Mete ma hambu hatahori ta mana bubuluk Hohoro-lalanek naa, fo tao salak, neu ko ana lenggo feꞌe numa Manetualain mai. Mete ma hambu hatahorir bubuluk Hohoro-lalanek naa ena, tehuu ana tao salak, neu ko Manetualain pake Hohoro-lalanek naa bali, fo naketu-naladi ndia huku-dokin. Neu ko ara oo lenggo feꞌe numa Manetualain mai boe, nahuu ara lena-langga Ndia Hororo-lalanen ena. 13 Mete ma nau malole mia Manetualain, ta dai no kada nenene Ndia Hohoro-lalanen mesa kana. Hatahorir oo muste tao tungga Ndia Hohoro-lalanen boe, dei fo Ana nau simbok kasa. Boso kada mamanene a!

14 Leo mae hatahori ta Yahudir, ta bubuluk Manetualain Hohoro-lalanen isin, tehuu hambu ketuk numa sira mai tao tungga Hohoro-lalanek naa. Huu dalen nara ndia rafada sara, bee ndia ndaa, ma bee ndia sala. 15 No dalak naa, ara ratudu rae, Manetualain Hohoro-lalanen neni surak nai sira dalen dale, nok bali abas fo Manetualain tenu-lolon nai sira dalen. Sira dale heli-helin dale ndia timba-tai hata fo sira taok kara. Boe ma sira duduꞌan nara mesa kasa ndia rakasasaꞌek salak, mete ma sira tao salak, ma rafada mete ma sira tao ndoos. 16 De neu ko mete ma Manetualain soꞌuk nala Yesus Karistus dadi neu Mana Maketu-maladi Dedeꞌak ena, Ana nau parisa no lutu-lelon basa dedeꞌa nemeninok kara fo bei nefunik nai hatahorir dalen dale. Au fee nenorik talo naa, nandaa no manai Lamatuak Hara Lii Malolen.

17 Dadi ei hatahori Yahudir, talo bee? Ei hii soꞌuk aom mara mae, ei mesa ngga ndia toꞌu Manetualain Hohoro-lalanen fo Ana nakondan tungga baꞌi Musa, hetu? Ei oo soa mabafa loa laꞌe-neu ei nekeesam mia Manetualain boe. 18 Tebe! Ei bubuluk Manetualain hihii-nanaun ena. Ei bubuluk bee ndia neulaun lenak ena. Ei bubuluk basa dedeꞌak kara iar ena, nahuu meser asa ranori ei numa Manetualain Hohoro-lalanen mai ena. 19 Ei mamahere aom mara mae, ei bisa matudu dalak soa-neu hatahorir ta mana bubuluk rae bee reu. Ei tao aom mara nok bali manggaledok fo nasaꞌa soa-neu basa hatahorir fo mana leo-laꞌo nai makiuk dale. 20 Huu ei toꞌu Manetualain Hohoro-lalanen, ei duꞌa mae ei bubuluk basa-basan, ma toꞌu mala basa hata fo ndoos, hetu? Huu naa de ei duꞌa mae, ei bisa manori hatahori nggoa bebek ma kakana kadiꞌi anak kara fo ta mana ralela hata-hata.

21 Dadi au ae atane talo ia: ei hii manori hatahori laen nara, tehuu tao hata de ei mesa ngga ta nau manori hata-hata?! Ei hii hene mimbar fo parenda mae, “Boso mamanaꞌo.” Tehuu tao hata de ei mesa ngga mamanaꞌo?! 22 Ei fee nenorik mae, “Boso hohongge-lelena mia hatahori fo ta sao toum do ta sao inam.” Tehuu tao hata de ei mesa ngga hohongge-lelena?! Ei mburuk malan seli mia bua sosonggok kara, tehuu tao hata de ei mesa ngga panake mala buas ruma uma sosonggok mai?! 23 Ei kokolak maloloa bafam laꞌe-neu Manetualain Hohoro-lalanen, tehuu tao hata de ei mesa ngga lena-langga Hohoro-lalanek naa, ma makamamaek Manetualain talo naa?! 24 Boso tao sama leo fai bakahulun fo neni surak nai Manetualain Susura Malalaon nae, “No ei hatahori Yahudir manggaraum, huu naa de hatahori laen nara hii rakadadaek Manetualain nade malolen.”✡Yesaya 52:5

25 Ei fo hatahori Yahudir muste sunat tungga Manetualain Hohoro-lalanen, hetu? Naa dadi tanda nae, ei maena haak simbo Manetualain hehelu-bartaan. Tehuu mete ma ei lena-langga Manetualain Hohoro-lalanen, na, Manetualain ta simbok ei. Ei dadi sama leo hatahori ta Yahudi fo ta mana sunat nitak. 26 Duꞌa matalolole! Mete ma hatahori fo ta mana sunat tao tungga Manetualain Hohoro-lalanen, na, neu ko Manetualain simbok nalan, leo bali ndia hatahori Yahudi fo mana sunat ena, hetu? 27 Tehuu besa-besa, ee! Mete ma hatahori ta Yahudir fo ta mana sunat, tao tungga Manetualain Hohoro-lalanen, na, neu ko ratudu hata? Ara ratudu ei salam mara rae, ei hatahori Yahudir fo mana sunat ena, lena-langga Manetualain Hohoro-lalanen, leo mae ei toꞌu Hohoro-lalanek naa numa lele uluk mai ena.

28 Boso duꞌa mae, hatahori fo mana dadi neu baꞌi Abraham tititi-nonosin, ma mana sunat nai rou deak ena, naa ndia tao ana dadi neu Manetualain hatahorin tebe-tebe. Taa! 29 Mana dadi neu Manetualain hatahorin tebe-tebe, ndia hatahori fo mana malole no Manetualain. Sunat tetebes fo tao nala hatahori dadi neu Manetualain anan naa, tandan ta nai rou deak, tehuu tandan nai dalen fo Manetualain Dula-dalen ndia taon. Manetualain ndia koa hatahori matak leo naak naa, ta hatahori dae-bafok ndia koan.✡Tui Seluk laꞌe-neu Dala Masodak 30:6

<- Roma 1Roma 3 ->